តាមបានដឹង! ផាន់ ផាត់ណា មានតែម្នាក់ឯងម៉ង់ៗ ក្នុងភាពយន្តខ្នាតធំរបស់ផលិតករចិន

2018-09-12 03:55:08
ព័ត៌មាន

2018-09-12 03:55:08
ចំនួនមតិ 0 | ចំនួនចែករំលែក 0

ចន្លោះមិនឃើញ

បោះមួយជំហានទៀត ក្រោយពីមានការចាប់អារម្មណ៍ក្នុងរឿង "ស្រទន់មន្តស្នេហ៍" ផាន់ ផាត់ណា បានចូលរួមសម្តែងជាតួឯកក្នុងរឿងខ្នាតធំ របស់ផលិតករចិន ក្នុងនាមជាតារាស្រីតែម្នាក់គត់ប៉ុណ្ណោះទៅពីកម្ពុជា។

រឿងនោះមានចំណងជើងថា “ពន្លកស្នេហ៍រីកលើដីកម្ពុជា” ដែលត្រូវបានប្រកាសវិនិយោគជាមួយទុនប្រមាណ ២លានដុល្លារឯណោះ។ តាមការបញ្ជាក់របស់សាមីខ្លួន រឿងនេះ នាងសម្ដែងជាមួយតួឯកប្រុសជនជាតិចិនមានឈ្មោះ Sunxu Bo។ ក្រៅពីនេះ តួសម្ដែងផ្សេងៗ ក្រុមផលិតរួមមានអ្នកនិពន្ធ អ្នកដឹកជាដើមសុទ្ធជាជនជាតិចិន។ "និយាយទៅ តារាស្រីខ្មែរមានតែខ្ញុំម្នាក់ឯងហ្នឹង តែបើនិយាយពីតារាខ្មែរក្នុងរឿងនេះហ្មង មាន២នាក់ គឺខ្ញុំ និងប្អូនប្រុស Ricky ក្រៅពីនេះចិនទាំងអស់"។

ដោយសារតែក្រុមការងារផលិតសុទ្ធជាជនជាតិចិន រាល់ការទំនាក់ទំនងការងារផ្សេងៗ គឺត្រូវឆ្លងកាត់បុគ្គលទី៣ ដើម្បីបកប្រែ និងសម្របសម្រួល។ យ៉ាងណាតួស្រី ដាអ៊ីណា ក្នុងរឿង "ស្រទន់មន្តស្នេហ៍" បញ្ជាក់ថា នេះមិនជាឧបសគ្គសម្រាប់នាង រួមទាំងក្រុមការងារទាំងមូលឡើយ។ ម្យ៉ាង នេះក៏មិនមែនជាលើកទី១ដែរ ដែលនាងបានជួបធ្វើជាមួយក្រុមផលិតបរទេសមួយនេះ។

ផាន់ ផាត់ណា និងតួប្រុសជនជាតិចិន Sunxu Bo ក្នុងរឿង “ពន្លកស្នេហ៍រីកលើដីកម្ពុជា”

“ខ្ញុំធ្លាប់បានចូលរួមសម្ដែងជាមួយពួកគាត់មួយរឿងរួចហើយ តែមិនចាំចំណងជើង...កាលនោះ ខ្ញុំមិនមែនជាតួឯកទេ ហើយកាលរឿងទី១នោះ គេអត់សូវប្រូម៉ូតខ្លាំងទេ តែរឿងទី២ ដែលខ្ញុំដើរជាតួឯកនេះ គេប្រូម៉ូតខ្លាំងណាស់...!”។

“ពន្លកស្នេហ៍រីកលើដីកម្ពុជា” ត្រូវបានប្រកាសផលិតដោយក្រុមហ៊ុនរៀលអ៊ីស្តេតមួយ ដើម្បីរឹតចំណងទាក់ទង និងអបអរខួប៦០ឆ្នាំនៃកិច្ចសហការកម្ពុជា-ចិន ក្នុងគោលបំណងផ្លាស់ប្ដូរវប្បធម៌ប្រពៃណីគ្នាទៅវិញទៅមក។ ដូច្នេះហើយ ទើបក្រុមការងារ បានជ្រើសរើសកញ្ញា ផាន់ ផាត់ណា ដែលជាតារាស្រីតែម្នាក់របស់កម្ពុជា សម្ដែងជាមួយតួឯកប្រុសជាជនជាតិចិន។

សាច់រឿងនិយាយពីចំណងស្នេហ៍រវាងបុរសវិស្វករជនជាតិចិន និងនារីខ្មែរ។ រឿងនេះ គ្រោងនឹងចេញថតនៅក្នុងខែតុលាខាងមុខ ដោយបានកំណត់យកតំបន់ខ្លះនៃប្រទេសទាំងពីរ គឺកម្ពុជា និង ចិន ជាទីសំចតថតសាច់រឿងទាំងមូល។ នៅកម្ពុជា មាន ទីក្រុងភ្នំពេញ ខេត្តសៀមរាប ភ្នំបូកគោ និងកោះរ៉ុង។ ចំណែកឯទីតាំងថតក្នុងប្រទេសចិនវិញត្រូវបានជ្រើសរើសខេត្ត Teng chongសង្កាត់ Qiao Xiang ក្រុង Kun Ming ខេត្ត អ៊ីនណាន។

កញ្ញា ផាន់ ផាត់ណា ជាតួឯកស្រី បញ្ជាក់ថា រឿងនេះ ក្រោយថតចប់ និងត្រូវបញ្ចាំងនៅកម្ពុជាផង និងនៅប្រទេសចិនផង៕

អត្ថបទ៖ ទារិកា