ព័ត៌មានទទួល​បាន​ពី​ Channel YouTube ផ្លូវការ Garo Sero Institute ដែលជា​ប្រភពយកការណ៍ព័ត៌មាន​សិល្បៈល្បី​បំផុតមួយដែរ​នៅប្រទេស​កូរ៉េ បាន​ឲ្យដឹង​ថាតារាសម្ដែង Jun Ji Hyun និង​ស្វាមី កំពុង​តែ​ឈាន​ទៅរក​ផ្លូវលែងលះគ្នា​ហើយពេលនេះ។

ព័ត៌មាន​នេះ​បាន​បង្ក​ជា​ការ​ភ្ញាក់ផ្អើល​ទាំង​យប់​ថ្ងៃទី០២ ខែឧសភា ដោយលេចឮថា​តារាសម្ដែង Jun Ji Hyun និង​ស្វាមីទំនង​ជា​ត្រូវលែងលះហើយ ប៉ុន្តែ Ji Hyun បដិសេធមិនព្រម​លែង​លះផ្លូវការ ក៏ព្រោះ​ថា​ បើសិន​ជា​មាន​ការ​ប្ដឹង​ផ្ដល់លែងលះគ្នា​កើតឡើងមែន នោះ​អាច​នឹងជះឥទ្ធិពល​មិនល្អឡើយ​ដល់ដៃគូការងារ​រួមមាន ម្ចាស់​ស្ប៉តពាណិជ្ជកម្ម ជាពិសេស​ក្រុមហ៊ុន​ដែលនាង​ជ្រកកោន តែម្ដង ដែល​នឹង​ត្រូវទាមទារថ្លៃ​ពិន័យ ក្នុង​លក្ខខណ្ឌដែលតារា​របស់ពួកគេ​បង្ក​ជា​រឿង​មិនល្អកើតឡើងទាក់ទង​នឹង​រឿងអាស្រូវ។

អំឡុងពេល​ Live ផ្ទាល់ Channel Garo Garo បាន​បញ្ជាក់ថា​ Choi Joon Hyuk (ស្វាមី Ji Hyun) បាន​ចាក​ចេញពីផ្ទះ​យូរហើយ ហើយ​និយាយថា​លោកគ្មានបំណង ថា​នឹង​ត្រឡប់​មក​រស់នៅជាមួយ​នឹង​ Ji Hyun ទៀតទេ។ ព័ត៌មាន​ពីការចែកផ្លូវគ្នានេះផ្ទុះ​ឡើង​ប្រមាណជា ៦ខែទៅហើយ ហើយអំឡុងពេលនោះ ភាគីទាំងសង្ខាងក៏បរាជ័យ​ក្នុង​ការលើកបញ្ហា​មក​ដោះស្រាយជាមួយគ្នាដែរ។

Kim Young Ho ពីខាង Garo Sero Institute បាន​បន្ថែម​ទៀតថា៖ «គំនិតរបស់ Jun Ji Hyun ពេល​នេះពិតជា​ច្របូកច្របល់ណាស់។ ខ្ញុំ​បាន​ឮថា​ នាង​ថែម​ទាំង​មាន​គំនិតចង់ធ្វើចំណាកស្រុកទៅ​ប្រទេសដទៃទៀត។ នាង​ចង់​លាក់រឿង​នេះឲ្យបាន​ជិតល្អ»។

លោក​បាន​បន្តទៀតថា មាន​នារី​ម្នាក់ទៀតដែលជាស្រីស្នេហ៍របស់ Choi Joon Hyuk បាន​លេចមុខក្លាយជា​ដើម​ហេតុដែល​នាំ​ឲ្យមាន​រឿង​នេះ​កើតឡើង។

ទោះជាយ៉ាង​ណា​ទាក់ទង​នឹង​ព័ត៌មាន​ចចាមអារ៉ាម​ក្ដៅគគុកនេះ ខាងក្រុមហ៊ុន Culture Depot របស់ Jun Ji Hyun ក៏បានចេញ​សេចក្ដីថ្លែងការណ៍ខ្លីមួយដែរ «យើងប្រាកដជានឹង​បញ្ជាក់បន្ថែម ដើម្បីឲ្យច្បាស់ថា ព័ត៌មាននេះជាការពិត ឬយ៉ាងណា?»៕