ក្រុមការងាររឿង «Time» បង្ហើបពីចរិត Kim Junghyun និងទង្វើមួយធ្វើឲ្យ Seohyun យំស្រស់ៗកណ្ដាលទី

2021-04-12 01:23:29
ព័ត៌មាន

2021-04-12 01:23:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្របពេលដែលតារាសម្ដែង Kim Jung Hyun កំពុងមានជម្លោះជាមួយនឹងក្រុមហ៊ុនរបស់ខ្លួនគឺ O& Entertainment រឿងល្អក់កករពីមុនរបស់លោកទាក់ទងនឹងចរិតមិនសមរម្យក៏ស្រាប់តែត្រូវបានគេសើរើមកពិភាក្សាជាថ្មី ដោយក្នុងនោះក៏មានពាក់ព័ន្ធ Seohyun (Girls' Generation) ដែរ។

យោងតាមការចេញផ្សាយរបស់ SBS Celebrity News បានឲ្យដឹងថា Kim Jung Hyun បានសម្រេចដកខ្លួនចេញពីរឿង «Time» ស្របពេលនៅសល់តែ ៤ភាគទៀតត្រូវថតបញ្ចប់រួចរាល់។ អ្នកនាំពាក្យពីក្នុងរឿងនេះ បានប្រាប់បណ្ដាញផ្សព្វផ្សាយថា តារាប្រុសរូបនេះមានអារម្មណ៍មិនស្រណុកក្នុងចិត្ត ជាមួយនឹងដៃគូសម្ដែងដែលត្រូវថតរួមគ្នាក្នុងរឿងនេះទេ។

ដោយឡែកផ្អែកលើការធ្វើសន្និសីទកាសែត Kim Jung Hyun បានបង្ហើបថា ដូចជាមិនសូវមានចូលតួខ្លាំងជាមួយនឹងដៃគូរួមសម្ដែងដែរ ហើយថែមទាំងស្នើសុំតាមរយៈ Agency របស់ខ្លួន ឲ្យកាត់បន្ថយឈុតស្នេហាឲ្យបានច្រើនតាមដែលអាចធ្វើបានផង។

នៅពេលនោះដែរ អ្នកនិពន្ធរបស់រឿង «Time» ក៏ត្រូវជួបរឿងក្រពល់មុខដែរ ដោយសារត្រួវប្រញាប់កែសម្រួល Script ជាច្រើនដងឲ្យទាន់ពេល ដើម្បីឲ្យបានសមតាមបំណងរបស់ Kim Jung Hyun។ នៅទីបំផុត តារាប្រុសដដែលបែរជាសម្រេចដើរចេញពីការថតរឿងនេះ ជាហេតុបណ្ដាលឲ្យអ្នកនិពន្ធកាន់តែលំបាក ដែលត្រូវផ្លាស់ប្ដូរសាច់រឿងជាថ្មីទៀត។

ងាកមកក្រុមការងារដែលត្រូវទទួលខុសត្រូវចំពោះ Seohyun នៅកាលនោះវិញក៏បានបង្ហើបប្រាប់បណ្ដាញផ្សព្វផ្សាយដែរថា សាច់រឿងដើមនោះ ដំបូងតម្រូវឲ្យតួ Kim Jung Hyun លង់ស្នេហ៍ ឬមានទំនាក់ទំនងស្នេហាជាមួយនឹងតួឯកស្រី Seohyun។ ប៉ុន្តែទោះជាយ៉ាងណា ក្រុមការងារអះអាងថា Kim Jung Hyun មិនទាំងមើលចំភ្នែក Seohyun ផង នេះហើយជាលទ្ធផលដែលត្រូវនាំផលពិបាកពេលថត។

បន្ថែមពីលើនេះ ត្រង់ឈុតមួយនោះ Jung Hyun បានជូតដសរបស់ខ្លួនដោយកន្សែងសើម បន្ទាប់ពីថតឈុតប៉ះដៃ Seohyun ហើយ។ ក្រុមការងារថតបានបង្ហើបថា ដោយសារឃើញទង្វើបែបនេះហើយ Seohyun លួចយំទៀតផង។

ដោយឡែកជុំវិញអ្វីដែលបានរាយការណ៍ពីបណ្ដាញសារព័ត៌មានកន្លងមក ពេលមានមិត្តរួមការងារលើកឡើងពីអាកប្បកិរិយារបស់ Jung Hyun ពីបញ្ហាផ្ទាល់ខ្លួនពាក់ព័ន្ធនឹងទង្វើដាក់នារីៗនោះ សាមីខ្លួនក៏បានច្រានចោលដែរ។