ថ្មីៗនេះ​ អ្នកគាំទ្របានលើកឡើងពីហេតុផលមួយចំនួនដែលពួកគេ​ដកឃ្លាពីការដែលធ្វើជា Fan សម្រាប់វិស័យមួយនេះ។ ដូច្នេះ​ដើម្បីជ្រាប​កាន់តែច្បាស់ សូមមក​ដឹងហេតុផលផ្សេងៗគ្នាចេញពីការស្ទង់មតិរបស់អ្នកគាំទ្រជាច្រើននាក់កាលពីពេលថ្មីៗ៖

១. មានបទថ្មីដែលត្រូវបាន​​ចេញ​ផ្សាយ​ច្រើនពេក និង​មាន​មាតិកាច្រើនពេកដែលសឹងតែរកពេលតាមដានមិនបាន

ពេល​ខ្លះ​មាន​រឿង​ច្រើន​ដែល​កើតឡើង​នៅក្នុងពិភព K-Pop ថ្មីៗ រហូត​ធ្វើឲ្យអ្នកគាំទ្រតាមដានមិនទាន់ ជាហេតុពួកគេ​ត្រូវ​ដកឃ្លាពីរឿងអស់នោះសិន។ រឿងមួយទៀត ក៏គ្មាន​ការកំណត់ណា​ដែលត្រូវ​តម្រូវ​ឲ្យពួកគេ​ត្រូវ​តែតាមឲ្យជាប់នូវរឿងរ៉ាវដែលកើតឡើងរាល់ថ្ងៃនេះ ឬត្រូវតែតាមទាន់បទ​ចម្រៀងថ្មីៗឲ្យបាន​ល្អឥតខ្ចោះដែរ។

២. ការប្រឈម​នឹង​​រឿងជាច្រើន​កើតចេញពីអាស្រូវផ្សេងៗ ហើយត្រូវធ្វើឲ្យឈឺក្បាល

មិនថា​រឿងទាក់ទងនឹង​ក្រុមសំណព្វចិត្ត ឬពិភព K-Pop ទាំងមូល​ទេ អ្នកគាំទ្រខ្លះក៏មិនអាច​ទ្រាំទ្រ​នឹងរឿងទាំងនោះ ឬត្រូវឱបក្រសោបជាប់ក្នុងខួរក្បាលគ្រប់ពេលដែរ។

៣. តារា​សំណព្វចិត្តត្រូវដល់ពេល​​ចូលទាហាន

ស្របពេល​តារា K-Pop ជាប់បម្រើជាតិ វាក៏ជាពេល​ដ៏ល្អ​សម្រាប់អ្នកគាំទ្រមួយចំនួនដែលមាន​ភាពញញឹកក្នុងជីវិតប្រចាំថ្ងៃរបស់ពួកគេ ហើយត្រូវ​ផ្ដោតលើរឿងសំខាន់ផ្ទាល់ខ្លួនរបស់ពួកគេ​​វិញ។

៤. មាន​ការលើកឡើងថាគុណភាព​តន្ត្រី​មួយចំនួនហាក់ដូចជាធ្លាក់ចុះ ហើយការឲ្យតម្លៃលើសម្រស់កើនឡើងវិញ

ការ​ផ្ដោតខ្លាំង​ពេកមុខមាត់ស្អាត មិនមានអ្វីមិនល្អទេ ប៉ុន្តែការលើកឡើង​ដូចៗគ្នា​បាន​និយាយថា វាពុំស្ថិតស្ថេរយូរអង្វែង ដូចគុណភាព​នៃសមត្ថភាពរបស់តារាៗឡើយ។

៥.ត្រូវជាប់រវល់នឹងការងារ ការសិក្សា ឬជីវិតរស់នៅប្រចាំថ្ងៃ

មិនថា​អ្នកចាប់ផ្ដើមការងារថ្មី ឬសិស្សដែលរវល់នឹងការប្រលង ឬមាន​គ្រួសារដែលត្រូវគិតគូរ ចង់មិនចង់ពួកគេសម្រេចចិត្តទាំងពិបាកដោយយកពេល​គិតរឿង​ផ្ទាល់ខ្លួន​សិន​ដែរ ជាហេតុពេលវេលាដែលត្រូវ​ចំណាយក្នុងការតាមដានក្រុមដែលពួកគេ​ចូលចិត្តត្រូវ​កាត់បន្ថយទៅតាមនោះ។

៦. ដល់ពេល​ដែលត្រូវដកខ្លួនចេញពីពិភពអនឡាញ ដើម្បី​ថែទាំសុខភាពផ្លូវចិត្ត

នៅលើបណ្ដាញសង្គម មានរឿង​ជាច្រើន​បាន​កើតឡើងជាបន្តបន្ទាប់ ដោយក្នុងនោះមួយចំនួនគឺមាន​តែ​រឿងអវិជ្ជមាន។ នេះក៏អាច​ជា​មូលហេតុដែលធ្វើឲ្យសុខភាពផ្លូវចិត្តអ្នកគាំទ្រ ឬអ្នកនិយមលេងអ៊ីនធើណិតមាន​ការចុះអន់ថយដែរ។ ហេតុដូច្នេះ​ពួកគេ​ត្រូវសម្រាក​សិន និងស្វែងរកក្ដីសុខផ្លូវចិត្ត ជាមួយសកម្មភាព​ផ្សេង​ដែលពួកគេ​ចូលចិត្ត៕