ខ្សែភាពយន្តប្រភេទ Sci-Fi ដែល​មាន​ចំណងជើង​ថា «The Creator» កំពុង​ក្លាយជាភាពយន្តដែល​ល្បី​ដាច់គេនៅក្នុងពេល​នេះ ផ្អែក​ទៅ​លើសាច់រឿងបែបវិទ្យសាស្ត្រ និង​មាន ឈុត​ឆាក​ប្រយុទ្ធ​ដ៏គួរឲ្យចាប់អារម្មណ៍​ ខុសប្លែកពីរឿង​មុនៗរបស់អ្នកដឹកនាំរឿង Gareth Edwards ដែលគ្រប់គ្នា​ស្គាល់ច្បាស់តាមរយៈស្នាដៃដឹកនាំស៊េរីរឿង «Star Wars»។

ក្រៅពីសាច់រឿង​ដ៏ល្អ​នេះ​ហើយ អ្វី​ដែល​គ្រប់គ្នា​សម្លឹង​មើល​មិនព្រិចភ្នែក ក៏ផ្អែក​លើ​កត្តាតួ​សម្ដែង​ដែរ។ ដោយឡែក​ក្នុងចំណោម​តួសម្ដែង​ទាំងអស់របស់រឿងតួ​ក្មេងម្នាក់ដែល​មាន​ឈ្មោះថា «Alphie»។ ឥទ្ធិពលរបស់ Alphie នៅក្នុង «The Creator» ដើរតួយ៉ាងសំខាន់ក្នុងភាពយន្តប្រភេទ Sci-Fi នេះ ធ្វើឲ្យអ្នកតាមដានភាគច្រើន ពិសេសអ្នកដែល​យល់ពី AI និងយល់ពីអត្ថន័យរឿង ជក់ចិត្តខ្លាំង​បំផុត។

ក្រៅពីជាតួសំខាន់ រឿងពិតក្រៅឆាករបស់ Alphie ក៏នឹង​ធ្វើឲ្យអ្នកភ្ញាក់ផ្អើល ដោយសារនាងក៏មានសាច់ឈាមជាខ្មែរដែរ។

Madeleine Yuna Voyles គឺជាឈ្មោះពិតរបស់ Alphie ដែល​ឆ្នាំនេះ​នាងមានអាយុ ៩ឆ្នាំហើយ។ នាង​បាន​កើត និងធំដឹងក្ដីនៅទីក្រុង San Diego រដ្ឋ California សហរដ្ឋអាមេរិក។ នាងជាកូនកាត់បីសាសន៍ (ខ្មែរ, ថៃ និង​ឡាវ) និងក៏មានខ្សែស្រឡាយខាងអាឡឺម៉ង់អាមេរិកាំងដែរ។

នាងមានប្អូនស្រីម្នាក់ឈ្មោះ Arden Briar Voyles ដែលជាតារាសម្តែងផងដែរ។

ដ្បិតទើបបង្ហាញ​មុខក្នុងខ្សែភាពយន្តខ្នាតធំក៏ពិតមែន ប៉ុន្តែ Madeleine បានបង្ហាញ​គ្រប់គ្នា​ឲ្យដឹងថា នាងជាក្មេង​ដែល​មាន​សមត្ថភាពមិនធម្មតា ហើយអាស្រ័យដោយដុងធម្មជាតិមាន​មកតាំងពីកើតផង គ្មានអ្វីដែលប្រកែកបានទេ ថានាងជាក្មេងដែលពូកែ។

ដើម្បីស្វែងរកតួក្មេង AI ក្រុមការងារបានបើកការ ប្រកាសជ្រើសតួសម្ដែងជាលក្ខណៈទ្រង់ទ្រាយធំ ហើយទីបំផុតក៏បានរកឃើញតារាគុណភាព Madeleine Yuna Voyles ដែល Edwards ហៅថា "A director's dream" ឬ តួក្នុងក្ដីស្រមៃរបស់អ្នកដឹកនាំរឿង។

Edwards ពន្យល់ថា៖ "យើងទទួលបានខ្សែអាត់ពីក្មេងៗរាប់រយនាក់នៅជុំវិញពិភពលោក។ បន្ទាប់មកខ្សែអាត់ត្រូវបានបង្រួមទៅ TOP70 ហើយក្រោយមកចម្រាញ់សល់ TOP10។ មនុស្សដំបូងដែលធ្វើ Audition គឺ Madeleine ហើយពេលចូលមកភ្លាម នាងធ្វើឲ្យគ្រប់គ្នា​ស្គាល់ពីភាពអស្ចារ្យតែម្ដង"។

អ្នកដឹកនាំរឿងបានបន្តទៀតថា លោក និងអ្នកគ្រប់គ្នាដែលបានឃើញពីការប្រកួត Audition ​របស់ Madeleine បានធ្វើឱ្យពួកគេស្រក់ទឹកភ្នែក។ ក្រោយនាងចេញពីបន្ទប់ លោក និងជំនួយការមើលមុខគ្នា ហើយពួកគេលាន់មាត់ដូចគ្នាថា ថា "កូនហ្នឹងហើយ"។

Madeleine បានឆ្លងកាត់ការធ្វើ Audition សម្រាប់រឿង «The Creator» នៅពេលនាងមានអាយុ ៦,៥ ឆ្នាំ ហើយពេលថតនាងមានអាយុ ៧ ឆ្នាំប៉ុណ្ណោះ។

Madeleine គឺជាតារាសម្តែងតូចដែលមានជំនាញវិជ្ជាជីវៈ ឧស្សាហ៍ព្យាយាម និងមានទេពកោសល្យបំផុត៕