- 2019-07-03 09:15:32
- ព័ត៌មាន
ប៊េនលី ម៉ាប់៖ ករណី ពេជ្រ ចរណៃ ខ្ញុំមិនដឹងទេ ប៉ុន្តែរឿងខ្ញុំ ពួកខ្ញុំត្រូវធ្ងន់ធ្ងរណាស់!
- 2019-07-03 09:15:32
- ចំនួនមតិ 0 | ចំនួនចែករំលែក 0
ប៊េនលី ម៉ាប់៖ ករណី ពេជ្រ ចរណៃ ខ្ញុំមិនដឹងទេ ប៉ុន្តែរឿងខ្ញុំ ពួកខ្ញុំត្រូវធ្ងន់ធ្ងរណាស់!
ចន្លោះមិនឃើញ
អ្នកដឹកនាំរឿង ប៊េនលី ម៉ាប់ បានអះអាងជាថ្មីអំពី ករណីពួកលោករងការវាយប្រហារពីក្រុមជនដៃដល់(ដំបូងលោកហៅថា ចោរ) មានគ្នា ៦នាក់នៅតំបន់ជ្រោយចង្វាកាលពីវេលាម៉ោង ២ រំលងអធ្រាត្រយប់ថ្ងៃទី១១ ឈានចូលថ្ងៃទី១២ មិថុនា ២០១៩ នោះថា គឺជាការពិត មិនមែនជាការថតសម្ដែងក្នុងភាពយន្ត ឬស្ប៉តពាណិជ្ជកម្មណាមួយនោះទេ។
ថ្លែងបែបនេះ បន្ទាប់ពីម្សិលមិញនេះ មានលេចធ្លាយរូបភាពតារាសម្ដែង ពេជ្រ ចរណៃ ដេកស្លាប់ដោយមានរុំកន្ទេលនៅម្ដុំមាត់ទន្លេនាតំបន់ជ្រោយចង្វា ដែលក្រោយមកគេដឹងថា គ្រាន់តែជាការសម្ដែងក្នុងខ្សែភាពយន្តមួយប៉ុណ្ណោះ។ ប៉ុន្តែមុននេះ រូបភាពនោះ ត្រូវបានសារព័ត៌មានមួយចំនួន បានយកទៅចុះផ្សាយ នាំឲ្យមានការយល់ច្រឡំខ្លះនៅមជ្ឈដ្ឋានសាធារណៈ។
ចៀសវាងការភ័ន្តច្រឡំនេះ ក្រុមប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ បានចេញសេចក្ដីស្រាយបំភ្លឺមួយកាលពីយប់មិញ ដោយបានអះអាង ក៏ដូចជាបញ្ជាក់ថា នេះមិនមែនជាការពិតទេ ពោលគឺករណីអំពីការស្លាប់របស់តារាសម្ដែងស្រី គ្រាន់ជាការសម្ដែងក្នុងខ្សែភាពយន្តប៉ុណ្ណោះ។ នៅក្នុងការស្រាយបំភ្លឺដដែល របាយការណ៍ក្រុមប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ ក៏បានភ្ជាប់សាច់រឿងរបស់ អ្នកដឹកនាំរឿង ប៊េនលី ម៉ាប់ ថាជារឿងមិនពិត ពោលគឺគ្រាន់តែជាសម្ដែងខ្សែភាពយន្តដូចគ្នាដែរ។
ក្រុមអ្នកថតភាពយន្តដែលរងការវាយប្រហារពិតប្រាកដ
ជុំវិញករណីនេះ លោក ប៊េនលី ម៉ាប់ បានច្រានចោល ដោយសារថា លោកបានរងការវាយប្រហារពីក្រុមជនសង្ស័យពិតប្រាកដមែន ពិសេសក្រុមរបស់លោក៣នាក់ បានរងរបួសធ្ងន់ធ្ងរពីការវាយប្រហារ ដេរ ២០-៣០ថ្នេរលើក្បាលទៀតផង។ លោកលើកឡើងថា "ករណី ពេជ្រ ចរណៃ ខ្ញុំមិនដឹងទេ ប៉ុន្តែរឿងពួកខ្ញុំ គឺពួកខ្ញុំត្រូវធ្ងន់ណាស់បង...ខ្ញុំដាច់រយះស្លឹកត្រចៀក ហើយក្បាលដេរជាង ២០ថ្នេរ កូនចៅខ្ញុំម្នាក់ជាង ៣០ថ្នេរ ព្រោះវាមករងជំនួសខ្ញុំ ឯម្នាក់ទៀតស្រាលជាងគេ តែសុទ្ធតែត្រូវក្បាលទាំងអស់!”។
បកទៅហេតុការណ៍កាលពីយប់ថ្ងៃទី ១១ ឆ្លងចូលទី ១២ មិថុនានោះ អ្នកដឹកនាំរឿងខាងលើបានរៀបរាប់ថា ដំបូងឡើយ បន្ទាប់ពីបញ្ចប់ការថតភាពយន្តពួកលោក ដែលមានគ្នា៥-៦នាក់ បានទៅអង្គុយលេង និងញុំាអីតាមទម្លាប់នៅម្ដុំរូបសំណាកស្រីគ្រប់លក់ និងរូបយុថ្កា ស្ថិតក្នុងភូមិសាស្ត្រតំបន់ជ្រោយចង្វាជាប់មាត់ទន្លេប៉ែកខាងកើត ព្រោះលោកក៏ជាអ្នកស្រុកនេះដែរ។ កំពុងតែញុំា ស្រាប់តែមានក្រុមជនសង្ស័យមួយក្រុម បានមកបើកការវាយប្រហារមកលើក្រុមរបស់លោកដោយមិនដឹងមូលហេតុ។
នៅក្នុងការវាយប្រហារភ្លាមនោះ លោកបានរងរបួសដោយការកាប់របស់ជនសង្ស័យមួយកាំបិតលើក្បាល ធ្វើឲ្យលោកដួលទៅលើដី មុនពេលលោកបានប្រឹងងើបមកប្រយុទ្ធតតាំងជាមួយក្រុមជនសង្ស័យវិញ។ លោកបញ្ជាក់ថា ក្រុមជនដៃដល់មានគ្នា ៦នាក់ ក្នុងនោះ ២នាក់នៅចាំម៉ូតូ និង៤នាក់បើកការវាយប្រហារមកលើពួកលោក ដោយមានដាវចំនួន ២ដើម និងខ្សែក្រវាត់។
ក្រោយពីទទួលការវាយបកពីក្រុមរបស់លោក ក្រុមជនដៃដល់បានដកថយ និងគេចខ្លួនអស់។ "នៅពេលនោះ បើសិនជាខ្ញុំមានកាំបិតក្នុងដៃ មិនដឹងមានអ្នកស្លាប់ប៉ុន្មាននាក់ទេ ព្រោះបងដឹងហើយ ក្បាលកំពុងតែហូរឈាម កំពុងតែខឹង...ម្ល៉េះរឿងរ៉ាវមិនដឹងនឹងធំប៉ុណ្ណា...ហើយពួកខ្ញុំវិញ ប្រសិនបើមិនមានអ្នកជួយទេ ម្ល៉េះពួកខ្ញុំក៏ប្រហែលងាប់អស់គ្មានសល់ដែរ!”។ លោក ម៉ាប់ បន្ថែម។
ក្រោយពីហេតុការណ៍ លោក ប៊េនលី ម៉ាប់ ក៏បានទៅដាក់បណ្ដឹងផ្ទាល់មាត់នៅសមត្ថកិច្ចមូលដ្ឋានសង្កាត់ជ្រោយចង្វា ដើម្បីឲ្យសមត្ថកិច្ចជួយរកយុត្តិធម៌ដោយវែកមុខជនដៃដល់មកទទួលទោសចំពោះមុខច្បាប់។
ចំពោះបញ្ហានេះ លោក ចាន់ ប៊ុនធឿន មេប៉ុស្តិ៍នគរបាលសង្កាត់ជ្រោយចង្វា បានបញ្ជាក់ថា លោកបានដឹងពីករណីខាងលើ យ៉ាងណាលោកមិនបានទទួលបណ្ដឹងណាមួយពីភាគីរងគ្រោះទេ។ "ខ្ញុំបានដឹងពីរឿងហ្នឹងតាមរយៈព័ត៌មាន តែខ្ញុំមិនបានទទួលពាក្យបណ្ដឹងណាមួយពីភាគីដើមបណ្ដឹងទេ បើមានពាក្យបណ្ដឹង អាហ្នឹងគឺយើងចុះធ្វើការស្រាវជ្រាវអីអីចឹងទៅ ដល់អត់បណ្ដឹងយើងធ្វើម៉េចកើត!”។
ងាកមកភាគីអ្នកដឹកនាំរឿងរងគ្រោះ ប៊េនលី ម៉ាប់ វិញ បានសង្កត់ធ្ងន់ថា លោកពិតជាមិនបានដាក់ពាក្យបណ្ដឹងជាលាយលក្ខណ៍អក្សរពិតមែន ប៉ុន្តែបានទូរស័ព្ទប្ដឹងផ្ទាល់មាត់។ យ៉ាងណាលោកថា សមត្ថកិច្ចឆ្លើយបែបនេះ ក៏មិនខុសដែរ ព្រោះថា សមត្ថកិច្ចធ្វើការដោយផ្អែកទៅឯកសារបណ្ដឹង ឬពាក្យបណ្ដឹងជាលាយលក្ខណ៍អក្សរ។
ដោយសារមិនបានទទួលរបាយការណ៍ណាមួយលើករណីខាងលើ ពីសមត្ថកិច្ចមូលដ្ឋាន នៅយប់មិញក្រុមប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ បានចេញសេចក្ដីស្រាយបំភ្លឺថា ករណីរបស់លោក ប៊េនលី ម៉ាប់ និងករណី ពេជ្រ ចរណៃ ត្រូវការសម្លាប់ថា ព័ត៌មានមិនពិត។ យ៉ាងណា អ្នកដឹកនាំរឿងខាងលើ នៅតែបញ្ជាក់ជាថ្មីថា ករណីរបស់លោក គឺជាសាច់រឿងពិត មិនមែនជាការសម្ដែងដូចករណីមួយផ្សេងទៀតរបស់តារាសម្ដែងស្រីឡើយ។ ប៉ុន្តែគ្រាន់តែលោកមិនបានដាក់ពាក្យបណ្ដឹងជាលាយលក្ខណ៍ ដើម្បីទុនសម្រាប់សមត្ថកិច្ចបន្តនីតិវិធីប៉ុណ្ណោះ។
លោក ម៉ាប់ បន្តថា លោកសម្រេចថា បញ្ចប់ត្រឹមនេះ ជៀសវាងអ្វីៗកាន់តែអូសបន្លាយ នាំឲ្យខាតពេល ស្របពេលលោក កំពុងជាប់មមាញឹកថតបញ្ចប់រឿងឲ្យស្ថានីយទូរទស្សន៍ធំមួយផង៕