មើលឲ្យជាក់ សម្ផស្សបេក្ខភាព ស្រីស្អាត ប្រុសស្អាត ជំនាន់ទី១៨

2019-03-26 10:49:15
ព័ត៌មាន

2019-03-26 10:49:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ភ្លេចៗខ្លួន កម្មវិធីប្រឡងជ្រើសរើសស្រីស្អាត ប្រុសស្អាតប្រចាំឆ្នាំហៅថា “Freshie Girls & Boys” បានដំណើរការ រ១៧ ជំនាន់កន្លងមកហើយ ហើយនៅថ្ងៃនេះ កម្មវិធីបានប្រកាសឈានជើងចូលជំនាន់ទី១៨ ទៀត ជាមួយការបង្ហាញជូនបេក្ខជន បេក្ខនារីចុងក្រោយចំនួន ៣៦រូប(បេក្ខជន ១៨ បេក្ខនារី ១៨រូប)។

បេក្ខជន បេក្ខនារីទាំងអស់ គឺជាបេក្ខភាពចម្រាញ់វគ្គចុងក្រោយ ចេញពីអ្នកដាក់ពាក្យសរុបប្រមាណជាង ៣ពាន់នាក់ មកពីទូទាំងប្រទេសដែលបានដាក់ពាក្យចូលរួមប្រកួតក្នុងកម្មវិធី។ នេះបើតាមម្ចាស់កម្មវិធីបានបញ្ជាក់។

លោក មែ វិចិត្របុត្រ នាយកចាត់ការទូទៅ ក្រុមហ៊ុន BKA Entertainment ដែលជាអ្នករៀបចំកម្មវិធីបានឲ្យដឹងថា អ្វីៗមិនទាន់ចប់ត្រឹមប៉ុណ្ណេះទេ ពោលគឺពួកគេទាំង ៣៦ នៅមានការប្រឡងប្រជែងកាន់តែតែងជាងមុនទៅទៀតនៅពេលខាងមុខ នៅក្នុងការប្រឡងប្រជែងមួយដែលមានការផ្សាយផ្ទាល់តាមរយៈកញ្ចក់ទូរទស្សន៍ MyTV ផងដើម្បីឆ្ពោះទៅកាន់ជយលាភី។

តាមផែនការ កម្មវិធីប្រកួតប្រជែងនេះ គ្រោងចាប់ផ្ដើមការប្រកួតសប្ដាហ៍ទី១របស់ខ្លួន នៅថ្ងៃព្រហស្បតិ៍ ទី ២៨ខាងមុខ។ លោក ប៊ុនកើដ អគ្គនាយកក្រុមហ៊ុន បានឲ្យដឹងថា លោកមានក្ដីសោមនស្សរីករាយណាស់ ដែលអាចនាំយកកម្មវិធីបន្តដល់ឆ្នាំទី ១៨នេះ។ អគ្គនាយកជនជាតិថៃរូបនេះ បញ្ជាក់ថា លោកចង់ប្រើកម្មវិធីនេះ ទុកជាកន្លែងសម្រាប់ផ្ដល់ឲ្យយុវវ័យកម្ពុជាបានបញ្ចេញសមត្ថភាព បណ្ដុះទេពកោសល្យ និងសម្រេចក្ដីសុបិនចង់ក្លាយជាសិល្បករ។

ដូចគ្នាដែរ គឺចង់បញ្ចៀសពួកគេពីការបណ្ដោយខ្លួនឲ្យធ្លាក់ខ្លួនក្នុងអំពើអបាយមុខផ្សេង។ ដូច្នេះជាមួយគ្នា លោកស្នើបេក្ខភាពទាំងអស់ បន្តការសិក្សាឲ្យបានទៀងទាត់ និងប្រើប្រាស់ត្រឹមពេលវេលាក្រៅពីម៉ោងបានហើយ សម្រាប់ការប្រកួតប្រជែងក្នុងកម្មវិធី។ តាមការបញ្ជាក់ពីអគ្គនាយកដដែលបានឲ្យដឹងថា បេក្ខនារី ១០រូប បេក្ខជន ១០រូប នឹងត្រូវរើសសម្រាប់ដំណើរទស្សនកិច្ចសិក្សារយៈពេល ៥ថ្ងៃទៅកាន់ប្រទេសថៃនាពេលខាងមុខ។

ការប្រកួតនឹងចាប់ផ្ដើមនៅពាក់កណ្ដាលសប្ដាហ៍នេះហើយ ប៉ុន្តែឥឡូវតោះ...មកមើលសម្ផស្ស របស់បេក្ខភាពត្រួសទាំងអស់គ្នាសិន!