ការសម្ដែងពិសេស បានមកដល់ហើយ ក្នុងឱកាសអបអរសាទរ ខួបចាប៉ីដងវែង ក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ កាលពី ថ្ងៃទី 30 វិច្ឆិកាកន្លងទៅនេះ យើងខ្ញុំមានមោទនភាពបាននាំយកទស្សនីយភាពពិសេស ដែលចូលរួមសម្ដែងពីសិល្បករ និងភ្ញៀវពិសេស ៤ នាក់ ក្នុងនោះមានដូចជា ព្រះនាងជេនណា CEO របស់ធនាគារ ABA គឺលោកAskhat
តារាចម្រៀងលោក ថេណា និងលោក ឌួង សុគា ។ លើសពីតន្ត្រី ចាប៉ីដងវែង រំលេចអត្ថន័យយ៉ាងជ្រាលជ្រៅ ថែរក្សាបេតិកភណ្ឌល្អឯក ពីមួយជំនាន់ទៅមួយជំនាន់ជារៀងរហូតមក។

ការសម្តែងពិសេសនេះ យើងសង្កេតឃើញថា ពិតជារឿងដ៏កម្រណាស់ដែល CEO របស់ ធនាគារ ABA ជាជនបរទេស ប៉ុន្តែចេះដេញចាប៉ីដងវែងខ្មែរបានយ៉ាងល្អគួរឱ្យកោតសរសើរ ។ លោក Askhat ដែលជា CEO របស់ធនាគារ ABA បានមានប្រសាសន៍ថា ៖ លោកស្រឡាញ់សិល្បៈខ្មែរគ្រប់ទម្រង់ ជាពិសេស ចាប៉ីដងវែង លោកមានសេចក្តីរីករាយណាស់ដែលបាសម្តែងចាប៉ីខ្មែរ ក្នុងឱកាសអបអរសាទរខួប ៨ ឆ្នាំ នៃការដាក់បញ្ចូលចាប៉ីដងវែងក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូ ។

លោកបានបញ្ជាក់ឱ្យដឹងថា លោកពិតជាចូលចិត្តចាប៉ីខ្មែរ ពីព្រោះវាជាការរួមបញ្ចូលគ្នារវាង តន្ត្រី និងកាព្យនិទាន ។ លោកបន្តថា នៅប្រទេសរបស់លោក កាហ្សាក់ស្ថាន ក៏មានការសម្តែងស្រដៀងគ្នានេះដែរ គឺឧបករណ៍ Dombra ហើយក៏មានច្រៀងចម្រៀងអម និងភ្លេងដែរ ។ លោកបញ្ជាក់បន្ថែមទៀតថា លោកពិតជាចូលចិត្តសំឡេងរបស់ចាប៉ីណាស់ ព្រោះឧបករណ៍តន្ត្រីចាប៉ីគឺមានសំឡេងប្លែកពិសេស ពេលបានស្តាប់ហើយមានអារម្មណ៍ថាស្រស់ស្រាយជាខ្លាំង។

លោក Askhat បានបញ្ជាក់ផងដែរថា ឥឡូវនេះនៅលើ ABA Mobile App ក៏មានរូបចាប៉ីដងវែង នៅលើផ្ទាំងអេក្រង់ផងដែរ «បេតិកភណ្ឌខ្មែរ» ដែលរូបចាប៉ីតំណាងឱ្យមុខងារ «សេវាកម្ម» ។ លោកថា វាជារឿងសំខាន់ក្នុងការផ្សព្វផ្សាយវប្បធម៌ខ្មែរតាមរយៈផលិតផលរបស់យើង ។ ហើយអ្វីដែលកាន់តែអស្ចារ្យទៀតនោះ លោក Askhat ថែមទាំងបានដេញចាប៉ីដងវែងជូនព្រះនាង ជេនណា ច្រៀងថែមទៀតផង ហើយលោកពិតជាសប្បាយចិត្តនឹងការសម្តែងចាប៉ីនេះខ្លាំងណាស់ ។

គួររំលឹកផងដែរថា ចាប៉ីដងវែងរបស់កម្ពុជា ត្រូវបានដាក់បញ្ចូលក្នុងបញ្ជីបេតុកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូ នៅទីក្រុង អាឌីសអាបាបា ប្រទេសអេត្យូពី កាលពីថ្ងៃទី៣០ ខែវិច្ឆិកា ឆ្នាំ២០១៦ ។

ចាប៉ីដងវែងជាឧបករណ៌តន្រ្តីវ័យចំណាស់មួយរបស់កម្ពុជា ដោយអាចលេងបានអមជាមួយបទចំរៀង ព្រមទាំងអាចច្នៃប្រឌិត និងបង្កើតបទថ្មីៗដោយខ្លួនឯងទៀតផង ដោយបានរៀបរាប់ពីរឿងបុរាណ ឬរឿងអប់រំខ្លី ដល់ប្រជាជនពីគុណធម៌និងវប្បធម៌ជាដើម។

សូមទស្សនាការសម្ដែង និងចូលរួមអបអរសាទរសិល្បៈជាតិយើង៖https://www.facebook.com/ABA.Bank.Cambodia/videos/886662980327228