- 2021-03-08 15:46:37
- ព័ត៌មាន
ត្រឹមយប់នេះ សម្ដេចតេជោ ហ៊ុន សែន ថា កូវីត១៩ បានឆ្លងដល់សង្គមសិល្បករទៅហើយ
- 2021-03-08 15:46:37
- ចំនួនមតិ 0 | ចំនួនចែករំលែក 0
ត្រឹមយប់នេះ សម្ដេចតេជោ ហ៊ុន សែន ថា កូវីត១៩ បានឆ្លងដល់សង្គមសិល្បករទៅហើយ
ចន្លោះមិនឃើញ
សម្ដេចតេជោ ហ៊ុន សែន នៅព្រលប់ថ្ងៃទី ៨ មីនា នេះបានចេញសារបន្ទាន់មួយតាមប្រព័ន្ធតេឡេក្រាម ក្រោយពីបានរកឃើញអ្នកឆ្លងកូវីត១៩ ថ្មីច្រើននាក់បន្ថែមទៀត និងថា ជំងឺកាចសាហាវនេះបានឆ្លងដល់សង្គមសិល្បករខ្មែរទៅហើយ។
តាមរយៈសារសំឡេងជិត ២០នាទី បានមានប្រសាសន៍ថា នៅក្នុងថ្ងៃនេះ ក្នុងប្រទេសកម្ពុជាយើង មានសភាពការណ៍កាន់តែគួរឲ្យបារម្ភ ក្រោយពីមនុស្សចំនួន ៤៩ ត្រូវបានធ្វើតេស្តរកឃើញវិជ្ជមានកូវីត១៩ ខណៈនៅពេលនេះ ការតាមច្បាមយកមុខសញ្ញា ប្រភពនៃជំងឺនេះ នៅមិនទាន់អាចគ្រប់គ្រង ឬកំណត់បាន ហើយនៅពេលនេះ ស្ថានភាពជំងឺបានឆ្លងចូលដល់ស្ថាប័នសមត្ថកិច្ច និងបានឆ្លងដល់សង្គមសិល្បករថែមទៀត។
យ៉ាងណា សម្ដេច ហ៊ុន សែន មិនបានបញ្ចេញលម្អិតថា សិល្បករណាខ្លះដែលត្រូវបានរកឃើញវិជ្ជមានកូវីត១៩នោះឡើយ។ បែបនេះក្ដី មានប្រភពមួយផ្សេងទៀត បានទម្លាយថា ពិធីការិនីទូរទស្សន៍ដ៏ល្បីមួយរូប និងក្រុមគ្រួសារ បានឆ្លងមេរោគសាហាវនេះ។ ប្រភពបន្តថា ពិធីការិនីបានឆ្លងពីអ្នកដឹកនាំមួយរូប ក្រោយពីរូបនាងបានទៅចូលរួមថតស្ប៉តពាណិជ្ជកម្មមួយកាលពីប៉ុន្មានថ្ងៃមុន។
បន្ថែមពីលើនេះ តាមប្រភពដដែល មានតារាចម្រៀងច្រើននាក់ទៀតក្នុងផលិតកម្មធំមួយ មានជាប់ពាក់ព័ន្ធជិតស្និទ្ធជាមួយនឹងពិធីការិនីខាងលើ និងថាខ្លះក្នុងចំណោមនោះបានចេញរោគសញ្ញាហើយ។
តាមប្រសាសន៍សម្ដេចតាមសារសំឡេងដដែល បានអះអាងថា លទ្ធផលវិជ្ជមានកូវីត១៩ អាចនឹងកើនឡើងទៀត ក្នុងតួលេខគួរឲ្យបារម្ភ ខណៈត្រឹមម៉ោងនេះ ម៉ាស៊ីនវិភាគសំណាករបស់ប៉ាស្ទ័រនៅមិនទាន់បញ្ឈប់ការងាររបស់ខ្លួននៅឡើយ។
ដូច្នេះហើយ ដើម្បីបញ្ចៀសហានិភ័យកាន់តែខ្លាំង សម្ដេចស្នើឲ្យស្ថាប័នរបស់រាជរដ្ឋាភិបាល គប្បីកាត់បន្ថយចំនួនមនុស្សធ្វើការនៅក្នុងការិយាល័យ ឲ្យបានយ៉ាងតិច ៩០ភាគរយ។ ជាមួយគ្នា សម្ដេចក៏ស្នើដល់ស្ថាប័នឯកជនអនុវត្តតាមផែនការចុងក្រោយដូចគ្នានេះដែរ៕
