តារាសម្ដែង Park Min Young បាន​វិល​មកជា​ថ្មី ក្លាយជា​ប្រធានបទពេញ​បណ្ដាញ​សង្គម​នៅ​ថ្ងៃនេះ ក្រោយ​មាន​ដំណឹង​ចចាមអារ៉ាមថា​ នាងកំពុង​មាន​ទំនាក់ទំនងស្នេហាជាមួយនឹង​បុរសម្នាក់ដែល​មាន​ត្រកូល Kang ហើយជា​បុរសអ្នក​មាន​ទ្រព្យសម្បត្តិលំដាប់សេដ្ឋី។

នៅថ្ងៃទី២៨ ខែកញ្ញា ឆ្នាំ២០២២ ផលិតកម្ម Hook Entertainment បាន​ចេញ​មុខ​តបត​នឹង​បណ្ដាញសារព័ត៌មាន ទាក់ទងនឹងព័ត៌មានស្នេហារបស់តារាសម្ដែង Park Min Young។ ក្នុងសេចក្ដី​ដែល​បាន​ចេញ​ផ្សាយគឺ៖

«យើងកំពុង​ព្យាយាមទាក់ទងសុំការបញ្ជាក់ការពិតហើយ។ Park Min Young ពេល​នេះ​កំពុង​ជាប់ថតរឿង “love In Contract” របស់ប៉ុស្តិ៍ tvN ដូច្នេះ​ការ​បញ្ជាក់​ការពិតរបស់ពួកយើងអាច​នឹង​ត្រូវ​បាន​ពន្យារហើយ។ ពួកយើងសុំ​ការយោគយល់ពីអ្នកគ្រប់គ្នាផង ដែល​យើង​មិនអាច​ចេញ​សេចក្ដី​ថ្លែងការណ៍ណា​មួយឲ្យបាន​លឿន»។

ផ្អែក​តាម​បណ្ដាញ​សារព័ត៌មាន​បាន​ឲ្យដឹង​ថា​ Park Min Young កំពុង​ទាក់ទងស្នេហាជាមួយនឹង​ Mr. Kang អ្នក​ដែល​គេ​ដឹង​ថា​មាន​ទ្រព្យសម្បត្តិហូរហៀរ។ សារព័ត៌មាន​ខ្លះ​ថែម​ទាំង​ស៊ើបដឹង​ទៀតថា​ Mr. Kang ទំនង​ជា​ម្ចាស់លាក់មុខ របស់ Bithum (Platform ផ្លាស់ប្តូររូបិយប័ណ្ណគ្រីបតូធំទីពីររបស់កូរ៉េខាងត្បូង)។

បន្ថែម​ពីលើនេះ​ ក៏មាន​ការឲ្យដឹង​ដែរ​ថា Park Min Young ត្រូវ​បាន​គេ​ប្រទះឃើញថា កំពុង​រីករាយនឹងទំនាក់ទំនងជាមួយនឹង​ Mr. Kang នៅ​ផ្ទះខាងប្រុស។ ក្រៅពីនេះ គេ​សង្កេតឃើញថា Park Min Young បាន​ទៅកាន់វីឡាបុរសម្នាក់នេះ​ញឹកញាប់ដែរ ដើម្បីការងារមួយចំនួន ដែលផ្ទះនោះ​មាន​ទីតាំង​នៅក្នុង​តំបន់អភិជន Hannam The Hill។

យ៉ាងណា ព័ត៌មាន​ទាំងឡាយត្រឹមស្ថិតនៅ​ជា​ដំណឹងចចាមអារ៉ាម​នៅឡើយ ព្រោះគ្រប់គ្នានៅ​រង់ចាំ​ការបញ្ជាក់​ច្បាស់​ផ្លូវការ​ពី​សាមីខ្លួន​សិន៕