Chris Brown ត្រូវប៉ូលិសចាប់ខ្លួន បន្ទាប់ពីយកកាំភ្លើងភ្ជង់ក្បាលគំរាមនារីម្នាក់
តារាចម្រៀងអាមេរិក Chris Brownត្រូវបានប៉ូលិសព័ទ្ធផ្ទះចាប់ខ្លួនកាលពីម្សិលមិញ ក្រោយសង្ស័យមានអាវុធខុសច្បាប់ បន្ទាប់ពីមាននារីម្នាក់បានទូរសព្ទទៅប៉ូលិសថា តារារូបនេះយកកាំភ្លើងភ្ជង់គំរាមនាង។
Baylee Curran ដែលជានារីទូរសព្ទទៅប្ដឹងប៉ូលិសបានប្រាប់ LA Times ថា Brown បានទាញកាំភ្លើងភ្ជង់ចំមុខរបស់នាង បន្ទាប់នាងបានសរសើរគ្រឿងអលង្ការរបស់មិត្តBrown ម្នាក់។ យ៉ាងណាមិញមុនប៉ូលិសចាប់ខ្លួន Chris បានបង្ហោះវីដេអូលើបណ្ដាញ instagram ដោយនិយាយថាខ្លួនគ្មានកំហុសទេ។
ក្រោយទទួលបានការប្ដឹងបែបនេះ ប៉ូលិសបានចុះទៅព័ទ្ធផ្ទះរបស់ម្ចាស់បទ "Loyal” ភ្លាមៗ។ ដោយគ្មានការតបតអ្វី Chris បានដើរចេញពីក្នុងផ្ទះដោយខ្លួនឯង ប្រគល់ខ្លួនឲ្យប៉ូលិសចាប់តាមសម្រួល ដើម្បីយកទៅសាកសួរ។ យោងតាម TMZ ឲ្យដឹងថា អតីតមិត្តប្រុសRihanna បានគ្រវែងកាបូបមួយចេញតាមបង្អួចផ្ទះ បន្ទាប់ពីប៉ូលិសគំរាមបាញ់ ដោយក្នុងកាបូបនេះមាន កាំភ្លើងមួយចំនួននិងថ្នាំញៀនទៀតផង។
តាមសម្ដីរបស់ Bayleeនារីរងគ្រោះបានឲ្យដឹងថា នាងនិងមិត្តភ័ក្ដិបានទៅផ្ទះរបស់ Brown នៅតំបន់ Tarzana រដ្ឋ California ជាមួយសហការីពាណិជ្ជកម្មម្នាក់ កាលពីល្ងាចថ្ងៃច័ន្ទ។ នាងបាននិយាយសរសើរខ្សែកពេជ្របុរសម្នាក់ដែលនៅក្នុងផ្ទះBrown នៅពេលនោះ Brown ខឹងយ៉ាងខ្លាំងហើយក៏បានទាញកាំភ្លើងភ្ជង់ និងដេញនាងចេញទៅក្រៅផ្ទះ។ ក្រោយចាកចេញ នាងក៏បានទូរសព្ទប្ដឹងប៉ូលិសតែម្ដង។
យ៉ាងណាក្ដីអ្វីៗមិនទាន់ច្បាស់ ខណៈប៉ូលិសកំពុងនាំខ្លួនទាំងជនសង្ស័យ Brown និងរងគ្រោះ Baylee រួមទាំងសាក្សីនៅកន្លែងកើតហេតុផ្សេងមកសាកសួរ ដើម្បីរកឲ្យឃើញនូវការពិត៕
ប្រែសម្រួល៖ ហេង សុធារិទ្ធិ
ប្រភព៖ bbc
