អ្នកដឹកនាំរឿងធ្លាប់ធ្វើការជាមួយ Angelina Jolie រៀបរាប់ពីបទពិសោធន៍ការងារ និងតួនាទីស្ត្រីក្នុងវិស័យភាពយន្ត

ព្រហស្បតិ៍, 25 តុលា 2018 07:29
ព័ត៌មាន

ព្រហស្បតិ៍, 25 តុលា 2018 07:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ផលិតករនិងអ្នកដឹកនាំរឿង ដ៏មានទេពកោសល្យអ្នកស្រី សួង ស៊ីណា ទើបតែបានជួបសម្ភាសជាមួយ Sabay ថ្មីៗនេះ ដោយបាននិយាយរៀបរាប់ពីបទពិសោធន៍ការងារ ព្រមទាំងបញ្ជាក់ពីតួនាទីស្ត្រីក្នុងវិស័យភាពយន្ត។

អ្នកដឹកនាំរឿង "ប្រអប់សំបុត្រចោលទុក្ខ" បាននិយាយថា ខ្លួនបានចាប់ផ្ដើមអាជីពពីអ្នកធ្វើការនៅក្រុមហ៊ុនផ្សព្វផ្សាយពាណិជ្ជកម្ម រហូតដល់បានឱកាសទៅសិក្សាវគ្គខ្លីពាក់ព័ន្ធនឹងភាពយន្តនៅប្រទេសអង់គ្លេស ទើបចាប់ផ្ដើមប្រឡូកជាមួយអាជីពជាអ្នកដឹកនាំនិងផលិតភាពយន្ត។ ជុំវិញបទពិសោធន៍ពាក់ព័ន្ធនឹងវិស័យនេះ អ្នកស្រីក៏មានឱកាសបានធ្វើការជាមួយតារាហូលីវូដ Angelina Jolie ដើម្បីផលិតភាពយន្ត "មុនដំបូងខ្មែរក្រហមសម្លាប់ប៉ាខ្ញុំ" ដោយបានធ្វើជាជំនួយការទី៣។

តាមរយៈកិច្ចការនេះ អ្នកស្រីទទួលបានបទពិសោធន៍ជាច្រើន ព្រមទាំងអាចយកចំណេះដឹងទាំងនោះមកប្រើប្រាស់នៅក្នុងគម្រោងភាពយន្តថ្មីៗក្នុងស្រុកផងដែរ។ បទពិសោធន៍ដ៏សំខាន់មួយ ដែលទទួលបានតាមរយៈការចូលរួមធ្វើការក្នុងភាពយន្តកម្រិតស្តង់ដារហូលីវូដ នោះគឺការគ្រប់គ្រងតួរាយរង (Extra) ដល់ទៅខ្ទង់រាប់រយនាក់ ដោយពួកគេសុទ្ធតែមិនមានបទពិសោធន៍ក្នុងការសម្ដែងពីមុនមកទាល់តែសោះ រាប់បញ្ចូលមិនថាទាំងបណ្ដាក្មេងៗអាយុ ៤ឬ៥ឆ្នាំ ឬចាស់ៗមានអាយុខ្ទង់៤០ទៅ៥០ឆ្នាំ។ អ្វីដែលគួរឲ្យចាប់អារម្មណ៍បំផុតនោះគឺ អ្នកស្រីបានលើកយកពីបច្ចេកទេសដឹកនាំរឿងរបស់ Angelina Jolie ដែលតម្រូវឲ្យមានចំណុចពីរសំខាន់ៗនិងចាំបាច់នោះគឺភាសាកាយវិការអារម្មណ៍និងកែវភ្នែក។

ថ្លែងរៀបរាប់ជុំវិញបញ្ហាតួនាទីស្រ្ដីក្នុងវិស័យភាពយន្ត ផលិតកររូបនេះបាននិយាយថា វាពិតជាល្អបើសិនជាមានអ្នកដឹកនាំរឿងនិងផលិតករជានារីកាន់តែច្រើន ព្រោះអ្នកដឹកនាំនារីអាចបង្កឲ្យមានលក្ខណៈងាយស្រួលយ៉ាងច្រើននិងជិតស្និទ្ធក្នុងការធ្វើការជាមួយតួសម្ដែង ជាជាងអ្នកដឹកនាំបុរសព្រោះតែភាពហ្មត់ចត់និងទន់ភ្លន់។ ឆ្លើយតបទៅកាន់កត្តាផ្សេងៗដែលធ្វើឲ្យវិស័យភាពយន្តខ្មែរកាន់តែរីកចម្រើន អ្នកស្រីបានបញ្ជាក់ថា ទាំងអ្នកដឹកនាំរឿង អ្នកនិពន្ធ តួសម្ដែងនិងក្រុមការងារ ជាពិសេសគឺអ្នកឧបត្ថម្ភ (Sponsored) វិស័យនេះដូចជាទូរទស្សន៍និងភាគីពាក់ព័ន្ធជាដើម គួរតែសហការជាមួយគ្នា ជាពិសេសគឺអ្នកគាំទ្រទស្សនា។

បើចង់ដឹងកាន់តែច្បាស់ ទស្សនាវីដេអូសម្ភាសន៍ខាងក្រោម៖

អត្ថបទ៖ ធារ៉ូ