Lady Gaga ស្អាតប្លែកពេលបង្ហាញខ្លួនលើក្របទស្សនាវដ្ដី Elle ច្បាប់ថ្មី

2018-10-12 08:40:00
ស្ទីលតារា

2018-10-12 08:40:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះទស្សនាវដ្ដីសម្រាប់ស្ដ្រី Elle បានបង្ហាញរូបថត៤សន្លឹកពី Mother Monster ដែលក្នុងនោះសុទ្ធតែរូបថតបានល្អៗខ្លាំង ធ្វើឲ្យម្ចាស់បទ "A Million Reasons” ស្អាតខ្លាំងប្លែកនឹកស្មានមិនដល់។ បន្ទាប់បីបញ្ចេញអាល់ប៊ុមដំបូង "The Fame” កាលពី១០ឆ្នាំមុន ឥឡូវ Lady Gaga ឬឈ្មោះពិតហៅថា Stefani Joanne Angelina Germoanotta បានសាកល្បងចូលរួមសឹងតែគ្រប់វិស័យទាំងអស់ពាក់ព័ន្ធនឹងសិល្បៈ។

Lady Gaga បានកែច្នៃការច្រៀងរបស់នាង ចង្វាក់ពីប៉ុបបែបអេឡិចត្រូនិក ទៅជាប៉ុបបែប Country ព្រមទាំងចូលរួមច្រៀងចង្វាក់ហ្សាសទៀតផង ប៉ុន្តែស្ដាប់ទៅនៅតែគួរឲ្យទាក់ទាញ។ ក្រៅពីការច្រៀង Gaga បានបង្ហាញខ្លួននៅក្នុងរឿងភាគ ដោយសម្ដែងជាតួអង្គសំខាន់មួយក្នុងសេរីរឿង "American Horror Story” ហើយទើបតែថ្មីនេះ បានសម្ដែងជាតួឯកក្នុងរឿង "A Star Is Born” នេះតែម្ដង។

Stefani ជាតារាដែលពោរពេញទៅដោយទេពកោសល្យ នាងជិះលេងហ្គីតា ព្យ៉ាណូយ៉ាងស្ទាត់ជំនាញ មិនត្រឹមតែប៉ុណ្ណោះនាងតែងតែនិពន្ធបទចម្រៀងជាច្រើនដោយខ្លួនឯងយ៉ាងច្រើនបទ នឹកស្មានមិនដល់។ ជាក់ស្ដែងបទចម្រៀងដាក់បញ្ចូលក្នុងភាពយន្ត "A Star Is Born” ក៏ជាស្នាដៃរបស់នាងដូចគ្នា។

ក្នុងកិច្ចសម្ភាសន៍ជាមួយ Elle, Gaga និយាយថា "តួអង្គ Ally មានរឿងរ៉ាវស្រដៀងនឹងប្រវត្តិពិតរបស់ខ្ញុំ។ ប៉ុន្តែខ្ញុំក៏បានធ្វើឲ្យតួអង្គនេះ មានលក្ខណៈខុសប្លែកពីនាងខ្លះៗ ប៉ុន្តែនៅតែមានភាពគួរឲ្យចាប់អារម្មណ៍។"

មិនត្រឹមតែប៉ុណ្ណោះ នាងក៏បានផ្ដល់អំណរគុណដល់តារាសម្ដែង Bradley Cooper ដែលជាអ្នកដឹកនាំរឿងនេះ ដែលជឿជាក់លើនាង និងផ្ដល់សិទ្ធិឲ្យសម្ដែងជាតួឯក ខណៈពេលលោកក៏សម្ដែងជាតួឯកព្រមទាំងជាអ្នកដឹកនាំរឿងខ្លួនឯងដោយផ្ទាល់ដំបូងទៀតផង៕