តារាសាច់ដុំ ជា លាងឈែ បើកកកាយពីការហាត់កាយវប្បកម្ម បានរាងស្អាត សុខភាពល្អ

2017-10-25 06:26:06
ស្ទីលតារា

2017-10-25 06:26:06
ចំនួនមតិ 0 | ចំនួនចែករំលែក 0

ចន្លោះមិនឃើញ

អស់រយៈពេលប្រមាណជា៤ឆ្នាំមកហើយ ដែលតារាប្រុស ជា លាងឈែ បានឆ្លៀតពីការងារសិល្បៈ ហើយចូលប្រលូកកីឡាកាយវប្បកម្ម ក្រោយលោកយល់ឃើញថា ប្រភេទកីឡាពេញនិយមសម្រាប់បុរសមួយនេះ មានគុណប្រយោជន៍សម្រាប់សុខភាព និងរាងកាយច្រើន។

តាមការបញ្ជាក់របស់តួឯកប្រុសក្នុងរឿង “អូនជាការចងចាំបង” បានឲ្យដឹងថា ដើមឡើយ គោលបំណងនៃការហាត់កីឡាបង្កើនសាច់ដុំនេះ គឺដើម្បីរាងស្អាត ដើម្បីរាងកាយមើលទៅសមសួនជាមនុស្សប្រុសប៉ុណ្ណោះ ដែលជាទំនោរមួយរបស់តារាប្រុសទូទៅ មិនថាខ្មែរ ឬបរទេសនោះទេ។ ប៉ុន្តែក្រោយពេលហាត់ លោកកត់សម្គាល់ឃើញថា មានអត្ថប្រយោជន៍ជាច្រើនទៀតបានកើតមកជាមួយ។

កីឡាកាយវប្បកម្ម ហាក់មិនសូវពេញនិយមឡើយ សម្រាប់ប្រជាពលរដ្ឋក្នុងស្រុក បើធៀបនឹងប្រភេទកីឡាផ្សេងៗដូចជា បាល់ទាត់ ឬប្រដាល់ជាដើម ព្រោះថា ការរកចំណូលពីកីឡានេះ មិនសូវមានឡើយ ហើយការប្រកួតក្នុងស្រុក ក៏ពុំសូវមានដែរ។ បន្ថែមពីលើនេះ ការហាត់កីឡានេះទៀតសោត មិន ងាយស្រួល ត្រូវហាត់ទៀងទាត់ និងមានរបបអាហារត្រឹមត្រូវ ជាហេតុធ្វើឲ្យមានការចំណាយច្រើន។ ដូច្នេះហើយ ទើប ជា លាងឈែ បញ្ជាក់ថា អ្នកហាត់ គឺសុទ្ធតែជាអ្នកស្រលាញ់កីឡានេះផ្ទាល់ និងដើម្បីសុខភាពរាងកាយប៉ុណ្ណោះ។

ថ្មីៗនេះ កីឡាកាយវប្បកម្មកម្ពុជា ទើបនាំមេដាយ មាស ប្រាក់ និងសំរិទ្ធ ជូនជាតិ ដោយកីឡាករកាយវប្បកម្មកម្ពុជា៣រូប យកបានពីប្រទេសម៉ុងហ្គោលី។ នាមជាអ្នកហាត់កីឡានេះដូចគ្នា តារាប្រុសរូបនេះរីករាយ និងមោទនភាព ដែលរៀមច្បងសម្រេចសមិទ្ធផលដ៏អស្ចារ្យជូនជាតិ។ បើទោះជាយ៉ាងណា តារាប្រុសរូបនេះ មិនដែលគិតចង់ប្រមាញ់ជយលាភីណាពីកីឡានេះទេ ពោលគឺហាត់ដើម្បីសុខភាពប៉ុណ្ណោះ៕