អស់ការអត់ធ្មត់! ណូយ វ៉ាន់ណេត ឲ្យមេធាវីសហការជាមួយមន្ដ្រីក្រសួងមហាផ្ទៃ ចាត់ការអ្នកប្រមាថជីវិតលោក

2024-04-24 08:48:27
ជីវិតតារា

2024-04-24 08:48:27
ចំនួនមតិ 0 | ចំនួនចែករំលែក 0

ចន្លោះមិនឃើញ

មិនមែនជាលើកទីមួយទេដែលជនខិលខូចបានប្រើបណ្ដាញសង្គម ដើម្បីវាយប្រហារ ឬប្រមាថអាយុជីវិតលើសិល្បករ។ ក្រៅពីវីរសិល្បករចម្រៀងអាយ៉ៃ ព្រហ្ម ម៉ាញ ឥឡូវនេះបានរលដាលដល់តារាចម្រៀងជើងចាស់ ណូយ វ៉ាន់ណេត ទៀត។

គណនីTiktok ឈ្មោះ Bong Nha បានបង្ហោះរូបលោក ណូយ វ៉ាន់ណេត កាន់ក្បាលម៉េក្រូច្រៀង ដោយភ្ជាប់អក្សរ RIP ដែលសំដៅដល់ការស្លាប់ ហើយសូមឲ្យវិញ្ញាណក្ខន្ធរបស់លោកបានទៅកាន់សុគតិភព ត្រូវគេចែករំលែក ហើយចោទជាចម្ងល់យ៉ាងច្រើនថាតើរឿងនេះពិត ឬមិនពិត។ ប៉ុន្ដែម្ចាស់គណនីមិនបានចូលឆ្លើយតបអ្វីឡើយ ហើយការបង្ហោះនោះក៏បានចែករំលែកគ្នាជាបន្ដបន្ទាប់ទៀតឡើងផ្អើលលើបណ្ដាញសង្គម។

ជុំវិញការប្រមាថនេះ លោក ណូយ វ៉ាន់ណេត បញ្ជាក់តាមរយៈ Sabay នៅរសៀលថ្ងៃទី២៤ ខែមេសា ឆ្នាំ២០២៤ ថា រូបលោកនៅមានជីវិត ហើយពុំមានឈឺអ្វីឡើយ កំពុងរវល់នៅស្រុកកៀនស្វាយ។ រូបលោកផ្ទាល់បានទទួលដំណឹងនេះប្រមាណ ២សប្ដាហ៍ហើយ ហើយបានត្រៀមមេធាវីប្រមូលភស្តុតាង ដើម្បីសហការជាមួយមន្ដ្រីជំនាញបច្ចេកវិទ្យា ក្រសួងមហាផ្ទៃ ដើម្បីចាត់ការលើបុគ្គលដែលប្រមាថអាយុជីវិតលោក។

លោក ណូយ វ៉ាន់ណេត្ដ៖ "ស្អែក ឬខានស្អែកអី...ខ្ញុំមានពេលបន្ដិចនឹងLive បកស្រាយហើយ ហើយឲ្យមេធាវីរបស់ខ្ញុំប្រមូលភស្តុតាងជាមួយសមត្ថកិច្ចចាត់ការវាម្ដង...និយាយទៅវា(ជនខិលខូច)បំពុលរហូតមិនមែនទើបតែម្ដងហ្នឹងទេ ពួកអស់ហ្នឹងទាល់តែធ្វើឲ្យដឹងម្ដង។ ខ្ញុំអីណាស្លាប់ ខ្ញុំនៅច្រងោៗនៅកៀនស្វាយណេះ"។

ដំណឹងអកុសល្យ ឬការប្រមាថលើជីវិតរបស់តារាចម្រៀង ណូយ វ៉ាន់ណេត នៅពេលនេះ គឺបង្កើតការងឿងឆ្ងល់ដល់មន្ត្រីរាជការ និងសិល្បករ-សិល្បការិនីជាច្រើន ដោយអ្នកខ្លះមិនទាន់ដឹងរឿងច្បាស់បានត្រឹមបញ្ចេញសារស្រងេះស្រងោច ហើយបន្តស្វែងរកការពិត។ ប៉ុន្តែតាមរយៈដំណឹងពីសាមីខ្លួនដែលបានបញ្ជាក់នៅពេលនេះ អាចជម្រះមន្ទិលរបស់មហាជនខ្លះហើយ បើទោះបីជាលោកមិនទាន់បានចេញមុខបកស្រាយ ឬបញ្ចេញសារអ្វីសោះនៅលើបណ្ដាញសង្គម ដើម្បីកុំឲ្យមានអ្នកបន្តយល់ច្រឡំថាលោកស្លាប់៕

ជិន សុភ័ក្ដ្រ