ដា សោម៉ាវត្តី ចូលថោន បាន១ឆ្នាំគត់ ដឹងថានាងចេញបានប៉ុន្មានបទ និងមានសមិទ្ធផលអ្វីខ្លះទេ?

2020-11-23 04:53:13
ព័ត៌មាន

2020-11-23 04:53:13
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងសម្រស់ស្រស់ស្អាត ដា សុម៉ាវត្តី ទើបបានឈានដល់ខួប១ឆ្នាំកាលពីពេលថ្មីៗ សម្រាប់ការចូលរួមជាមួយផលិតកម្ម ថោន ក្នុងនាមជាតារាចម្រៀងអាជីពលើកដំបូងបំផុត។ ក្នុងវេលានេះ តារាស្រីសម្រេចបានសមិទ្ធផលច្រើនគួរឲ្យកត់សម្គាល់។

ក្នុងអំឡុងពេល១ឆ្នាំនេះ គេបានមើលឃើញច្បាស់ថា សុម៉ាវត្តី បានវិវត្តខ្លួនពីសាមញ្ញជនម្នាក់មកជាតារាចម្រៀងអាជីពមួយរូបដែលបាន និងកំពុងបោះជំហានទៅមុខ។ បន្ថែមពីលើនេះ តាមរបាយការណ៍ តារាស្រីវ័យ ២០ឆ្នាំ បានវិវត្តខ្លួនពីតារាចម្រៀង មកជាតារាសម្ដែងភាពយន្តបន្ថែមទៀត ទាំងគ្មាននរណាស្មានដល់។

និយាយពីបទចម្រៀង គិតត្រឹមពេលនេះ បើតាមរបាយការណ៍ ដា សុម៉ាវត្តី បានចេញបទចម្រៀងភាគច្រើនត្រូវចិត្តយុវវ័យចំនួន ៣០បទគត់។ ក្នុងចំណោមនេះ មានប្រភេទបទមនោសញ្ចេតនាត្រូវចិត្តយុវវ័យ និងបទចង្វាក់ប្រជាប្រិយសម្រាប់រាំលេងកម្សាន្ត ឬសម្រាប់ចូលរួមអបអរពិធីបុណ្យប្រពៃណីធំៗដូចជា ចូលឆ្នាំ ភ្ជុំបិណ្ឌជាដើម។ បទទី១របស់ សោម៉ាវត្តី ក្នុងផលិតកម្មថោន គឺបទ "មនុស្សខ្លះ" ចេញពីខែមករា ២០១៩។

បទដំបូងនេះ ស្ថិតក្នុងចំណោមបទពេញនិយមបំផុតមួយរបស់ វត្តី ក្រៅពីនេះមានបទ "ស្រឡាញ់ខ្ញុំមែន" "ចុងក្រោយមិនមែនខ្ញុំ" ជាដើមសុទ្ធជាបទពេញនិយម។ ដោយឡែកបទចុងក្រោយរបស់តារាចម្រៀងវ័យក្មេងចេញក្នុងផលិតកម្ម ថោន គិតត្រឹមពេលនេះ គឺបទ "សង្សារមិត្តឯង" ដែលទើបចេញកាលពីពាក់កណ្ដាលខែនេះប៉ុណ្ណោះ និងបាន និងកំពុងទទួលបានការពេញនិយម។

ក្រៅពីអាជីពចម្រៀង ដា សុម៉ាវត្តី ក៏ជាតារាសម្ដែងមួយរូបដែរ ដោយនាងទើបនឹងបានចូលរួមសម្ដែងក្នុងខ្សែភាពយន្តខ្នាតធំមួយរឿងថ្មីៗ។ រឿងនោះមានចំណងជើងថា "ព្រហ្មលិខិតដុះស្លាប" ទើបថតចប់ៗថ្មី ដោយរង់ចាំតែថ្ងៃដាក់បញ្ចាំងជូនប្រិយមិត្តបានទស្សនាប៉ុណ្ណោះ។ រឿងនេះ គឺ សុម៉ាវត្តី សម្ដែងចាប់ដៃគូជាមួយតារាចម្រៀងរួមទ្រនំ សៅ ឧត្តម ហើយនេះជាបទពិសោធន៍សម្ដែងភាពយន្តលើកទី១បំផុតរបស់នាង។

តារាស្រីរំពឹងថា ក្រោយរឿងនេះ ដាក់បញ្ចាំងជូនប្រិយមិត្តបានទស្សនា កេរ្តិ៍ឈ្មោះរបស់នាង នឹងកាន់តែហក់ឡើងមួយកម្រិតទៀត។ យ៉ាងណាក៏ដោយ ម្ចាស់បទ "សង្សារមិត្តឯង" លើកឡើងថា នេះជាការបទពិសោធន៍លើកទី១ ដូច្នេះមិនដឹងថា ល្អគ្រប់គ្រាន់សម្រាប់ប្រិយមិត្តឬអត់នោះទេ។ ដូច្នេះសុំការលើកលែងផង ប្រសិនបើការសម្ដែងនៅកន្លែងណាមួយមិនទាន់ល្អប្រសើរ៕