- 2018-11-07 03:27:53
- ព័ត៌មាន
បើធ្វើតាមបានដូច ខាត់ សុឃីម ពិតល្អសម្រាប់ខ្លួនឯង និងពិតជាជោគជ័យទៅថ្ងៃមុខ
- 2018-11-07 03:27:53
- ចំនួនមតិ 0 | ចំនួនចែករំលែក 0
បើធ្វើតាមបានដូច ខាត់ សុឃីម ពិតល្អសម្រាប់ខ្លួនឯង និងពិតជាជោគជ័យទៅថ្ងៃមុខ
ចន្លោះមិនឃើញ
តារាប្រជាប្រិយ ខាត់ សុឃីម ដែលប្រិយមិត្តមើលឃើញថា រវល់គ្រប់ផ្លូវនោះ បានប្រាប់ថា តាំងពីដើមរហូតមកដល់បច្ចុប្បន្ន នាងមានវិន័យផ្ទាល់ខ្លួនមួយ គឺមិនខ្ជះខ្ជាយពេលវេលា ដោយឲ្យកន្លងផុតទៅដោយឥតប្រយោជន៍នោះទេ។
អ្នកនាង ខាត់ សុឃីម លើកឡើងថា មនុស្សយើងម្នាក់ មានពេលវេលាមិនច្រើនទេ ដូច្នេះហើយ អំឡុងពេលឱកាសកំពុងហុចឲ្យហើយ កម្លាំងនៅមាន អ្វីដែលនាងអាចធ្វើបាន គឺនាងនឹងធ្វើដោយមិនស្ទាក់ទេ។ ទន្ទឹមនឹងការថ្លែងបែបនេះ គណៈកម្មការ The Voice Kid Cambodia 2 ត្រូវបានគេកត់សម្គាល់ថា នាងកម្រនឹងមានឱកាសជួបជុំជាមួយមិត្តភ័ក្ដិ ធ្វើសកម្មភាពសប្បាយៗតាមរូបភាពផ្សេងៗណាស់។
ផ្ទុយទៅវិញ ក្រៅពីសិល្បៈ នាងបានស្ទុះស្ទារទៅធ្វើការងារខាងក្រៅជាច្រើនទៀត ក្នុងនោះនាងកំពុងរវល់ពន្លឿនការសាងសង់សំណង់ផ្ទះជួលរបស់នាងដែលមានជាង ៥០បន្ទប់ ធ្វើស្ទូឌីយ៉ូ ធ្វើជាអ្នករកស៊ីលក់ និងកួកជេអចលនទ្រព្យ និងលក់សេវាធានារ៉ាប់រងជីវិតថែមទៀត។
ដោយឡែកការងារសិល្បៈវិញ រាល់ថ្ងៃនាងកំពុងមមាញឹកនឹងការងារច្រៀងការ កាត់សក់ ធ្វើជាគណៈកម្មការការប្រឡងចម្រៀងកុមារលំដាប់ពិភពលោករបស់ទូរទស្សន៍ហង្សមាស ថតរឿង ជាក់ស្ដែងក្រោយពីបញ្ចប់រឿង "បិសាចគួរឲ្យស្រឡាញ់" នាងក៏កំពុងថតភាពយន្តមួយរឿងទៀត ដឹកនាំដោយលោក កៅ សីហា គឺរឿង "អាពាហ៍ពិពាហ៍ចៃដន្យ" និងមានរឿងថ្មីមួយទៀត ត្រៀមថតបន្ទាប់ពីរឿងនេះ។
ភរិយា លោក អ៊ិន ផានូ ហៅ បញ្ញា បានលើកឡើងថា រាល់ថ្ងៃ នាងមានការងារច្រើន រហូតរកពេលទំនេរមិនឃើញពិតមែន។ "ដូចនិយាយអីចឹង បើយើងបោះបង់ចោលពេលវេលារបស់យើង មិនរកអីជាប្រយោជន៍ ឲ្យខ្លួនយើង ក្រុមគ្រួសារ ឬសង្គមជាតិទេ ថ្ងៃក្រោយយើងនឹងស្ដាយក្រោយ។ អីចឹងការងារខ្ញុំរាល់ថ្ងៃ គឺខ្ញុំគិតយ៉ាងម៉េចថា អោយតែកង់ឡានវិល គឺមានលុយចូលផ្ទះអីចឹងណា!”។ សុឃីម ថ្លែង។
ដោយសារតែបែបនេះ តារាប្រជាប្រិយដដែល បញ្ជាក់ថា រាល់ថ្ងៃនាងមិនសូវមានពេលជួបជុំផឹកស៊ីអីទេ ម្យ៉ាងនាងក៏មិនសូវចូលចិត្តទម្លាប់នេះដែរ ព្រោះនាងស្ដាយឱកាស ស្ដាយពេលវេលា និងមានរឿងត្រូវទទួលខុសត្រូវច្រើនទៀត។ នេះមិនទាន់និយាយដល់ការងារចេញទៅច្រៀងសម្ដែងនៅបរទេសផង។
ខាត់ សុឃីម ប្រាប់ថា មានអ្នកទាក់ទងទៅសម្ដែងនៅបរទេសច្រើន ប៉ុន្តែរវល់នឹងការងារក្នុងស្រុកច្រើនទាំងសិល្បៈ ទាំងការងារផ្ទាល់ខ្លួន ពិសេសការច្រៀងការ ដែលនាងមានក្រុមតន្ត្រីសម្រាប់លេងតាមពិធីមង្គល បុណ្យទាននានានោះ គឺមិនទាន់អាចដកខ្លួនទៅបានទេ។ "ឥឡូវនេះ ទៅណាមិនរួចទេ រដូវការមកដល់ទៀតហើយ អីចឹងដើរចោលមិនកើត ព្រោះយើងមានក្រុម មានសមាជិកច្រើន បើទៅចោលពួកគាត់ គឺមិនកើត អីចឹងមិនទាន់អាចទៅបានទេ!”។
សិល្បករពហុជំនាញប្រាប់ថា បន្ទាប់ពីផុតរដូវកាលការ ដែលរវល់ប៉ុន្មានខែនេះ នាងនឹងរៀបចំខ្លួនសម្រាប់បេសកកម្មបរទេស ដើម្បីជួបជុំបងប្អូននៅនាយសមុទ្រម្ដង៕
