រិន សាវ៉េត បន្ទោសខ្លួនឯងខ្លាំង ក្រោយបណ្ដោយភរិយាធ្លាក់ដល់ដំណាក់កាលធ្ងន់ធ្ងរ

2017-04-19 23:11:00
ជីវិតតារា

2017-04-19 23:11:00
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីស្ថានភាពជំងឺមហារីកប្រពន្ធរបស់ខ្លួន មិនអាចសង្គ្រោះមកដូចដើមបាន ក្រោយឈានដល់ដំណាក់ការចុងក្រោយនេះ តារាចម្រៀងលោក រិន សាវ៉េត បានបន្ទោសខ្លួនឯងជាខ្លាំងថា មកពីខ្លួនមិនសូវមានរវល់នឹងសុខភាពប្រពន្ធនាំឲ្យធ្លាក់ខ្លួនដល់ថ្នាក់ហ្នឹង។

“មកពីខ្ញុំរវល់រឿងរកលុយពេក ចេញពីផ្ទះបាត់ៗ មិនបានសួរនាំប្រពន្ធឲ្យបានដិតដល់រឿងជំងឺនេះ ហើយប្រពន្ធខ្ញុំក៏ពូកែទ្រាំទៀត តែបើខ្ញុំមិនចេញមកបានលុយ បានមកពីណាចិញ្ចឹមប្រពន្ធកូន បង់ថ្លៃផ្ទះទឹកភ្លើង" លោក រិន សាវ៉េត ថ្លែងប្រាប់ Sabay។

លោកថា ជំងឺរបស់ភរិយារបស់ខ្លួនប្រសិនបើព្យាបាលតាំងចាប់ផ្ដើមមានដំបូង ប្រហែលមិនធ្ងន់ធ្ងរដល់ថ្នាក់ហ្នឹងទេ ប៉ុន្តែមកពីទើបបានដឹង ស្របពេលបានឈានដំណាក់កាលធ្ងន់ធ្ងរទៅហើយ។

កន្លងមកលោក រិន សាវ៉េត ធ្លាប់បានបញ្ជូនភរិយាមកព្យាបាលម្ដងហើយកាលពីដើមខែ មករា ឆ្នាំ ២០១៧ នៅមន្ទីរពេទ្យមិត្តភាពខ្មែរសូវៀត ហៅពេទ្យរុស្សី។ ប៉ុន្តែក្រោយពីអាការបានប្រសើរក្រុមគ្រូពេទ្យបានអនុញ្ញាតឲ្យទៅសម្រាកព្យាបាលនៅផ្ទះវិញ។

ភរិយាតារាចម្រៀងរូបនេះ ទើបតែបញ្ជូនមកសម្រាកនៅមន្ទីរពេទ្យដដែលនេះជាថ្មីម្ដងទៀតកាលពីថ្ងៃទី៩ ខែ មេសា ឆ្នាំ ២០១៧ បន្ទាប់ពីមេរោគមហារីកបានរាល់ដល់ខួរក្បាល និងសួត ក្រោយចាក់ថ្នាំគីមីចូល។ តាមការបញ្ជាក់ពីលោក រិន សាវ៉េត មកទល់ពេលនៅភរិយារបស់លោកស្ថិតនៅបន្ទប់សង្គ្រោះបន្ទាន់នៅឡើយ ដោយគ្រូពេទ្យប្រាប់ថា មហារីកនោះ បានរីករាលដាល ដល់ខួរក្បាល និង សួត ថែមទៀត។

ទោះបីជាបាននាំប្រពន្ធមកព្យាបាលជាច្រើនលើកច្រើនសារបែបនេះក្ដី លោក រិន សាវេត ថ្លែងថា ខ្លួននៅតែមិនអស់ចិត្ត ក្នុងនាមកាតព្វកិច្ចជាស្វាមី ដែលមិនបានមើលថែប្រពន្ធឲ្យបានរស់ដោយសុខស្រួល។

លោក រិន សាវ៉េត មានកូនប្រុសតែម្នាក់គត់វ័យជិត១០ឆ្នាំ ជាចំណងដៃអាពាហ៍ពិពាហ៍។ បច្ចុប្បន្នលោក និងក្រុមគ្រួសារស្នាក់នៅផ្ទះជួលមួយកន្លែងជាច្រើនឆ្នាំមកហើយ ខាងក្រោយមន្ទីរពេទ្យ ព្រះកុសុមៈ ឬ ពេទ្យលោកសង្ឃ ក្នុងខ្ទង់ជាង២០០ដុល្លារ ក្នុងមួយខែបូកទាំងទឹកទាំងភ្លើង៕

អត្ថបទ៖ ស៊ុនហួត