វិធីឆ្លាតវៃមួយសម្រាប់រៀបការរដូវ Covid-19 ឆុំ វត្ដី សម្រេចយក ឃើញថាចំណេញច្រើន

2020-05-05 09:35:39
ជីវិតតារា

2020-05-05 09:35:39
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងដ៏ស្រស់ស្អាត ឆុំ វត្តី បានចូលរោងការនាថ្ងៃម្សិលមិញ ក្នុងកាលៈទេសៈដែលប្រទេសកំពុងព្រួយបារម្ភខ្លាំងរឿងជំងឺកូវីដ-១៩ ប៉ុន្តែនាងនៅអាចប្រព្រឹត្តទៅបាន ដោយមានវិធីបញ្ចៀសការជួបជុំទ្រង់ទ្រាយធំមួយ យ៉ាងឆ្លាតវៃ។

ក្នុងគម្រោង មង្គលការរបស់តារាស្រីសម្បុរស្រអែម បានប្រព្រឹត្តទៅតាមកម្មវិធីប្រពៃណីទាំងអស់។ ប៉ុន្តែនាងបានសម្រេចកាត់ពិធីទទួលភ្ញៀវកិត្តិយសពិសាភោជនីយអាហារនាពេលល្ងាច ដែលជាការជួបជុំធំ ដែលរាជរដ្ឋាភិបាលបានហាមប្រាមដើម្បីទប់ការរីករាលដាលរបស់ខូវីត។

វិធាននេះរបស់ ឆុំ វត្ដី ត្រូវបានគេមើលឃើញថា មានភាពឆ្លាតវៃខ្លាំងក្នុងការរៀបចំពិធីមង្គលរបស់ខ្លួន និងទទួលបានផលចំណេញមួយចំនួន។ ចំណុចទី១ ផលវិជ្ជមានដែលបានពីការកាត់ពិធីទទួលភ្ញៀវពេលល្ងាច គឺថា ពិធីរបស់នាងប្រព្រឹត្តទៅបានតាមកម្មវិធីប្រពៃណីសម្រាប់មង្គលការទាំងអស់ ដោយមិនចាំបាច់លើកពេល ល្មមអាចឲ្យបងប្អូនសាច់ញាតិ ឬជីដូន ជីតា ដែលចែកឋានទទួលដឹងលឺថា ពួកនាងបានបំពេញកិច្ចចប់គ្រប់គ្រាន់សម្រាប់រួមរស់ជាមួយគ្នាហើយ។

ទី២ នាងអាចបញ្ចៀសបាននូវការជួបជុំជាទ្រង់ទ្រាយធំ ស្របតាមការណែនាំរបស់រាជរដ្ឋាភិបាលប្រឆាំងខូវីដ ១៩។ និងទី៣ គឺនាងអាចសន្សំសំចៃបានច្រើនទាំងពេលវេលា កម្លាំងពលកម្ម និងកាត់បន្ថយចំណាយបានយ៉ាងច្រើនថែមទៀត។

សំឡឹងមើលពីពិធីមង្គលការដែលរៀបចំពេញលេញមួយ មិនថាសាមញ្ញជន ឬសិល្បករ ដែលត្រូវកាត់នំ និងទទួលភ្ញៀវពេលល្ងាចទៀត គឺត្រូវត្រៀមអាហារចន្លោះពី៨០តុ ទៅ២០០តុឯណោះ ថែមត្រូវចំណាយលើថ្លៃជួលទីតាំង និងភេសជ្ជៈថែមទៀត ដែលទាំងនេះ ត្រូវចំណាយដល់រាប់ខ្ទង់រាប់ម៉ឺនដុល្លារទៀតឯណោះ។

ដូច្នេះហើយការសម្រេចកាត់ចោលពិធីពេលល្ងាចនេះ មិនត្រឹមចំណេញដូចខាងលើ ប៉ុន្តែនាងក៏មិនចាំបាច់ខ្វាយខ្វល់ ឬគិតគូរនាំឈឺក្បាល រឿងទូទាត់លុយកាក់លើការចំណាយផ្សេងៗដូចជា នំ អាហារទទួលភ្ញៀវ តុ ទីតាំង និងមិនខ្វល់រឿងជំពាក់ចំណងដៃគេច្រើនទៀត។

ទោះយ៉ាងណា ត្បិតថា ការទទួលភ្ញៀវកិត្តិយសពិសាភោជនីយអាហារ មិនមែនជាពិធីចាំបាច់ក្នុងប្រពៃណី ប៉ុន្តែវាជាវេលាចងរឹតចំណងទាក់ទងរវាងសាច់ញាតិ និងញាតិមិត្ត ព្រមជាកិត្តិយសរបស់ម្ចាស់ដើមពិធីទាំងសងដែរ។

ដូច្នេះហើយ ឆុំ វត្ដី បញ្ជាក់ថា មិនកាត់ចោលទាំងស្រុងនោះទេ គឺគ្រាន់តែពន្យាពេលប៉ុណ្ណោះ។ នាងថា នឹងរៀបចំពិធីកាត់ចំណងដៃដែរនៅពេលដែលសេដ្ឋកិច្ចផ្ទាល់ខ្លួនកាន់តែរឹងមាំ ហើយជំងឺកូវីដ-១៩ បានវិនាសសាបសូន្យពីផែនដីទៅ។

កាលពីថ្ងៃទី៤ ខែឧសភា តារាសម្ដែងរូបស្រស់សោភា ឆុំ វត្ដី បានចូលរោងជ័យជាមួយកូនកំលោះឈ្មោះ រិទ្ធ ហួររក្សា។ ពិធីមង្គលការបង្គ្រប់កិច្ចមួយព្រឹករបស់តារាសម្ដែង ឆុំ វត្ដី បានប្រព្រឹត្តយ៉ាងរលូន ដោយពិធីក្រាបផ្ទឹម ចងដៃ និងកាត់សក់បង្កក់សិរីជាដើម ត្រូវបានធ្វើស្របទៅតាមទំនៀមទម្លាប់ប្រពៃណីខ្មែរទាំងអស់។

ក្រៅពីលើកពេលពិធីទទួលភ្ញៀវពេលល្ងាច ឆុំ វត្តី ក៏បានលើកពេលទៅក្រេបទឹកឃ្មុំនៅប្រទេសបារាំងក្រោយរៀបការរួចដែរ ដោយសារតែ Covid-19៕