ថ្មីៗនេះ Wu Jing និងភរិយាបានបង្ហាញខ្លួនក្នុងកម្មវិធីប្រកួតក្បាច់គុន ដើម្បីលើកទឹកចិត្តកូនប្រុសច្បង Wu Yu (អាយុ ៩ ឆ្នាំ)។ តាមរយៈរូបភាពដែលត្រូវបានបង្ហោះ ដោយភរិយា Wu Jing បានឲ្យឃើញកូនប្រុសអាយុ ៩ ឆ្នាំរបស់ខ្លួន ពាក់ខ្សែក្រវាត់ខ្មៅពេលបង្ហាញក្បាច់គុនរួចទៅហើយ។

តាមរយៈរូបភាពទាំងនោះ កូនប្រុសរបស់តារាសម្តែងរូបនេះ​ បានបង្ហាញក្បាច់គុនយ៉ាងស្វាហាប់​និងមានភាពច្បាស់លាស់បំផុតនៅក្នុងការប្រកួត។ ក្រោយឃើញហើយ មហាជនភាគច្រើនពិតជាលាន់មាត់ថា កុមារារូបនេះពិតជាសមនឹងឈ្មោះជាកូនប្រុសរបស់ “ស្តេចគុន” មែន។

Wu Jing ត្រូវ​បាន​គេ​ស្គាល់​ថា​ជា​តារា​ក្បាច់​គុន​មួយ​រូប​ ឬ​ជា "ស្ដេច Bowx Office" ប្រចាំ​ភាពយន្ត​ចិន។ ក្នុងឆ្នាំ ២០១៣ លោកបានរៀបការជាមួយ ពិធីការិនី Xie Nan បន្ទាប់ពីមានទំនាក់ទំនងស្នេហានឹងគ្នាមួយរយៈ។ ក្នុងឆ្នាំ ២០១៤ ប្តីប្រពន្ធមួយគូនេះ បានស្វាគមន៍សមាជិកតូចដំបូងរបស់ពួកគេគឺកូនប្រុស Wu Yu។ ៤ ឆ្នាំក្រោយមក អ្នកទាំងពីរក៏ទទួលបាន​កូនប្រុសពៅម្នាក់ទៀត។

និយាយពីកូនប្រុសច្បង Wu Yu វិញ មហាជនបានសម្តែងការកោតសរសើរចំពោះ Wu Jing ដែលជាឪពុកយ៉ាងខ្លាំង ដោយ​សារ​តែការព្យាយាមក្នុងការបង្ហាត់ និងធ្វើជាគ្រូដ៏ល្អសម្រាប់កូន ហើយរឹតតែ​សរសើរកូន​ប្រុស ដែលជាក្មេង​ចេះ​ស្តាប់​បង្គាប់​ឪពុក​ម្ដាយ។

នៅវ័យក្មេងក៏ពិតមែន ក៏កុមារម្នាក់នេះ មិនចេះបង្ហាញ​ខ្លួន​ក្រអឺតក្រទម ឬ​មើលងាយ​អ្នកដទៃ​ឡើយ ទោះបី​ជា​កូនប្រុស​របស់​តារា​ល្បី​ឈ្មោះក៏ដោយ។ ផ្ទុយទៅវិញ ក្មេងប្រុសវ័យ ៩ ឆ្នាំនេះ មានភាពរួសរាយរាក់ទាក់ និងសណ្ដានចិត្តល្អជាមួយមនុស្សគ្រប់គ្នាបំផុត។

Wu Jing តែងតែយកចិត្តទុកដាក់លើ "គ្រឹះ" ក្នុងការអប់រំកុមារ។ ជាក់ស្តែង កាលពីពេលដែលកូនប្រុសច្បងរបស់ខ្លួនមានអាយុត្រឹមតែ ២ ឆ្នាំ លោកបានបង្រៀនកូនថា "កូនប្រុសហូរឈាមបាន ប៉ុន្តែមិនអាចស្រក់ទឹកភ្នែកបានទេ"។

ពេល​ណា​ដែលលោក​ ទំនេរពីការថតរឿង Wu Jing តែងចំណាយ​ពេល​លេង​ជាមួយ​កូន​ប្រុស​ជានិច្ច មិនខ្ចីសម្រាកយកកម្លាំងច្រើនឡើយ។ ជំនួសដោយការទិញប្រដាប់ប្រដាក្មេងលេងថ្លៃៗ លោក Wu Jing បាន​យកកម្លាំងបង្រៀនកូនឱ្យប្រើដំបង និងហាត់ក្បាច់បាតនៃក្បាច់គុនវិញ។

ដើម្បីឱ្យកូនៗរបស់លោក រៀនឯករាជ្យតាំងពីតូច Wu Jing ក៏បានចុះឈ្មោះ កូនច្បង Wu Yu ឲ្យ ចូលរួមជំរុំហ្វឹកហាត់រយៈពេល ១០ ថ្ងៃ។ ប្រពន្ធរបស់លោក ធ្លាប់បានថតសកម្មភាពកូន ដែលចេះរៀបចំអ្វីៗគ្រប់យ៉ាងដោយខ្លួនឯង តាំងពីការខ្ចប់អីវ៉ាន់ ការត្រៀមខ្លួនសព្វគ្រប់ រហូតដល់ការចូលជំរុំហ្វឹកហាត់។

ក្រឡេកមកមើលរូបភាពកូនប្រុសរបស់ Wu Jing ពាក់ខ្សែក្រវាត់ខ្មៅ ក្បាច់គុននៅចង្កេះ គ្រប់គ្នាត្រូវតែសរសើរ "ស្តេចក្បាច់គុន" សម្រាប់ការចិញ្ចឹមកូនបានល្អ ព្រោះថា ថ្វីត្បិតតែអាយុ ៩ឆ្នាំ ប៉ុន្តែកុមាររូបនេះ បានបង្ហាញសមត្ថភាពអស្ចារ្យ ក្នុងវិស័យសិល្បៈក្បាច់គុនទាំងស្រុង មិនអន់ជាងឪពុកដែលជាតារាល្បីរបស់ខ្លួនឡើយ។

នៅក្នុងបទសម្ភាសន៍មួយ លោក Wu Jing បានឲ្យដឹងថា ខ្លួនគាត់ផ្ទាល់បានសិក្សាក្បាច់គុនតាំងពីកុមារភាពមកម្ល៉េះ ហើយការរងរបួសរាប់មិនអស់ ដូចជាបាក់ដៃ និងជើង គឺជារឿងធម្មតា។ ប៉ុន្តែ​អរគុណ​ដល់​រឿង​លំបាកទាំងនេះ​ហើយ ទើប​តារា​ប្រុស​រូប​នេះ​សម្រេច​បាន​ជោគជ័យ​ដូច​សព្វ​ថ្ងៃ។ ហេតុនេះ Wu Jing ក៏​សង្ឃឹម​ថា កូន​នឹង​បាន​រៀនពីពាក្យថា ៖ «កូនចង់​រឹង​មាំ មិនត្រូវ​ខ្លាច​ឈឺ មិន​ខ្លាចប្រឈមនឹង​ទុក្ខដាច់ខាត»។

មនុស្សជាច្រើនបានទស្សន៍ទាយថា ឆាប់ៗនេះ កូនប្រុសរបស់ Wu Jing ​អាចនឹងមានរូបរាងអស្ចារ្យ ពេលធំឡើង ប្រកបដោយទេពកោសល្យសិល្បៈក្បាច់គុនខ្លាំង ហើយទំនងមិនអន់ជាងឪពុកឡើយ៕