- 2017-09-02 00:45:19
- ជីវិតតារា
អ៊ីចឹងសោះ បានជា ថន លក្ខិណា អវត្តមានលើវិថីភាពយន្ត
- 2017-09-02 00:45:19
- ចំនួនមតិ 0 | ចំនួនចែករំលែក 0
អ៊ីចឹងសោះ បានជា ថន លក្ខិណា អវត្តមានលើវិថីភាពយន្ត
ចន្លោះមិនឃើញ
ខណៈទីផ្សារភាពយន្តចាប់ផ្ដើមមានសន្ទុះឡើង ធ្វើឲ្យសិល្បករសិល្បៈការិនីជាច្រើនមានទីផ្សារគ្មានសម្រាកនោះ ស្រីស្អាត ថន លក្ខិណា បែរជាមិនដែលឃើញមុខលើវិស័យភាពយន្តសោះតែម្ដង។ ចំណុចនេះនាងបញ្ជាក់ថា មិនមែនមកពីគ្មានផលិតកម្មហៅថតឡើយ ពោលគឺនាងជាអ្នកមិនទទួលដោយខ្លួនឯង ដោយផ្អាកសិន ព្រោះមួយរយៈចុងក្រោយនេះរវល់លើការងារពិធីករច្រើនជាង។
ជិត២ឆ្នាំហើយដែលកញ្ញា ថន លក្ខិណា អវត្តមានលើវិស័យភាពយន្តនេះ តារាស្រីរូបនេះលើកឡើងថា ខ្លួនជាប់កុងត្រាធ្វើជាពិធីការិនីឲ្យទូរទស្សន៍ ហើយកម្មវិធីគឺចុះតាមខេត្ត អ៊ីចឹងហើយការថតកុន គឺនាងផ្អាកតែម្ដង ប៉ុន្តែការថតMV ឬស្ប៉តពាណិជ្ជកម្ម គឺនាងនៅតែទទួល ហើយកំពុងតែថតជាបន្តបន្ទាប់។ "ផ្អាកមិនមែនមានន័យថា ខ្ញុំឈប់ថតអីណា ខ្ញុំជាប់ Concertតាមខេត្តច្រើនពេក តែលូវរដូវភ្លៀងអ៊ីចឹងទំនេរ តែ ស្ប៉តMV អីហ្នឹងថតប៉ិប៉កៗរហូតហ្នឹង" ថន លក្ខិណា លើកឡើង។
តារាស្រីដែលល្បីនិយាយភាសាថៃបានល្អរូបនេះបានបន្តឲ្យដឹងថា ទោះបីជានាងផ្អាកថតក៏ពិតមែនប៉ុន្តែខាងផលិតកម្មដែលខ្លួនធ្លាប់ថតឲ្យកន្លងមកនៅតែទាក់ទង ដោយចង់ឲ្យនាងថតជាបន្តបន្ទាប់ តែដូចនាងបានលើកឡើង សុំផ្អាក១រយៈសិន។
ថន លក្ខិណា មិនបារម្ភលើប្រជាប្រិយភាពរបស់ខ្លួនឡើយជុំវិញការអវត្តមានលើវិស័យភាពយន្តនេះ ដោយនាង សម្អាងថា ទោះបីជាមិនចេញមុខលើភាពយន្ត ខ្លួននៅតែចេញមុខលើកញ្ចក់ទូរទស្សន៍ជារៀងរាល់សប្ដាហ៍ ដូចនេះទស្សនិកជន មិនភ្លេចមុខនាងឡើយ។
ថន លក្ខិណា បានបោះជំហានចូលសិល្បៈក្នុងអំឡុងឆ្នាំ២០០៦ តាមរយៈការប្រឡងស្រីស្អាតរបស់មជ្ឈមណ្ឌល BS ដោយទទួលបានចំណាត់ថ្នាក់លេខ ១ ។ ចាប់តាំងពីពេលនោះមក នាងក៏មានឱកាសត្រូវខាងផលិតកម្មហៅថតពាណិជ្ជកម្ម និងខារ៉ាអូខេជាហូរហែ រហូតមានកេរ្តិ៍ឈ្មោះដល់បច្ចុប្បន្ន។
នៅចុងឆ្នាំ ២០០៦ នាងបានហក់ចូលមកកាន់តំណែងជាពិធីការិនីជាបន្តបន្ទាប់ នៅស្ថានីយ ទូរទស្សន៍ប៉ុស្តិ៍លេខ ៣ គឺ កម្មវិធី ស្ត្រីមេផ្ទះ។ នៅ ប៉ុស្តិ៍លេខ ៩ ក្នុងឆ្នាំ ២០០៨ កម្មវិធីផ្សាយផ្ទាល់ តន្ត្រីថ្ងៃអាទិត្យ ប៉ុស្តិ៍CTN កាលពីចុងឆ្នាំ ២០០៩ ក្នុងកម្មវិធី «សុខគា លក្ខិណា ប៊ីអាយជី» ផ្ទះលោកតា និងចុងក្រោយ មកធ្វើជាពិធីការិនីនៅទូរទស្សន៍ហង្សមាស។ ចំពោះការថតភាពយន្តវិញ តារាស្រីវ័យ២៧ឆ្នាំរូបនេះធ្លាប់ថតបានប្រហែល ៥ ទៅ៦ រឿង មានរឿង "អាបពាក់មួកសុវត្ថិភាព" និង "វិស្សមកាលមរណៈ"ជាដើម។
នាងបានថ្លែងជាចុងក្រោយថា ខ្លួនអាចនឹងឆ្លៀតទទួលការថតកុនវិញ មិនអាចផ្អាកយូរពេកឡើយ ត្បិតអីប្រសិនបើទុកយូរពេកក៏មិនល្អនោះដែរ ព្រោះនាងជាអ្នកសិល្បៈត្រូវតែចេញមុខឲ្យមហាជនបានកាន់តែច្រើនកាន់តែល្អ៕
