ទីបំផុតស្រីស្អាត ម៉េង យៀកលី បញ្ចប់ជីវភាពខ្លួនមួយត្រឹមយប់មិញក្រោមវត្តមានភ្ញៀវជាង ១០០តុ

2020-02-03 08:22:31
ព័ត៌មាន

2020-02-03 08:22:31
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងដ៏ស្រស់ស្អាត ម៉េង យៀកលី ដែលបានស្ងាត់ពីសិល្បៈមួយរយៈនោះ ទីបំផុតបានចូលរោងការហើយជាមួយនឹងបុរសវ័យកណ្ដាលក្រៅរង្វង់សិល្បៈម្នាក់ ក្រោមវត្តមានភ្ញៀវកិត្តិយសយ៉ាងដល់ទៅជាង ១០០តុឯណោះ។

ពិធីនេះ បានបញ្ចប់ព័ត៌មានចចាមអារ៉ាម ដែលមុននេះ តារាស្រីគេសង្ស័យបានភ្ជាប់ពាក្យស្ងាត់ៗជាមួយបុរសក្រៅរង្វង់សិល្បៈម្នាក់ ក្រោយពីបានបន្សាត់ខ្លួនឆ្ងាយពីសិល្បៈមួយរយៈធំ។ តាមព័ត៌មានកន្លងមក យៀកលី បានភ្ជាប់ទំនាក់ទំនងស្នេហាជាមួយបុរសវ័យកណ្ដាលម្នាក់ និងថែមទាំងបានភ្ជាប់ពាក្យជាមួយគ្នាថែមទៀត អំឡុងឆ្នាំ ២០១៨ ហើយថា បុរសរូបនោះ គឺជាអតីតថ្នាក់លើរបស់នាងនៅក្នុងក្រុមហ៊ុនលក់ផលិតផលបំប៉នសុខភាពមួយ។

ក្រោយរោងចូលរោងការនៅយប់មិញនេះ យៀកលី បានសារភាពថា ព័ត៌មានចចាមអារ៉ាមនោះ ជាការពិត ពោលគឺនាងមានទំនាក់ទំនងស្នេហា និងបានភ្ជាប់ពាក្យពិតមែនកាលពីគ្រានោះ។ អតីតស្រីស្អាតលេខ២ក្នុងកម្មវិធី Freshie Girls & Boys ២០១៥ បញ្ជាក់ថា បុរសដែលមានចចាមអារ៉ាមជាមួយនាងកាលពីអតីតកាល គឺជាស្វាមីរបស់នាងដែលក្រាបផ្ទឹមជាមួយគ្នានាថ្ងៃម្សិលមិញនេះឯង។

ស្វាមីរបស់ ម៉េង យៀកលី ត្រូវបានគេស្គាល់ថាឈ្មោះ ចន ប្រុស ជាថ្នាក់ដឹកនាំក្រុមហ៊ុនលក់ និងចែកចាយផលិតផលថែរក្សាសម្រស់មួយដែលផលិតផលនោះ មានកញ្ញា ផេនខេក តារាល្បីរបស់ថៃជាម្ចាស់។ ត្បិតថា ពួកគេបានស្គាល់ និងទាក់ទងគ្នាអំឡុងពេលរួមការងារជាមួយគ្នា តាមភាគីខាងស្រីបង្ហើបថា តាមពិតទៅ គឺពួកនាងបានស្គាល់តាំងពីអំឡុងនាងរៀនចំណេះទូទៅថ្នាក់ទី ១១ ម្ល៉េះ។

យៀកលី បានសរសើរស្វាមីថា ជាមនុស្សពូកែលើកទឹកចិត្ត ធ្វើឲ្យអ្នកនៅជុំវិញខ្លួនមានទំនុកចិត្តជាមួយអត្តចរិត និងប្រសិទ្ធភាពនៃការធ្វើការងារ។ ដោយឡែកលោក ចន ប្រុស វិញក៏បានឲ្យដឹងនៅលើវេទិកានៃកម្មវិធីរបស់ពួកលោកដែរថា ភរិយារបស់លោក ចំណុចជាច្រើនទៀត ដែលគួរឲ្យស្រឡាញ់ ក្រៅតែពីមានសម្រស់ស្រស់ផូរផង់ដែលគ្រប់គ្នាអាចក៏អាចមើលឃើញនោះ។

ម៉េង យៀកលី គឺជាប្រជាពលរដ្ឋមកពីប៉ោយប៉ែត ដែលមានកំណើតកើតជា និងធំធាត់នៅទីនោះ។ ដូច្នេះហើយ ក្រោយពីពិធីមង្គលរបស់នាងបានប្រារព្ធធ្វើសម្រាប់ភ្ញៀវកិត្តិយសនៅភ្នំពេញ តាមការបញ្ចេញឲ្យដឹងរបស់លោកឪពុករបស់នាង គូស្វាមី ភរិយា ថ្មោងថ្មីនឹងទៅធ្វើពិធីកាត់ចំណងដៃនៅលើទឹកដីជាយដែនប្រទេសភាគខាងលិចថែមទៀតនាថ្ងៃទី ២២ កុម្ភៈខាងមុខនេះ៕