- 2020-05-15 03:04:20
- ព័ត៌មាន
បទពិសោធន៍ជីវិត! ប្រុសស្អាត សុខចិត្តចោលការងារសរសេរកូដនៅជប៉ុនប្រាក់ខែរាប់ពាន់ដុល្លារ មកធ្វើវីដេអូត្រូវគេពេបជ្រាយ
- 2020-05-15 03:04:20
- ចំនួនមតិ 0 | ចំនួនចែករំលែក 0
បទពិសោធន៍ជីវិត! ប្រុសស្អាត សុខចិត្តចោលការងារសរសេរកូដនៅជប៉ុនប្រាក់ខែរាប់ពាន់ដុល្លារ មកធ្វើវីដេអូត្រូវគេពេបជ្រាយ
ចន្លោះមិនឃើញ
តារាល្បីលើបណ្ដាញសង្គម(Influencer) ហេង វិសាល បាន និងកំពុងធ្វើឲ្យគ្រប់គ្នាភ្ញាក់ផ្អើល ក្រោយដឹងថា ត្បិតពេលនេះ លោកគឺជាអ្នកធ្វើវីដេអូបង្ហោះលើបណ្ដាញសង្គមក៏ពិតមែន ប៉ុន្តែដើមឡើយលោកគឺជាអ្នកជំនាញ IT ដែលបម្រើការងារជាអ្នកសរសេរកូដនៅទីក្រុងតូក្យូ ប្រទេសជប៉ុន បានប្រាក់ខែរាប់ពាន់ដុល្លារឯណោះ។
ប្រុសស្អាតបាន រំលឹកឡើងនូវរឿងនេះខាងលើ ក្រោយពីគន្លងជីវិតរបស់លោកដើរមកដល់ពេលនេះ ធ្លាប់ត្រូវគេពេបជ្រាយ។ លោកលើកឡើងថា "នៅពេលខ្ញុំអាយុ ១៦ឆ្នាំគេសួរខ្ញុំថា ពេលខ្ញុំរៀនចប់ខ្ញុំចង់បន្តរៀនអ្វី ខ្ញុំបានប្រាប់គេថាចង់រៀន IT “ស្អីគេរៀនIT? រៀនចប់ហ្អែងចង់ទៅបើកតូបបញ្ចូលបទចម្រៀងមែន?” នេះគឺជាពាក្យដែលគេបាននិយាយមកខ្ញុំ ខ្ញុំក៏ញញឹមហើយប្រាប់ថា រៀនចប់ខ្ញុំចង់ធ្វើជាអ្នកសរសេរកូដ គេក៏សើច"។
លុះរហូតដល់អាយុ ១៨ឆ្នាំ លោកក៏ចាប់ផ្ដើមធ្វើវីដេអូបង្ហោះចែកជូនប្រិយមិត្តលើបណ្ដាញសង្គមទស្សនាកម្សាន្ត ហើយក៏ត្រូវគេពេបជ្រាយទៀត។ “មើលវាធ្វើ Videoឆ្កួតៗអត់ចេះខ្មាសគេ ចង់ល្បីមែសហ្អាស? Videoបាន10k viewហ្នឹង សង្ស័យមើលតែខ្លួនឯងទេហ្អីៗ”។ វិសាល ថ្លែងពីសម្ដីរបស់មនុស្សដែលពេបជ្រាយលោក ប៉ុន្តែ១ឆ្នាំក្រោយមក មនុស្សនោះឯង បានហៅលោកឲ្យទៅជួយPromoteហាងរបស់គេ។
មិនត្រឹមអ្នកក្រៅទេ សូម្បីតែសាច់ញាតិ ក៏បានចំអែចំអន់លោកដែរ ក្នុងនោះបងស្រីលោកបានថ្លែងថា “កុំខំពេកអារឿងធ្វើ Videoហ្នឹង យ៉ាងច្រើនល្បីបានការងារធ្វើមួយឆ្នាំ ២ឆ្នាំទៀតហ្នឹង តែមានអ្នកថ្មីមកហ្អែងចប់ហើយ មើលតែតារាទៅ” ខ្ញុំញញឹមហើយថាខ្ញុំមិនមែនតារាទេ។ ៥ ឆ្នាំក្រោយខ្ញុំនៅតែមានការងារមិនស្បើយ"។
ទោះយ៉ាងនេះក្ដី តាមចិត្តគួចប៉ងចង់ក្លាយជាអ្នកជំនាញ Programer មួយរូប វិសាល បានសម្រេចគោលដៅរបស់គេ ដោយនៅអាយុ២៤ឆ្នាំ លោកបានទៅធ្វើការជាអ្នកសរសេរកូដនៅ Tokyo,Japan។ ប៉ុន្តែនៅក្នុងឆ្នាំជាមួយគ្នា លោកបានលាឈប់ សម្រេចចិត្តថាមិនទៅបន្តការងារនៅជប៉ុនទេ ហើយក៏ជាពេលលោកទទួលបានពាក្យនិន្ទាថ្មីៗទៀត។ “ចុះអានេះក៏គំនិតខ្លីម្ល៉េស បានធ្វើការសុទ្ធតែនៅជប៉ុន ប្រាក់ខែពីរ បីពាន់អត់ទៅធ្វើ សុខចិត្តមកគិតខ្លីធ្វើ Video អត់កំណើត”។
បែបនេះក្ដី តារាវ័យក្មេង បានសម្រេចចិត្តត្រូវព្រោះ លោកអាចរកបានអចលនទ្រព្យមួយចំនួនក្នុងរយៈពេលតែ១ឆ្នាំជាមួយការងារដែលលោកបានសម្រេចចិត្តចាប់យក ហើយព្រលែងចោលការងារជា Programer នៅតូក្យូប្រទេសជប៉ុន។ លោកថា "១ឆ្នាំក្រោយខ្ញុំសល់កូនផ្ទះមួយ កូនឡានមួយ កូនដី២ដំ និងកូនរបររកស៊ី២ ៣មុខ"។
លោក ហេង វិសា បានលើកយកមេរៀន មកចែករំលែក ដោយលោកចង់ក្រើនរំលឹកថា "ចូរចាំថាកុំបោះបង់នូវអ្វីដែលអ្នកចង់ធ្វើដោយសារសម្តីរបស់អ្នកដទៃ ជីវិតនេះ ជាជីវិតរបស់យើងធ្វើអ្វីដែលយើងគិតថាត្រូវ ល្អ មិនប៉ះពាល់ដល់សង្គម និងអ្នកដទៃ។ជីវិតយើង មានតែយើងប៉ុណ្ណោះដឹងថាយើងចូលចិត្តអ្វី ចង់ទៅទីណា ហើយទៅតាមផ្លូវណា។ ជីវិតយើង បើមិនជឿខ្លួនឯង ជឿអ្នកណា?”។
លោក ហេង វិសាល គឺជាតារាល្បីលើបណ្ដាញសង្គម ឬហៅតាមពាក្យបច្ចេកទេសថា "Influencer”។ បច្ចុប្បន្នលោកបាន និងកំពុងពេញនិយម ហើយជាមួយគ្នាលោកទទួលបានការងារជាច្រើនមានទាំងស្ប៉តពាណិជ្ជកម្មឲ្យក្រុមហ៊ុននានា សម្ដែងរឿង កម្មវិធីផ្សេងៗ និងធ្វើជាតារាតំណាងផលិតផលជាច្រើនទៀត៕
