- 2018-10-16 23:25:00
- ជីវិតតារា
គ្រាន់តែប្ដូរម៉ូដសក់ភ្លាមតារាកូនកាត់ឥណ្ឌា លី ឧត្ដម មានហាងឆេងភ្លែត
- 2018-10-16 23:25:00
- ចំនួនមតិ 0 | ចំនួនចែករំលែក 0
គ្រាន់តែប្ដូរម៉ូដសក់ភ្លាមតារាកូនកាត់ឥណ្ឌា លី ឧត្ដម មានហាងឆេងភ្លែត
ចន្លោះមិនឃើញ
តារាសម្ដែងដែលមានឈាមជ័រជាកូនកាត់ឥណ្ឌា លោក លី ឧត្ដម បានបង្ហើបឲ្យដឹងថា គ្រាន់តែខ្លួនបានប្ដូរពណ៌សក់ភ្លាម ត្រូវបានផលិតកម្មមួយហៅលោកទៅធ្វើតេស្តសម្ដែងតួអង្គមួយ ហើយក៏បានចុះកុងត្រារួចកាលពីពេលថ្មីៗនេះ ដោយគ្រោងចេញថតក្នុងពេលឆាប់ៗនេះតែម្ដង។
លោក លី ឧត្ដម មិនបានប្រាប់ពីចំណងជើង និងផលិតកម្មដែលលោកចូលរួមសម្ដែងឡើយ ប៉ុន្តែលោកបានប្រាប់ថា តួដែលខ្លួនត្រូវសម្ដែងនោះជាតួកាច ដែលចរិតនោះខុសឆ្ងាយពីអត្តចរិតធម្មជាតិរបស់លោក។ មូលហេតុដែលនាំឲ្យតារាសម្ដែងរូបនេះ មិនប្រាប់លម្អិតពីសាច់រឿងនេះ ក៏ព្រោះតែខាងផលិតកម្មឲ្យលាក់សិន រង់ចាំថ្ងៃក្រុងពាលីទើបអាចបញ្ចេញបាន ហើយតាមគម្រោងភាពយន្តបោះអាចក្រុងពាលីចេញថតចុងខែនេះតែម្ដង។
តារាសម្ដែងកាត់ឥណ្ឌា លើកឡើងថា ចំណុចដែលអ្នកដឹកនាំស្ដែងចាប់អារម្មណ៍រហូតទាក់ទងលោកទៅធ្វើតេស្តសម្ដែងនោះ ក៏ព្រោះតែពេញចិត្តម៉ូដពណ៌សក់ដែលលោកទើបប្ដូរ និងទម្រង់មុខរបស់លោក ដែលត្រូវនឹងតួខាងផលិតកម្មចង់បានតែម្ដង។
ការទទួលបានការងារថ្មីនេះ តារាវ័យ២០ឆ្នាំរូបខាងលើបានសម្ដែងការសប្បាយចិត្តជាខ្លាំង ដោយលោកបានប្ដេជ្ញាថា នឹងខិតខំប្រឹងឲ្យអស់ពីសមត្ថភាព មិនឲ្យអ្នកដឹកនាំសម្ដែងខកបំណងលើខ្លួនឡើយ។
លោក ឧត្ដម ប្រាប់ថា ទើបបោះជំហានចូលសិល្បៈជាង១ឆ្នាំនេះទេ ជាមួយការងារសិល្បៈលោកធ្លាប់បានការថតស្ប៉តពាណិជ្ជកម្ម សម្ដែង MV ធ្វើជាពិធីករ និង ការដើរបង្ហាញម៉ូដជាដើម។ចំពោះភាពយន្តវិញ លោកទើបតែបានសម្ដែងភាពយន្ត១រឿងប៉ុណ្ណោះ គឺរឿង"៣ខែ" ក្នុងដំណែងជាតួឯក។ ក្រៅពីការងារសិល្បៈតារាសម្ដែងកូនកាត់ឥណ្ឌារូបនេះ ក៏ជាម្ចាស់ហាងលក់ផលិតគ្រឿងសាឡនមួយផងដែរ និងកំពុងសិក្សាឆ្នាំទី៣ រហូតដល់ទៅ២មហាវិទ្យាល័យ គឺ ជំនាញ ពាណិជ្ជកម្ម និង ឌីហ្សាញ។
តារាសម្ដែងដែលខំជម្នះក្រុម គ្រួសារ ព្រោះតែចង់ក្លាយជាអ្នកសិល្បៈទាំងឪពុកម្ដាយមិនពេញចិត្តរហូតបានសម្រេចនេះបានថ្លែងជាចុងក្រោយថា ខ្លួននឹងបន្តដើរលើវិថីសិល្បៈនេះដោយមិនរាថយឡើយ ប្រសិនបើទស្សនិកជននៅតែត្រូវការ ត្បិតអីអាជីពមួយនេះ គឺជាក្ដីស្រលាញ់និងបានជម្នះឧបសគ្គជាច្រើនមកហើយ៕
