- 2018-08-15 03:33:44
- ព័ត៌មាន
មូលហេតុពិត...មុនជួបគ្រោះម៉ោង២យប់ ស៊ឹម សុវណ្ណារ៉ុង ថា មានពពួកអមនុស្សមកបន្លាចតៃកុងឡាន
- 2018-08-15 03:33:44
- ចំនួនមតិ 0 | ចំនួនចែករំលែក 0
មូលហេតុពិត...មុនជួបគ្រោះម៉ោង២យប់ ស៊ឹម សុវណ្ណារ៉ុង ថា មានពពួកអមនុស្សមកបន្លាចតៃកុងឡាន
ចន្លោះមិនឃើញ
តាមការអះអាងរបស់ម្ចាស់បទ "កុំទ្រាំស្នេហ៍អ្នកក្រដូចបង" ស៊ឹម សុវណ្ណារ៉ុង បានឲ្យដឹងថា មុនពេលជួបគ្រោះក្រឡាប់រថយន្តគួរឲ្យតក់ស្លុតនោះ មានពពួកអមនុស្សមកបន្លាចអ្នកបើកបររបស់លោក ទើបហេតុការណ៍អាក្រក់បានកើតឡើង។
តារាចម្រៀងមកពីខេត្តបាត់ដំបង បានជួបគ្រោះថ្នាក់ក្រឡាប់រថយន្តគួរឲ្យតក់ស្លុតមួយកាលពីដើមខែ ត្រង់ភូមិសាស្ត្រស្រុកព្រះនេតព្រះខេត្តបន្ទាយមានជ័យទាំងរំលងអាធ្រាត្រម៉ោង២យប់ ដោយមិនមានអ្នកណាដឹង។ រំលឹកទៅដល់ហេតុការណ៍ ស៊ឹម សុវណ្ណារ៉ុង បានរៀបរាបថា ពេលនោះ គឺលោកបានធ្វើដំណើរត្រឡប់ពីការប្រគំតន្ត្រីនៅប៉ោយប៉ែត ឆ្ពោះទៅខេត្តសៀមរាប ដោយកាត់តាមខេត្តបន្ទាយមានជ័យ។
មកដល់ចំណុចភូមិសាស្ត្រស្រុកព្រះនេតព្រះ លោកបានចូលចាក់បំពេញហ្គាសសិន។ ពេលចូលចាក់ហ្គាស តារាចម្រៀង បានសួរអ្នកបើកថា ងងុយអត់...អ្នកបើកបរឆ្លើយវិញថា អស់កម្លាំងបន្តិចដែរ ព្រោះបើកឡាន២-៣ថ្ងៃជាប់គ្នាហើយ យ៉ាងណានៅតែបន្តដំណើរទៅមុខទៀត។
បើកមកបានប្រមាណ បន្តិច គាត់(អ្នកបើកបរ)ក៏ថា បងខ្ញុំអស់ដៃអស់ជើងហើយ...សុំសម្រាកសិន ហើយខ្ញុំក៏សម្រាកពីរនាក់គាត់ដែរ...ប៉ុន្តែហ្នុងគាត់ថា គេងអត់លក់ចេះរសេះរសោះ...ហើយគាត់ថា គាត់ចេះតែឃើញក្មេងៗជាច្រើនលើដើមឈើមកបន្លាចគាត់...ដល់អីចឹងក៏សម្រេចបើកចេញពីកន្លែងនោះ ប៉ុន្តែបានតែប្រមាណខ្ទង់ ៥០ម៉ែត្រ ឡានស្រាប់តែរេចង្កូតធ្លាក់ចូលទៅអន្លុងនោះតែម្ដង"។
អន្លុងកន្លែងរថយន្តរបស់ សុវណ្ណារ៉ុង ធ្លាក់នោះ ត្រូវបានអះអាងថា ជាកន្លែងជើងបក(កន្លែងដែលកើតគ្រោះថ្នាក់ញឹកញាប់) និងមានរូបភាពសាហាវទៀត។ តារាចម្រៀងដដែល បានអះអាងថា កាលពីឆ្នាំមុន រថយន្តផ្ទុះឆេះតៃកុងឡានស្លាប់ ហើយឪពុកកូន៣-៤នាក់ជិះរ៉ឺម៉កជាមួយគ្នា ហើយត្រូវឡានមកពីមុខបុកធ្វើឲ្យធ្លាយពោះវៀនស្លាប់នៅកន្លែងនោះទាំងអស់។
រថយន្តម៉ាក នីហ្សាន់ ណាវ៉ារ៉ា របស់ តារាចម្រៀង បានក្រឡាប់ជាច្រើនត្រឡប់ មុនពេលដល់ទៅបាតស្រះ។ ទាំង ណារ៉ុង និងតៃកុងឡាន បានពុះពាររំដោះខ្លួនចេញពីរថយន្តមកដោយខ្លួនឯងមិនមានអ្នកណាជួយឡើយ ដោយសារម៉ោង២រំលងអាធ្រាត្រទៅហើយ។ "ទឹកដោះម្ដាយថ្លៃណាស់បង ដែលខ្ញុំមិនមានរឿងធ្ងន់ធ្ងរ...ពេលនោះ ទ្វារឡានជាប់ Lock ទាំងអស់ ប៉ុន្តែបងតៃកុងឡាន ស្មារតីគាត់ហ្នឹងដែរ គាត់ធាក់ទម្លុះទ្វារចេញមក ហើយទឹកហូរចូលក្នុងឡាន...សំណាងមែនទែនបងអើយ ដែលមិនអី!”។
ស៊ឹម សុវណ្ណារ៉ុង និងតៃកុងឡាន បានរួចផុតពីគ្រោះធំ ដោយគ្រាន់តែរបួសតិចតួច និងមានអារម្មណ៍តក់ស្លុត។ ប៉ុន្តែរថយន្តខូចខាតយ៉ាងដំណំ ដោយត្រូវចំណាយជួសជុលអស់ប្រមាណ ៥ពាន់ដុល្លារអាមេរិកឯណោះ ដោយបានធ្វើឲ្យប៉ះពាល់ដល់ជីវភាពលោកខ្លាំង ព្រោះជួបគ្រោះផង ការងារមិនសូវមានព្រោះចំរដូវភ្លៀងផង៕
