ផលិតកម្មយក្សទាំង ៤របស់​កូរ៉េ​មាន​ HYBE, SM Entertainment, JYP Entertainment និង YG Entertainment បាន​បង្ហើប​ពី​ចំណូល និង​ចំណាយ​របស់​ខ្លួន​សម្រាប់​ត្រីមាសទី ១ឆ្នាំ ២០២១ហើយពេល​នេះ។ ចង់​ដឹង​ទេ ថា​តើ​កន្លងមក​ ក្រុមហ៊ុន​មួយ​ណា​ដែល​អាច​ស្ថិត​នៅ​លំដាប់​លើ​គេ បើ​គិត​ពី​ខែមករា ដល់​ខែមីនា?

៤. ផលិតកម្ម YG

YG ទទួល​បាន​ចំណូលសរុបទាបជាង​គេប្រចាំត្រី​មាស​ដំបូង​ប្រចាំឆ្នាំ​នេះ ជាមួយ​នឹង​ទឹកប្រាក់ ៨,៦៥ពាន់លានវ៉ុន (ខ្ទង់ ៧,៦៨លានដុល្លារ)។ ក្រុមហ៊ុនក៏បាន​កត់ត្រាប្រាក់ចំណេញប្រតិបត្តិការចំនួន ៩,៥៣ពាន់លានវ៉ុន (ខ្ទង់ ៨,៤៦លានដុល្លារ)។

សម្រាប់​ត្រី​មាសទី១ ឆ្នាំ២០២១នេះ​ដែរ តារា​ដែល​បាន​ Comeback មាន TREASURE, Bobby (iKON), Seungyoon (WINNER) ក៏ដូចជា Rosé‘ (BLACKPINK) ផងដែរ។

៣. ផលិតកម្ម SM

អ្នក​បន្ទាប់ពី SM ដែល​រក​ចំណូល​សរុប​បាន ៨,៦៧ពាន់លានវ៉ុន (ខ្ទង់ ៧,៧០លានដុល្លារ)។ ប្រាក់​ចំណេញ​ប្រតិបត្តិការដែល​ក្រុមហ៊ុនទទួល​បាន​គឺ ១៥,៣ពាន់លានវ៉ុន (ខ្ទង់ ១៣,៦លានដុល្លារ)។

ចំណែក​តារា​ដែល​បង្ហាញ មុខ​នៅ​ ៣ខែ​ដំបូង​នេះ​មាន​ SHINee, Super Junior និង Baekhyun (EXO)។

២. ផលិតកម្ម JYP

ម្ចាស់តំណែង​លេខ ២ គេចមិនរួច​ពី JYP ទេ ដែល​រក​បាន​ចំណូលសរុប ១២,០ពាន់​លានវ៉ុន (ខ្ទង់ ១០,៧លានដុល្លារ)។ ចំណែក​ប្រាក់​ចំណេញ​ប្រតិបត្តិការវិញ​មាន​ចំនួន ១៣,៧ពាន់​លានវ៉ុន (ខ្ទង់ ១២,២លានដុល្លារ)។

គួរឲ្យភ្ញាក់ផ្អើលដែល ផលិតកម្មនេះ​ មិនមាន​តារាដែល Comeback ក្នុង​ចន្លោះ​ ៣​ខែនៃ ឆ្នាំ ២០២១ឡើយខ្លួន​ក៏​ត្រូវបាត់គ្រាប់ពេជ្រមាន​តម្លៃ GOT7 ទៀត ដោយសារ​សមាជិក​ទាំងអស់សម្រេចដើរចេញ​លើ​វិថី​ថ្មី​ដែល​ពួកគេ​ជា​អ្នក​ដៅ​ដោយខ្លួន​ឯង​វិញ។

១. ផលិតកម្ម HYBE

ជើងខ្លាំង​គ្មាន​អ្នកណា​ក្រៅពី HYBE ទេ ដែល​អ្នក​ម្ចាស់ចំណូលសរុប ១៥,៨ពាន់លានវ៉ុន (ខ្ទង់ ១៤,០លានដុល្លារ) ប្រចាំត្រី​មាសទី១ ឆ្នាំ២០២១។ ចំណែក​ប្រាក់​ចំណេញ​របស់​ក្រុមហ៊ុន​គឺ ២១,៧ពាន់លានវ៉ុន (ខ្ទង់ ១៩,៣លានដុល្លារ)។

ដូច JYP ដែរ នៅ​៣​ខែដំបូង​ឆ្នាំ​ថ្មី តារា​របស់ HYBE មិន​មាន​អ្នកណា Comeback ឡើយ ប៉ុន្តែ​ជា​ការ​សាទរ​ឆ្នាំ​ថ្មី ក្រុមហ៊ុន​បាន​ពង្រីកវិសាលភាព​របស់​ខ្លួន ដោយបាន​សហការជាមួយ​នឹង​ក្រុមហ៊ុនអាមេរិក ហើយប្រែពីផលិតកម្ម Bug Hit ​មក​ជា​ HYBE វិញ ជា​ហេតុ​ភាគ​លាភរបស់​ពួកគេ​កាន់​តែ​កើនឡើង​ស្មានមិនដល់៕