នាយកផ្នែកច្នៃប្រឌិតរបស់ BTS និងជាលោកគ្រូរាំ Son Sung Deuk តែងលើកសរសើរ Jungkook (BTS) មិនដាច់ពីមាត់ នូវចរិតដ៏ល្អ និង​សមត្ថភាពពិសេសគ្រប់សព្វពីកំណើត។ ពេល​នេះ​លោកបាន​វិលមកជាថ្មី ដោយលើកយករឿងថ្មីជាមួយនឹង Jungkook ទាក់ទង​នឹង​ការ​ធ្វើដំណើរទៅកាន់សហរដ្ឋអាមេរិក ដើម្បីហ្វឹកហាត់។

លោក Son Sung Deuk បានឲ្យដឹង​ថា​ វាពិតជាមានគម្រោងការងារជាបន្តបន្ទាប់ក្នុងការបង្កើតតន្ត្រីសម្រាប់ BTS ដូច្នេះលោកប្រធានបានគិតគូរយ៉ាងហ្មត់ចត់ និងរកឃើញថា វាពិតជា​រឿង​ចាំបាច់ណាស់ ក្នុងការទទួលយកបទពិសោធ ក៏ដូចជាវប្បធម៌ទាក់ទងនឹងវិស័យ Hip-Hop ដោយផ្ទាល់នៅ​អាមេរិក ព្រោះ​តែវិស័យនេះមាន​ដើមកំណើតនៅអាមេរិក។ P.D (Bang Si Hyuk) បាន​ប្រគល់ថវិកាឲ្យមក​លោក (Son Sung Deuk) និងសុំឲ្យលោកចាត់ចែងជ្រើសរើសអ្នកហ្វឹកហាត់ចំណូលថ្មី (Trainee) ពោលគឺអ្នកដែល​មាន​សក្ដានុពលខ្ពស់ ដើម្បីទៅកាន់សហរដ្ឋអាមេរិក ហើយពេលនោះ លោកក៏បានជ្រើសយក Jungkook តែម្ដង។

និយាយក្នុងបទសម្ភាសកាលពីពេលថ្មីៗនេះ លោកគ្រូបង្ហាត់រាំខាងលើ និងជាអ្នកដែលនៅពីក្រោយភាពជោគជ័យរបស់ BTS ម្នាក់ដែរនោះ បាន​ឲ្យដឹង​ថា៖ «គាត់ពិតជាបាន​ឲ្យលុយខ្ញុំ​មែន ហើយបាន​ស្នើឲ្យខ្ញុំ​នាំ Trainee ដែល​មាន​សក្ដានុពល​ខ្ពស់ ទៅសហរដ្ឋអាមេរិកជាមួយគ្នា។ ដូច្នេះ​ខ្ញុំ​គិតដល់ ​ថា​គួរនាំអ្នកណាទៅជាមួយ អ៊ីចឹង​ខ្ញុំ​ក៏សម្រេចជ្រើសយក Jungkook តែម្ដងទៅ។ Jungkook ធ្លាប់ជាមនុស្សដែលពូកែអៀនបំផុត មុនពេល Debut (ចូលសិល្បៈ) ប៉ុន្តែ​ក្រោយពីត្រឡប់ចូលប្រទេសកូរ៉េវិញ លោក​ប្រែជាមានភ្នែកខ្លា (ក្លៀវក្លា អង់អាច)។ ភ្លាមៗ គាត់អាច​យកឈ្នះ​បាន​ បញ្ចេញ​ទេពកោសល្យរបស់គាត់ កាន់តែអស្ចារ្យយ៉ាង​ឆាប់រហ័ស។ ក៏ព្រោះ​ Jungkook បាន​ក្លាយជា​ឧទាហរណ៍ដ៏ជោគជ័យនៅពេល​នោះ ដូច្នេះ​គ្រប់អ្នកហ្វឹកហាត់ចំណូលថ្មី​ទាំងអស់ក៏ត្រូវ​បាន​បញ្ជូនទៅសហរដ្ឋអាមេរិកជាបន្តបន្ទាប់នៅពេល​នេះ ហើយវា​ក៏ក្លាយជាវប្បធម៌នៃការបណ្ដុះបណ្ដាលអ្នកចូលថ្មី សម្រាប់ក្រុមហ៊ុន HYBE ដែរ»។

ទស្សនាវីដេអូពេញនៅទីនេះ៖

Son Sung Deuk គឺជាគ្រូបង្វឹកដែល​ឆ្នើម និង​តែង​ទទួល​បាន​ការ​កោតសរសើរមិនធម្មតា ផ្អែកលើភាពវៃឆ្លាត ​និងសមត្ថភាពដឹកនាំ បង្វឹកបង្ហាត់ក្រុមចម្រៀងបុរសធម្មតា ឲ្យវិវត្តទៅក្រុមចម្រៀងលំដាប់ពិភពលោក BTS៕