- 2019-05-04 08:20:17
- ព័ត៌មាន
មកដល់កម្ពុជាលើកដំបូង ស្រីស្អាត ប្រុសស្អាតថៃ លើកម្នាក់១រឿងពីកម្ពុជា ដែលប្រិយមិត្តកម្រនឹងលឺ
- 2019-05-04 08:20:17
- ចំនួនមតិ 0 | ចំនួនចែករំលែក 0
មកដល់កម្ពុជាលើកដំបូង ស្រីស្អាត ប្រុសស្អាតថៃ លើកម្នាក់១រឿងពីកម្ពុជា ដែលប្រិយមិត្តកម្រនឹងលឺ
ចន្លោះមិនឃើញ
តារាស្រីស្រស់ ប្រុសសង្ហាថៃពីរដួង គឺលោក Sapol Assawamunkong ហៅ Great និងកញ្ញា Minnie Phantira Pipityakorn ហៅ Minnie នៅព្រឹកថ្ងៃនេះ ទើបបានមកដល់ប្រទេសកម្ពុជាលើកដំបូងជាទីដែលពួកគេ បានលើកចំណុចទាក់ទាញចិត្តរបស់ពួកគេរៀងខ្លួន។
ប្រុសស្អាត Great បានឲ្យដឹងថា ដំបូងបំផុត គឺលោករំភើបនឹងការស្វាគមន៍របស់អ្នកគាំទ្រកម្ពុជាចំពោះពួកលោក។ "ខ្ញុំមានអារម្មណ៍ភ្ញាក់ផ្អើលខ្លាំងណាស់ ហើយរំភើប...និយាយទៅខ្ញុំមិនដឹងថា យកពាក្យអ្វីដែលបង្ហាញអស់ពីអារម្មណ៍របស់ខ្ញុំនាពេលនេះ និយាយទៅកាន់អ្នកទាំងអស់គ្នា...មានតែពាក្យអរគុណ អរគុណមែនទែន"។ យ៉ាងណាក៏ដោយនៅមានចំណុចមួយផ្សេងទៀត ដែលធ្វើឲ្យលោកដិតជាប់ពីកម្ពុជា។
Great ថ្លែងថា តាំងពីដឹងក្ដីមក លោកធ្លាប់បានទស្សនាភាពយន្តមួយចំនួនរបស់កម្ពុជា ជាប្រភេទរឿងអភិនិហា ប៉ុន្តែលោកមិនបានចាំចំណងជើង។ ដូច្នេះហើយ ឲ្យតែនិយាយពីកម្ពុជា លោកនឹកឃើញពីរឿងប្រភេទសីលសាស្ត្រទាំងនោះ។
វិលមកស្រីស្អាតវ័យ ១៩ឆ្នាំ Minnie វិញ ថ្លែងថា នាងចាប់អារម្មណ៍តំបន់កម្សាន្តកម្ពុជា និងថៃ មានមួយចំនួនដូចគ្នា។ ប៉ុន្តែកញ្ញាមិនបានបញ្ជាក់ឡើយថា តំបន់កម្សាន្តណាខ្លះ ដែលកញ្ញាចាប់អារម្មណ៍ថាដូចគ្នានឹងតំបន់កម្សាន្តរបស់ប្រទេសកំណើតរបស់នាងឡើយ។ ចំណុចពិសេសមួយផ្សេងទៀត គឺនាងចាប់អារម្មណ៍ម្ហូបអាហារខ្មែរ ដែលនាងទើបបានសាកដំបូងបំផុតនៅថ្ងៃនេះ។ "ម្ហូបរបស់កម្ពុជាមានរសជាតិឆ្ងាញ់ ហើយមាន២មុខ ដែលខ្ញុំបានញុំានោះ គឺអាម៉ុក និងកកូរ...ទាំងពីរមុខនេះ គឺមានរសជាតិឆ្ងាញ់ ឆ្ងាញ់មែនទែន" Minnie ថ្លែងជាមួយនឹងកាយវិការលើកមេដៃផង។
Great និង Minnie គឺជាតួឯកប្រុសស្រី ក្នុងរឿង "និស្ស័យស្នេហ៍អាប" ដែលទើប និងបានចាក់បញ្ចាំងជូនប្រិយមិត្ត ក៏ដូចជាអ្នកគាំទ្ររបស់ពួកគេនៅកម្ពុជា បានទស្សនាកាលពីថ្ងៃទី ២ ឧសភា ២០១៩នេះ នៅរោងភាពយន្តទំនើបៗទាំងអស់ក្នុងរាជធានី។ ដូច្នេះហើយ បេសកកម្មលើកដំបូងរបស់ពួកគេមកកាន់កម្ពុជានៅថ្ងៃនេះ គឺដើម្បីផ្សព្វផ្សាយពីខ្សែភាពយន្តរបស់ពួកគេ។
Great ថ្លែងថា អ្វីដែលលោកចង់ប្រាប់ទៅអ្នកគាំទ្រនៅកម្ពុជានៅពេលនេះ គឺថារឿង "និស្ស័យស្នេហ៍អាប" របស់ពួកលោក គឺមានចំណុចខុសប្លែកច្រើន ទាំងការប្រើបច្ចេកទេសទំនើប ចុងក្រោយសម្រាប់កាត់ត ធ្វើឲ្យការសម្ដែងមើលទៅរស់រវើក។ ក្រៅពីនេះ សាច់រឿងនឹងបង្ហាញពីភាពខុសប្លែកពីរឿងមុនៗដែលប្រិយមិត្តធ្លាប់បានទស្សនា គឺឆ្លុះបង្ហាញពីសេចក្ដីស្នេហារបស់មនុស្ស ជាមួយនឹង "អាប"។
នៅសាច់រឿង Great សម្ដែងជាតួអង្គមានឈ្មោះ "ចឺត" ដោយឡែក Minnie សម្ដែងជាតួអង្គស្រីឈ្មោះ "សាយ"។ ដោយឡែកសាច់រឿងពីសេចក្ដីស្នេហារបស់រូបគេដែលជាមនុស្ស ជាមួយតួស្រីជា "អាប" មានដំណើរដើមទងយ៉ាងណានោះ គឺជាអ្វីដែលលោកចង់ឲ្យអ្នកគាំទ្រលោកទស្សនាទាំងអស់គ្នា។ "រឿងនេះ ទើបតែចាក់បញ្ចាំងនៅក្នុងប្រទេសថៃ បាន៣ថ្ងៃប៉ុណ្ណោះ មុនយកមកបញ្ចាំងនៅកម្ពុជា ដោយទទួលបានការគាំទ្រយ៉ាងច្រើន ហើយខ្ញុំសង្ឃឹមថា នឹងទទួលបានការគាំទ្រដូចគ្នានេះនៅកម្ពុជា"។ Great ថ្លែង។
ដោយសារនៅមានការច្រើននៅប្រទេសកំណើត តារាថៃទាំងពីរដួង បញ្ជាក់ថា លោកនឹងចាកចេញទៅវិញនៅយប់នេះដែរម្ដង។ យ៉ាងណា ក៏ដោយ Great ថា លោកនឹងរកឱកាសវិលមកកម្ពុជាបន្តបន្ទាប់ទៀតនៅពេលក្រោយ៕