មិនធម្មតារឿង "ប្រុសលក់ខ្លួន" រកលុយតែ៤ថ្ងៃសោះ បានជាង ៨០០លាន ត្រៀមបំបែកកំណត់ភាពយន្តបរទេស១ទៀត

2023-11-16 02:56:52
ព័ត៌មាន

2023-11-16 02:56:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រវត្តិសាស្ត្រថ្មីក្នុងវិស័យភាពយន្តខ្មែរ បានកើតឡើងហើយ ក្រោយភាពយន្តក្នុងស្រុកមួយរឿងមានចំណងជើងថា "ប្រុសលក់ខ្លួន" រកលុយបានយ៉ាងច្រើនសន្ធឹកសន្ទាប់ក្នុងរយៈពេលតែ ៤ថ្ងៃប៉ុណ្ណោះ។

រឿង "ប្រុសលក់ខ្លួន" ឬ រ៉េនប៊យ ផលិតដោយផលិតកម្ម អិលឌី ភីកឈ័រ ដែលមានស្នាដៃផលិតភាពយន្តទទួលបានការគាំទ្រជាច្រើនរឿងរួចមកហើយ។ រឿងនេះប្រមូលផ្ដុំដោយតួសម្ដែងវ័យក្មេង ស្អាតស្អាត ពេញនិយមក្នុងចង្កោមយុវវ័យ។ ពិសេសមានតួសម្ដែងមកពីភូមា និងថៃមួយចំនួនទៀតក៏បានចូលរួមសម្ដែងជាមួយគ្នាដែរ។

ជាលទ្ធផល ខាត់ វ៉ៃហាំង កញ្ញា ពេជ្រ វត្តី និងតារាសម្ដែងជនជាតិភូមា លោក ប៉ាំង តាកន បានកញ្ឆក់យកការគាំទ្រយ៉ាងច្រើនស្ទើរមិនគួរឲ្យជឿ ដោយបានធ្វើឲ្យរឿងនេះ ប្រមូលលុយពីការលក់សំបុត្រយ៉ាងច្រើនសន្ធឹកសន្ធាប់ក្នុងរយៈពេលត្រឹមតែ ៤ថ្ងៃ ក្នុងសប្ដាហ៍ដំបូងនៃការចាក់បញ្ចាំង។

តាមលោក លៀក លីដា ចាងហ្វាងផលិតកម្ម អិលឌី ភីកឈ័រ បានឲ្យដឹងថា រឿង "ប្រុសលក់ខ្លួន" រកចំណូលពីការលក់សំបុត្រក្នុងរយៈពេល ៤ថ្ងៃ បានចំនួន ៨០០លានរៀល ដែលធ្វើឲ្យលោករីករាយ និងមោទនភាពយ៉ាងខ្លាំង។ នេះជាតួលេខមិនធ្លាប់មានទេក្នុងប្រវត្តិសាស្ត្រភាពយន្តក្នុងជាង ១ទសវត្សរ៍មកនេះ។

លោក លីដា ថ្លែងទៀតថា ប្រាក់ចំណូលប៉ុណ្ណេះ ក្នុងរយៈពេលប៉ុណ្ណឹង គឺបានប្រមាណ ២០ភាគរយនៃការរំពឹង ហើយវាបានធ្វើឲ្យលោកមានក្ដីសង្ឃឹមមុតមាំថា ភាពយន្តរបស់លោក នឹងអាចបំបែកកំណត់ត្រាភាពយន្តបរទេសមួយរឿង ដែលធ្លាប់រកចំណូលសរុបបានដល់ ១លានដុល្លារអាមេរិក។

ដោយបានការគាំទ្រយ៉ាងគំហុកពីអ្នកគាំទ្រ ដែលលោកចាត់ទុកថា វត្ថុធាតុដើមដ៏សំខាន់ក្នុងការលើកស្ទួយភាពយន្តក្នុងស្រុក លោក លៀក លីដា មានជំនឿថា "ប្រុសលក់ខ្លួន" ឬ រ៉េនប៊យ នឹងអាចឡើងលើ បក់អូហ្វីស បានដូចភាពយន្តអន្តរជាតិមួយរឿងកាលពីអតីតកាលដែរ។

ផលិតករដដែល បញ្ជាក់ថា លទ្ធផលនៅពេលនេះ ជាដើមទុនដ៏សំខាន់មួយ សម្រាប់ជំរុញលើកទឹកចិត្តរបស់លោក ក្នុងការបន្តផលិតរឿងក្នុងផែនការដ៏ធំមួយបន្តទៀត៕