តារាចម្រៀងស្រីស្អាត ដា សុម៉ាវត្តី ហក់ចូលប្រឡូកក្នុងភាពយន្តហើយ!

2020-11-11 07:20:39
ព័ត៌មាន

2020-11-11 07:20:39
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់អាជីពសិល្បៈចម្រៀង កំពុងតែលូតលាស់បណ្ដើរៗ ឥឡូវនេះ មានដំណឹងថា តារាចម្រៀងស្រីស្អាត ដា សុម៉ាវត្តី បានហក់ចូលប្រឡូកក្នុងខ្សែភាពយន្ត ដែលជាអាជីពថ្មីមួយបន្ថែមទៀត។

តាមការបញ្ជាក់របស់សាមីខ្លួន បានឲ្យដឹងថា នាងបានចូលរួមសម្ដែងភាពយន្តមួយរឿងដែលទើបបានថតចប់ថ្មីៗហើយ នោះគឺជាការចាត់ចែងរបស់ផលិតកម្ម Town ចាប់តាំងពីផលិតកម្មនេះ បានដំណើរការផលិតខ្សែភាពយន្តជាថ្មីម្ដងទៀត។

ខ្សែភាពយន្តដែលជាស្នាដៃដំបូងរបស់ ស្រីស្អាតវ័យ ២០ឆ្នាំរូបនេះមានចំណងជើងថា "ព្រហ្មលិខិតដុះស្លាប" ផលិតដោយផលិតកម្មថោន ដែលជាទ្រនំរបស់នាងសព្វថ្ងៃ។ វត្តី បញ្ជាក់ថា នេះគឺជាការបោះជំហានមួយបន្ថែមទៀត ដែលនាងរំពឹងថា នឹងជួយយឹតយោងប្រជាប្រិយភាពរបស់នាង ក៏ដូចជាធ្វើឲ្យកាន់តែប្រសើរចំពោះអាជីពចម្រៀង រួមទាំងអាជីពសិល្បៈរបស់នាងផង។

នៅក្នុងខ្សែភាពយន្តខាងលើ ដា សុម៉ាវត្តី គឺជាតួអង្គសំខាន់មួយរូប ហើយសាច់រឿងតម្រូវឲ្យនាងចាប់ដៃគូសម្ដែងជាមួយលោក សៅ ឧត្តម ដែលជាតារាចម្រៀងរួមទ្រនំថោនជាមួយនាង។ "រឿងហ្នឹង មានតួច្រើនបង តែក្នុងនោះតួអង្គសំខាន់មាន២គូ គឺមាន បាន មុន្នីល័ក្ខ ជាមួយ ម៉ៅ អាជី ហើយមួយគូទៀត គឺមានខ្ញុំជាមួយ សៅ ឧត្តម ហើយអត់មាននរណាតួឯកទេ គឺតួសំខាន់ទាំងអស់គ្នា!”។

នេះ គឺជាលើកទី១សម្រាប់ការសម្ដែងភាពយន្តរបស់ប្អូនស្រីរបស់លោក ដា ធនវឌ្ឍន៍ អតីតប្រុសស្អាតលេខ១ កម្មវិធីហ្វ្រេសស៊ី ហើយក៏ជាលើកទី១ ដែលបានចាប់ដៃគូសម្ដែងក្នុងភាពយន្តជាមួយតារាប្រុសមកពីខេត្តស្វាយរឿង សៅ ឧត្តម ដែរ។ ប៉ុន្តែជាលើកទី២ ដែលពួកគេបានចាប់ដៃគ្នានៅក្នុងសិល្បៈ។ សុម៉ាវត្តី បញ្ជាក់ថា ផលិតកម្ម ថោន របស់នាង ក៏ទើបនឹងបានចាប់ផ្គូនាង និង ឧត្តម ក្នុងបទចម្រៀងមួយបទរួចមកហើយដែរ។

ម្ចាស់បទ "សង្សារមិត្តឯង" លើកឡើងថា នេះជាការបទពិសោធន៍លើកទី១ ដូច្នេះមិនដឹងថា ល្អគ្រប់គ្រាន់សម្រាប់ប្រិយមិត្តឬអត់នោះទេ។ ដូច្នេះសុំការលើកលែងផង ប្រសិនបើការសម្ដែងនៅកន្លែងណាមួយមិនទាន់ល្អប្រសើរ។

រូបភាព៖ ហ្វេសប៊ុក សុម៉ាវត្តី

នេះជាភាពយន្តថ្មីរបស់ ថោន បន្ទាប់បានខកខានផលិតរឿងជាច្រើនឆ្នាំ។ តាមការបញ្ជាក់របស់តារាស្រី រឿងនេះ បានថតចប់រួចរាល់ហើយ នៅឡើយតែការកាត់តសម្រួលផ្នែកបច្ចេកទេសប៉ុណ្ណោះ។ ត្បិតថា នាងមិនដឹងថា រឿងនេះបញ្ចាំងនៅពេលណាឲ្យប្រាកដ តែនាងយល់ថា ទំនងមិនជាយូរទេ ខ្សែភាពយន្តដែលជាស្នាដៃដំបូងរបស់នាង នឹងដាក់បញ្ចាំងក្នុងពេលមិនយូរខាងមុខនេះ៕

អត្ថបទ៖ ទារិកា