ហម ឈរ៉ា មោទនភាពព្រោះលទ្ធផលសិក្សារបស់កូនស្រី
ហម ឈរ៉ា មានមោទនភាពយ៉ាងខ្លាំង ដោយសារតែកូនស្រីរបស់លោកបានទទួលចំណាត់ថ្នាក់លេខ១សម្រាប់ឆ្នាំសិក្សា ២០១៥-២០១៦នេះ ពីសាលាវេស្ទើនអន្តរជាតិ។
ឪពុករូបនេះបានបន្ថែមថា កូនស្រីរបស់ខ្លួនឈ្មោះ ហម រ៉ាណែអាលីសា មានអាយុ៩ឆ្នាំទើបបញ្ចប់ថ្នាក់ទី៤C នៃសាលាខាងលើ។
“ នេះមិនមែនជាភាពអំនួត តែវាជាមោទនភាពសម្រាប់យើងដែលជាឪពុកម្ដាយ គ្រប់រូបដែលចង់បាននិងចង់ឃើញលទ្ធផលបែបនេះ ស្ដែងចេញពីការខិតខំរបស់កូនកន្លងមក នេះក្ដីរំភើប ក្ដីសប្បាយព្រោះចង់ឃើញណាស់"។ ហម ឈរ៉ា ថ្លែងមកកាន់ Sabayមុននេះ។
លោក ហម ឈរ៉ា អះអាងថា ការពិតទៅកន្លងមកលោកធ្លាប់ត្រូវបានភាគីខាងសាលាអញ្ជើញចូលរួមទទួលប័ណ្ណសរសើរជាមួយកូនស្រីចំនួន២លើកហើយនៅពេលនាងរៀនថ្នាក់ទី១បានចំណាត់ថ្នាក់លេខ២។ បន្ទាប់មកខាងសាលាបានអនុញ្ញាតឱ្យរៀនផ្លោះដល់ថ្នាក់ទី៣តែម្ដង បើយបានទទួលចំណាត់ថ្នាក់លេខ៣។
ទោះបីជាយ៉ាងណា ឪពុកខាងលើបន្ថែមថា លោកនឹងចូលរួមទទួលប័ណ្ណសរសើរចំណាត់ថ្នាក់លេខ១របស់កូនស្រីនៅថ្ងៃទី២៣កក្កដាខាងមុខនេះ ក្នុងនាមជាអាណាព្យាបាល។ លោក ហម ឈរ៉ា ចាត់ទុកថា នេះបុណ្យកុសលរបស់លោក និងភរិយាដែលមានកូនប្រកបដោយគន្លងធម៌ ហើយលោកនឹងព្យាយាមណែនាំអប់រំកូនបន្ថែមទៀត ព្រោះចង់ឃើញគេមានអនាគតល្អ៕
អត្ថបទ៖ សំ ជំនាញ