បើ​តាម​វិបសាយ​ Page Six បានឲ្យដឹង​ថា​ម្ចាស់ពាន​រង្វាន់អូស្ការ Brad Pitt ដែល​បាន​តតាំង​ក្ដីជាមួយ​នឹង​អតីតភរិយា Angelina Jolie ដល់ទៅ ៥ឆ្នាំ ទាក់ទង​នឹង​ការទាមទារសិទ្ធិគ្រប់គ្រងកូនទាំង ៦នោះ ពេល​នេះ​មាន​ការ​បញ្ជាក់ថា​លោក​បាន​ឈ្នះ​ក្ដី​នេះហើយ។

ប្រភព​ជិតស្និទ្ធនឹង​សាមី​ខ្លួនបាន​និយាយថា​ នេះ​គ្រាន់​តែ​ជាសម្រេច​បណ្ដោះ​អាសន្ន​សិន​ទេ ស្របពេល​ Anglina Jolie មិនសុខចិត្តដាច់ខាត និងក៏កំពុង​ស្វះស្វែង​ក្នុង​ការ​ទាមទាររក​យុត្តិធម៌​សម្រាប់ខ្លួន​ដែរ។

ផ្អែក​តាម​លោកចៅក្រម John Ouderkrik អ្នក​ដែល Brad Pitt និង Angelina ជួលឲ្យ​ជួយចាំសម្របសម្រួលរឿងក្ដី​ បាន​ធ្វើការយ៉ាងហ្មត់ចត់ចំពោះ​ករណី​នេះ។ លោកពិតជា​យល់ច្បាស់​ពីរឿងនេះ​ ហើយពិនិត្យយ៉ាងល្អិតល្អន់ពីសក្ខីកម្មរបស់​សាក្សីរួមមាន អ្នកចិត្តសាស្ត្រ អ្នកជំនាញ​មើលការខុសត្រូវក្មេងៗ ដែលស៊ើបសួរកូនៗរបស់ Jolie-Pitt ផ្ទាល់ ព្រម​ទាំងអ្នក​ដែល​នៅជិតៗគ្រួសារមួយ​នេះ ហើយការងារ​នេះ​ប្រព្រឹត្តិទៅជា​ច្រើនខែ។

ទោះជាយ៉ាងណា​ ចៅក្រមមិនបានឮពីការផ្ដល់សក្ខីកម្មនៅឯតុលាការទាក់ទង​នឹង​កូនៗរបស់ពួកគេទេ ហេតុនេះ​ហើយទើប Angelina Jolie ដាក់ពាក្យបណ្ដឹងទៅតុលាការផ្ទាល់ដោយខ្លួនឯង។

កន្លងមក​មាន​ការឲ្យដឹង​ដែរថា Brad តែងព្យាយាមធ្វើយ៉ាងណា​បាន​នៅជិតកូនៗ ប៉ុន្តែ​ Angelina ក៏បាន​ធ្វើអ្វី​គ្រប់យ៉ាង រារាំងរឿងនេះដែរ។ តាម​ប្រភពបញ្ជាក់។

ក្នុងឯកសារលើ​តុតុលាការក៏បាន​បញ្ជាក់បន្ថែម​ដែរថា៖ «សក្ខីកម្មរបស់ Angelina Jolie មិនទាន់ពេញលេញទេ ដោយខ្វះចំណុចសំខាន់ៗច្រើន ក៏ដូចជាការថែទាំកូនៗនៅបច្ចុប្បន្នភាព និងសំណើររបស់ Brad ទាក់ទង​នឹង​ការមើលថែកូន»។

យ៉ាងណា​មិញ​ បន្ទាប់​ពីចៅក្រមសម្រេច​ឲ្យ Brad Pitt ឈ្នះក្ដីមើលថែកូន ភាគីខាង Angelina Jolie ក៏ប្រញាប់ដាក់ពាក្យប្ដឹងបន្តទៀត។ ករណី​នេះដូចជា​មិនចប់ងាយៗនោះទេ រវាងភាគីទាំង ២នេះ៕​