- 2021-02-16 12:40:52
- ព័ត៌មាន
ទាំងតួឯកក្នុងរឿងកុន និងក្នុងជីវិតពិត នៃរឿងវាលពិឃាដ ១៩៨៤ ពេលនេះសុខទុក្ខយ៉ាងម៉េចហើយ?
- 2021-02-16 12:40:52
- ចំនួនមតិ 0 | ចំនួនចែករំលែក 0
ទាំងតួឯកក្នុងរឿងកុន និងក្នុងជីវិតពិត នៃរឿងវាលពិឃាដ ១៩៨៤ ពេលនេះសុខទុក្ខយ៉ាងម៉េចហើយ?
ចន្លោះមិនឃើញ
រឿងវាលពិឃាដ ឬ ជាភាសាអង់គ្លេស The Killing Field ជាខ្សែភាពយន្តអង់គ្លេសដ៏ល្បីឈ្មោះមួយ ដែលផ្ដិតយកពីជីវិតរបស់ អ្នកកាសែតអាមេរិកលោក Sydney Schanberg (សម្ដែងដោយលោក Sam Waterson) អ្នកថតរូបសារព័ត៌មានជនជាតិខ្មែរ លោក ឌិត ប្រន (សម្ដែងដោយលោក ហាំង សំណាង ង៉ោ) អំឡុងស្រុកកលិយុគនាសម័យសាធារណរដ្ឋ និងសម័យខ្មែរក្រហម។
Sabay មិនធ្វើការបកស្រាយសាច់រឿងវែងឆ្ងាយទេ ដោយនៅថ្ងៃនេះចង់បង្ហាញពីស្ថានភាពរបស់តួឯកក្នុងរឿងកុន និងតួនៅក្នុងជីវិតជាក់ស្ដែងនៅក្នុងឆ្នាំ២០២១។
Sydney Schanberg [1]
លោក Schanberg ជាអ្នកកាសែតអាមេរិកតាំងឆ្នាំ១៩៥៩។ លោកមកយករឿងសង្គ្រាមនៅស្រុកខ្មែរនៅឆ្នាំ១៩៧៣។ ដោយសារតែ យកព័ត៌មានរឿងនៅស្រុកខ្មែរ ធ្វើឲ្យលោកឈ្នះពាន Pulitzer ដែលជាពានស្រដៀងអូស្កា សម្រាប់អ្នកកាសែត។ ក្រោយរបបខ្មែរចូលកាន់កាប់មក លោកនៅតែបន្តធ្វើជាអ្នកកាសែតរហូតដល់ឆ្នាំ២០០០ជាង។ ក្រៅពីតស៊ូមតិរឿងទម្លាក់គ្រាប់បែកខុសច្បាប់មកលើកម្ពុជា ដោយរដ្ឋការលោកនិចសុន លោកស៊ីដនី ក៏បានតស៊ូរឿងយកចិត្តទុកដាក់លើអ្នកទោសសង្គ្រាមនៅជំនាន់សង្គ្រាមវៀតណាមផងដែរ។ លោកបានទទួលមរណភាពនៅឆ្នាំ២០១៦ ក្នុងអាយុ ៨២ឆ្នាំដោយជំងឺគាំងបេះដូង។
ឌិត ប្រន [2]
លោកប្រន ធ្លាប់ធ្វើជាអ្នកបកប្រែសម្រាប់ពួកអាមេរិកាំង និងអង់គ្លេសមុនសម័យខ្មែរក្រហម។ ក្រោយបែកសម័យប៉ុល ពត លោកបានមករស់នៅសហរដ្ឋអាមេរិក ហើយធ្វើការនៅកាសែត New York Time ជាអ្នកថតរូបសារព័ត៌មាន រហូតដល់លោកឈឺធ្ងន់នៅឆ្នាំ២០០៧។ លោកបានបាត់បង់ជីវិតនៅឆ្នាំ២០០៨ ក្នុងអាយុ ៦៥ឆ្នាំ ដោយរោគាពាធ។
Sam Waterson [3]
តួសម្ដែងអាមេរិករូបនេះបានប្រឡូកក្នុងអាជីពសិល្បៈតាំងពីឆ្នាំ១៩៦៥មកម្ល៉េះ។ លោកបានថតរឿងក្នុងមហោស្រព រឿងភាគអាមេរិក ក៏ដូចជារឿងកុនដូចជា វាលពិឃាដ រហូតមកដល់សព្វថ្ងៃនេះ។ លោកក្នុងឆ្នាំ២០២១ មានអាយុ ៨០ឆ្នាំហើយ។
ហាំង សំណាង ង៉ោ[4]
លោកវេជ្ជបណ្ឌិត ហាំង ង៉ោ ក៏ជាអ្នកគេចផុតពីសម័យវាលពិឃាដមួយរូបដែរ។ ជាអ្នកស្រុកតាកែវ លោកបានគេចមកសហរដ្ឋអាមេរិក នៅឆ្នាំ១៩៨០។ លោកមិនដែលមានអាជីពជាអ្នកសម្ដែងទេមុនពេលលេងរឿងវាលពិឃាដ។ រឿងនេះដែរធ្វើឲ្យលោកបានឈ្នះពានអូស្ការ ខាងតួរងក្នុងរឿង។ ជាអកុសល លោកបានបាត់បង់ជីវិតនៅឆ្នាំ១៩៩៦ ដោយសារគេប្លន់សម្លាប់នៅក្រុង Los Angeles៕