• 2020-10-02 08:11:30
  • ព័ត៌មាន

អនុវត្ដជិតចប់កុងត្រាច្រៀងជាមួយសាន់ដេ អ៊ី ណូ បានបោះសម្ដីដ៏គួរឲ្យចាប់អារម្មណ៍

  • 2020-10-02 08:11:30
  • ចំនួនមតិ 0 | ចំនួនចែករំលែក 0

ចន្លោះមិនឃើញ

តារា​ចម្រៀង​ប្រចាំផលិតកម្ម​សាន់​ដេ លោក អ៊ី ណូ បង្ហើប​ថា លោក​នឹង​ចប់​កុងត្រា​ជាមួយ​ផលិតកម្ម​សាន់​ដេ​នៅ​​នៅ​ឆ្នាំ ២០២១ ខាង​មុខ​នេះ​ហើយ ប៉ុន្តែ​លោក​ពុំ​មាន​បំណង​ផ្លាស់ប្ដូរ​ទ្រនំ​ថ្មី ឬ​ហក់​ទៅ​កាន់​ផលិតកម្ម​ណា​ផ្សេង​នោះ​ទេ ល្គឹកណា​សាន់​ដេ​នៅ​តែ​អោយ​តម្លៃ និង​ផ្ដល់​ភាព​កក់ក្ដៅ​ដល់​លោក។

តារា​ចម្រៀង​មាឌ​ធំ ហើយ​សម្បូរ​វោហារ លោក អ៊ី ណូ និយាយ​ថា សម្រាប់​រូប​លោក​មិន​ផ្ដោត​ទៅ​លើ​ការ​ផ្លាស់ប្ដូរ​ផលិតកម្ម​នោះ​ទេ ព្រោះ​លោក​គិត​ថា​នៅ​កន្លែង​ណា​ក៏​ដូច​កន្លែង​ណា​ដែរ​ឲ្យ​តែ​ខ្លួន​ចេះ​ឲ្យ​តម្លៃ គឺ​ល្អ​ទាំង​អស់។ ជាក់​ស្ដែង​ដូច​រូប​លោក​សព្វថ្ងៃ​មាន​ស្ទូឌីយោ​ផលិត​បទភ្លេង និង​កាត់​ត​ចម្រៀង​ដោយ​ខ្លួន​ឯង ព្រម​ទាំង​មាន​អាជីវកម្ម​ផ្ទាល់​ខ្លួន​មួយ​ចំនួន​ទៀត​ផង ប៉ុន្តែ​សាន់ដេ​នៅ​តែ​មិន​ទោមនស្សនឹងលោក តែលោក​ក៏បំពេញ​ភារកិច្ច​ខ្លួន​បានត្រឹមត្រូវដែរ។

លោក អ៊ី ណូ មមាញឹក​ខ្លាំង​ជាមួយ​ជំនួញ​លក់​ឡាន និង​ផលិត​បទ​ចម្រៀង​ដោយ​ខ្លួន​ឯង​ដោយ​មាន​ក្រុម​ការងារ​ជា​ច្រើន​នាក់ កំពុង​ប្រតិបត្តិការ​នៅ​ក្នុង​ស្ទូឌីយោ​ដែល​ធ្វើ​ឱប​នឹង​យានដ្ឋាន​លក់​ឡាន​របស់​លោក​ទើប​បើក​ថ្មី ស្ថិតនៅ​ភូមិ​ប៉ាយ៉ាប សង្កាត់​ភ្នំពេញ​ថ្មី ខណ្ឌ​សែនសុខ។ ត្បិត​ថា​លោក​រវល់​នឹង​ការងារ​ទាំង​នេះ ប៉ុន្តែ​លោក​មិន​ដែល​អាក់​ខាន​បោះ​បទ​ចម្រៀង​​ខ្លួន​ទៅ​កាន់​ផលិតកម្ម​សាន់​ដេរ​ឡើយ ដោយ​ក្នុង​១​ខែ​យ៉ាង​ហោច​២ ទៅ​៣​ បទ​ដែរ។

ឆ្លងកាត់​អាជីព​ច្រៀង​ទាំង​ក្នុង​ហាង និង​តាម​ផលិតកម្ម​ជាង​១៨​ឆ្នាំ បាន​ធ្វើ​ឲ្យ​លោក​យល់​កាន់​តែ​ច្បាស់​ពីតម្លៃ​របស់​តារា​ក្នុង​វិស័យ​សិល្បៈ។ ចំពោះលោក ក្រៅ​ពីផលិត​បទ​ចម្រៀង​ច្រៀង​ដោយ​ខ្លួន​ឯង រូប​លោក​ទើប​ឆ្លងកាត់​ផលិតកម្ម​តែពីរ​ប៉ុណ្ណោះ គឺ​ផលិតកម្ម Diamond និង​ផលិតកម្ម​សាន់​ដេ ដែល​លោក​កំពុង​ធ្វើ​សព្វថ្ងៃ​នេះ៕

អត្ថបទ៖​ ជិន​ សុភ័ក្ដ្រ

មតិយោបល់