![](http://cdn.sabay.com/cdn/media.sabay.com/media/sabay-news/Ent-Int/Korea/Korean-115/5e0d66bf46634_1577936520_medium.jpg)
- 2020-01-02 03:46:30
- ព័ត៌មាន
ក្នុងឆ្នាំ ២០២០ តើតារាប្រុសណាខ្លះនឹងបញ្ចប់កាតព្វកិច្ចផ្លូវការចេញពីជួរទាហាន?
- 2020-01-02 03:46:30
- ចំនួនមតិ 0 | ចំនួនចែករំលែក 0
ក្នុងឆ្នាំ ២០២០ តើតារាប្រុសណាខ្លះនឹងបញ្ចប់កាតព្វកិច្ចផ្លូវការចេញពីជួរទាហាន?
ចន្លោះមិនឃើញ
បើគិតៗទៅរយៈពេល ២ឆ្នាំពិតជាកន្លងផុតទៅលឿនមែនទែន ដូចតារាប្រុស K-Pop ទាំងនេះជាដើម បន្ទាប់ពីលាអ្នកគាំទ្រចូលបំពេញកាតព្វកិច្ចក្នុងជួរទាហានមួយរយៈធំ មិនយូរមិនឆាប់ពួកគេនឹងវិលមករកវិញហើយ។
ឆ្នាំ ២០២០នេះអាចជាឆ្នាំរំភើបមួយទៀតហើយសម្រាប់អ្នកស្នេហាវិស័យ K-Pop ពិសេសអ្នកដែលមានតារាក្នុងដួងចិត្តចូលបំពេញកាតព្វកិច្ចក្នុងជួរទាហានគ្រប់ ២ឆ្នាំគិតត្រឹមឆ្នាំនេះ ព្រោះថាតារាប្រុសទាំងនោះនឹងបញ្ចប់កាតព្វកិច្ចសំខាន់នេះចប់ជាស្ថាពរក្នុងពេលឆាប់ៗ។ ដូចនេះសូមមកដឹងថាមានអ្នកណាខ្លះ ហើយពួកគេចេញពីទាហាននៅថ្ងៃណា ខែណា?
១. Sunggyu
Sunggyu (មេក្រុម INFINITE) នឹងក្លាយជាតារាប្រុសដំបូងដែលនឹងបញ្ចប់តួនាទីពីជួរកងទ័ពមុនគេ មានន័យថានៅថ្ងៃទី ០៨ ខែមករា ឆ្នាំ ២០២០។ ជាក់ស្ដែង Sunggyu បានចូលបម្រើការងារនេះតាំងពីខែឧសភា ឆ្នាំ ២០១៨។
២. Wooyoung
នៅ ថ្ងៃទី ២៨ ខែកុម្ភៈ Wooyoung សមាជិកក្រុម 2PM នឹងចេញពីទាហាន បញ្ចប់តួនាទីនេះជាផ្លូវការ។ ចង់ដឹងថាវិលចូលសិល្បៈវិញ លោកនឹងមានអ្វីបង្ហាញ ក៏ដូចជាស្វាគមន៍អ្នកគាំទ្រ រង់ចាំមើលទាំងអស់គ្នា។
៣. Jo Kwon
ខែនេះក៏ជាពេលដែល តារាប្រុសក្រមិចក្រមើម Jo Kwon នឹងត្រឡប់ពីបម្រើទាហានវិញ គឺនៅថ្ងៃទី ២៤ ខែមីនា ឆ្នាំ ២០២០។
៤. Eunkwang
មេក្រុម BTOB គឺ Eunkwang ក៏នឹងដល់ពេលវិលមករកអ្នកគាំទ្រវិញដែរនៅថ្ងៃទី ០៧ ខែមេសា។ អ្វីដែលចាំមិនភ្លេច ពេលលាចូលទាហាន លោកបានធ្វើឲ្យគ្រប់គ្នា ក្ដុកក្ដួលណាស់រហូតយំទាំងសមាជិករួមក្រុម និងអ្នកគាំទ្រអំឡុងពេលប្រគំតន្ត្រីទេសចរណ៍របស់ក្រុម។
៥. Doojoon
មេក្រុម HIGHLIGHT ក៏ជាអ្នកដែលត្រូវចប់តួនាទីនៅខែមេសាដែរ ប៉ុន្តែថ្ងៃទី ១០។ អ្នកគាំទ្រទាំងអស់ពិតជារំភើប និងបន់ឲ្យថ្ងៃនោះមកដល់ឆាប់ៗបំផុត ព្រោះពួកគេចង់ឃើញស្នាដៃថ្មីៗរបស់ Doojoon ជាបន្ត។
៦. Onew
ឈានចូលដល់ថ្ងៃទី ២០ ខែកក្កដា ក៏ដល់វេនរបស់ Onew មេក្រុម SHINee បញ្ចប់កាតព្វកិច្ចសំខាន់របស់ខ្លួនដែរ។ ដំណឹងនេះមិនអាច ទប់អារម្មណ៍របស់អ្នកគាំទ្រមិនឲ្យរំភើបមិនបានទេ។
៧. Changsub
សមាជិក BTOB ម្នាក់ទៀតហើយដែលត្រូវចប់ភារកិច្ចដូចគ្នាគឺ Changsub។ ថ្ងៃកំណត់គឺចំថ្ងៃទី ២១ ខែសីហា ឆ្នាំ ២០២០។
៨. Yoseob
ខែសីហាក៏នៅមាន តារាប្រុសម្នាក់ទៀតដែរនោះគឺ Yoseob សមាជិកក្រុម HIGHLIGHT ដែលត្រូវវិលមកជួបអ្នកគាំទ្រវិញនៅថ្ងៃទី ៣០ ខែសីហា បន្ទាប់ពីចេញទៅបម្រើជាតិរយៈជាង ២ឆ្នាំ។
៩. Minhyuk
សមាជិកក្រុម BTOB ម្នាក់ទៀតដែលនឹងវិលទៅរកក្រុមវិញ គឺ Minhyuk។ លោកនឹងបញ្ចប់នៅថ្ងៃទី ១២ ខែកញ្ញា ហើយអ្នកគាំទ្រកំពុងតែទន្ទឹងរង់ចាំថ្ងៃនោះ បន់ឲ្យមកដល់ឆាប់ៗទៀតផង។
១០. Key
សមាជិក SHINee រូបនេះក៏ជិតដល់ពេលលាមូលដ្ឋានទាហាននៅថ្ងៃទី ០៧ ខែតុលាខាងមុខដែរ ក្រោយបំពេញកាតព្វកិច្ចពេញលេញក្នុងនាមជាបុរសកូរ៉េ។ ជាក់ស្ដែងបើទោះចូលក្នុងជួរទាហាន ក៏លោកមិនទៅណាឆ្ងាយពីវិស័យនេះដែរ ដោយបានឡើងសម្ដែងជាបន្តបន្ទាប់ក្នុងកម្មវិធីរបស់ទ័ព។
១១. N
សមាជិករាងខ្ពស់សង្ហារបស់ VIXX ក៏ត្រូវចេញថ្ងៃតែមួយជាមួយនឹង Key ដែរគឺនៅថ្ងៃ ០៧ ខែតុលា។
១២. Jaehyo
ឈានចូលដល់ថ្ងៃទី ២២ ខែតុលាដដែល Jaehyo សមាជិកក្រុម Block B។ ស្ថិតក្នុងជួរកងទ័ពមិនមែនជារឿងងាយស្រួលទេ ដូចនេះអ្នកគាំទ្រក៏ជូនពរសូមឲ្យការវិលមកវិញរបស់លោកមានសុវត្ថិភាព។
១៣. Sungyeol
នៅថ្ងៃទី ២៧ ខែតុលា មិនមានតារាប្រុសម្នាក់ទៀតដែលរបស់ INFINITE គឺ Sungyeol ដែលនឹងបញ្ចប់កិច្ចការនេះដូចគ្នា។
១៤. Minho
សម្រាប់ Minho សមាជិកខ្ពស់ជាងគេប្រចាំ SHINee វិញនឹងវិលវិញនៅថ្ងៃទី ១៥ ខែវិច្ឆិកា ហើយក៏នឹងវិលចូលលសិល្បៈវិញជាប្រាកដមកជួបអ្នកគាំទ្រ។
១៥. Dongwoo
Dongwooសមាជិករបស់ INFINTE ម្នាក់ទៀតហើយក៏ត្រូវចប់ភារកិច្ចដូចគ្នា គឺនៅថ្ងៃទី ១៥ ខែវិច្ឆិកា។
១៦. Kikwang
រីឯតារាប្រុសរបស់ HIGHLIGHT Kikwang វិញដល់ថ្ងៃចេញនៅថ្ងៃទី ១៨ ខែវិច្ឆិកា ក្រោយពីចូលដំបូងនៅខែមេសា ឆ្នាំ២០១៨។
១៧. Xiumin
សម្រាប់ថ្ងៃកំណត់បញ្ចប់កាតព្វកិច្ចរបស់បងប្រុសធំមុខក្មេងជាងគេរបស់ EXO ឯណេះវិញ គឺនៅថ្ងៃទី ០៦ ខែធ្នូ ហើយពេលនោះហើយជាពេលដែលអ្នកគាំទ្រលោកទាំងអស់ អស់បារម្ភពីសុខទុក្ខលោកក្នុងជួរទាហាន។
១៨. Dongwoon
កូនពៅ HIGHLIGHT វិញនឹងចេញនៅថ្ងៃទី ០៨ ខែធ្នូ ដូចនេះពេលនោះក៏បានសេចក្ដីថាសមាជិកទាំងអស់របស់ក្រុមនេះជុំគ្នាអស់ហើយ។
១៩. Yoon Ji Sung
ចុងក្រោយគឺ Ji Sung តារាប្រុស K-Pop ដែលនឹងបញ្ចប់កាតព្វកិច្ចសំខាន់បំផុតជូនជាតិនៅឆ្នាំ ២០២០ គឹនៅថ្ងៃទី ១៣ ខែធ្នូ។ ចប់ពីនេះ ច្បាស់ណាស់លោកនឹងវិលចូលសិល្បៈវិញមិនឲ្យអ្នកគាំទ្រខកចិត្តឡើយ៕