លើកនេះ ជ័យ សូវ៉ាត ប្រាប់ពីការភ័យខ្លាច និងការលំបាក នាមជាគ្រូពេទ្យម្នាក់ប្រយុទ្ធនឹងកូវីដ១៩

2021-09-13 03:26:57
ជីវិតតារា

2021-09-13 03:26:57
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងដែលមានប្រជាប្រិយភាព សម្លេងស្រទន់ លោក ជ័យ សូវ៉ាត បានប្រាប់ពីការភ័យខ្លាចនិងលំបាក៣យ៉ាង ក្នុងការបំពេញបេសកកម្មជាគ្រូពេទ្យស្ម័គ្រចិត្ត ដើម្បីប្រយុទ្ធប្រឆាំងជំងឺកូវិដ១៩ ដែលលោកបានជួបប្រទះក្នុងពេលបំពេញការងារ។

តារាចម្រៀងលោក ជ័យ សូវ៉ាត បានប្រាប់ Sabay ឲ្យដឹងថា ត្បិតថាលោកជាគ្រូពេទ្យ ប៉ុន្តែលោកក៏មានការភ័យខ្លាច មិនចាញ់បងប្អូនប្រជាពលរដ្ឋទូទៅដែរ និងអាចថា ភ័យខ្លាចជាងថែមទៀតផង ព្រោះពួកគេជាទ័ពជួរមុខនៅជាប់ជាមួយអ្នកជំងឺរាល់ថ្ងៃ ហានិភ័យមានគ្រប់នាទី។ ប៉ុន្តែជាតួនាទី ជាកាតព្វកិច្ចដើម្បីជួយបងប្អូនប្រជាពលរដ្ឋ លោកមិនគេចវេស គ្រាន់តែត្រូវប្រយ័ត្នគ្រប់ពេល។

និយាយពីការលំបាកនេះដែល ក្រៅពីការភ័យខ្លាច លោក ជ័យសូវ៉ាត លើកឡើងថា ក្រុមគ្រូពេទ្យទាំងអស់មានការលំបាកដូចៗគ្នា ទៅលើការស្លៀកពាក់ឯកសណ្ឋានការពារកូវីដ១៩នោះឯង។ លោកថា ឈុតមួួយនេះ លំបាកណាស់ ព្រោះវាមានសភាពតឹងណែន និងត្រូវពាក់ជាប់ច្រើនម៉ោងទៀត។

ដូច្នេះហើយ ក្នុងខ្លួនពោរពេញទៅដោយញើស ហើយពេលចូលទៅជួបអ្នកជំងឺម្ដង គឺលំបាកត្រង់ថា ហប់ហើយបែកញើសធ្វើឲ្យស្រអាប់វ៉ែនតា ពិបាកមើលអ្នកជំងឺណាស់។ ម្យ៉ាងទៀត លោកថា ការគ្រងឯកសណ្ឋាណ ក៏ធ្វើឲ្យលំបាកក្នុងការដកដង្ហើមដែរ។

ទោះយ៉ាងណា ដូចបញ្ជាក់ខាងលើ ជាកាតព្វកិច្ចគ្រូពេទ្យដូចជាលោក និងលោកគ្រូ អ្នកគ្រូពេទ្យដទៃទៀត គឺតាំងចិត្តក្នុងបេសកកម្មការងារដ៏លំបាកនេះ តែជាមួយគ្នា ក៏សង្ឃឹមថា បងប្អូនប្រជាពលរដ្ឋទូទៅ យកចិត្តទុកដាក់ការពារ ខ្លួនឯងឲ្យបានម៉ត់ចត់ ចៀសឲ្យបានកូវីដ១៩។ លោកថា ការពារខ្លួនឯង គឺស្មើនឹងជួយដល់ក្រុមគ្រួសារ និងសង្គមជាតិ៕