មួយថ្ងៃបន្ទាប់ពីក្រុមហ៊ុន រស្មីហង្សមាស បានបង្ហោះ​លើ​ទំព័រហ្វេសបុក​ផ្លូវការ ស្នើ​សុំការអធ្យាស្រ័យពីសំណាក់មហាជន ពី​បញ្ហា​បច្ចេកទេស​​ពិសេស​អតិថិជន​និង​អ្នក​គាំទ្រ​កំពូល​តារា​ចម្រៀង​ចាស់​វស្សា​ខ្លួន ​ដែលទទួល​បាន​ការ​ខក​ចិត្ត​ពី​ការ​​ទិញ​សំបុត្រ​ចូលទស្សនា "The Q- Rise of The Queen - Aok Sokunkhanha Solo Concert" ​តាមរយៈ BOOKME+ ដោយអ្នកខ្លះបង់ប្រាក់បានជោគជ័យហើយ ប៉ុន្ដែមិនទាន់ទទួលបានQR ដើម្បីចូលទស្សនា ស្រាប់តែនៅថ្ងៃទី៣ ខែកញ្ញា ឆ្នាំ២០២៤ នេះ ​BOOKME+ បានចេញលិខិតសូមទោស និងទទួលស្គាល់កំហុសជាផ្លូវការបន្ថែមទៀត។

ទោះ​ជា​មាន​ការ​បកស្រាយហូរហែរ​លើ ជុំវិញ​បញ្ហា​បច្ចេកទេស​ដែល​អ្នក​ទិញ​សំបុត្រ​មួយចំនួន​មិន​អត់​ទទួល​កៅអីចូល​ទស្សនា បែរ​ជា​កាត់​លុយ​ពី​កុង​ធនាគារ ឬគាំង​កម្មវិធី​ដោយ​មិនមាន​ដំណោះស្រាយ​ភ្លាមៗ ហើយ​គិត​មក​ដល់​ម្សិលមិញ​និង​ថ្ងៃ​នេះ ខាងក្រុមការងារ​ទទួលខុសត្រូវ​សំបុត្រ បាន​បញ្ជូន​ប្រាក់​ទិញ​សំបុត្រ​ហើយ​ក្ដី ក៏អ្នក​គាំទ្រ កំពូល​តារា​ចម្រៀង​រះត្រដែត សុគន្ធ​កញ្ញា នៅ​មិន​ទាន់​ស្ងប់ចិត្តនៅឡើយ។ ​

ដើម្បី​កែប្រែ​ការ​លក់​សំបុត្រ​ពី​ការ​តម្រង់ជួរ​ទូទៅបង្ក​ផល​វិបាក​ដល់​អ្នក​គាំទ្រ​កំពូល​តារា​ចម្រៀង​ស្រី​ខ្លួន ក្រុមហ៊ុន​រស្មីហង្សមាស មាន​ជ្រើសរើស BookMe+ ជា​ដំណោះស្រាយ​លក់​សំបុត្រ​បែប​ឌីជីថល កាល​ពី​ថ្ងៃ​ទី ២៨ សីហា ២០២៤ កន្លង​ទៅ ទៅតាម​ចំនួន​កំណត់​ត្រឹម​ប៉ុន្មាន​ពាន់​សន្លឹក សម្រាប់​កម្មវិធីប្រគំ​តន្ត្រី​ជា​ប្រវត្តិសាស្ត្រ​ "The Q- Rise of The Queen - Aok Sokunkhanha Solo Concert" ដែលនឹងប្រព្រឹត្តទៅនៅថ្ងៃទី១៤ ខែកញ្ញា ឆ្នាំ ២០២៤ ខាងមុខនេះ។ ដោយ​បរិមាណ​អ្នក​ចូល​ទៅ​ App BookMe+ សម្រុក​ចូល​ទៅ​ទិញ​គំហុក រហូត​ដល់​ការ​រំពឹង​ទុក​រាប់​សិប​ដង ទើប​បណ្ដាល​ឲ្យ​ប្រព័ន្ធ​គាំង ក្រោយ​អស់​ចំនួន​សំបុត្រ។​

ឆ្លើយតប​នឹង​បញ្ហា​នេះ ​BookMe+ ​នៅរសៀលថ្ងៃទី៣ ខែកញ្ញា នេះ បាន​ចេញ​លិខិត​សុំ​ទោស​និង​ទទួល​ស្គាល់​កំហុស​ជា​ចំហដោយមានខ្លឹមសារថា ​ដោយមានការគាំទ្រយ៉ាងច្រើនលើសលប់ ជាមួយនឹងការបញ្ជាទិញសំបុត្រដ៏ច្រើនលើសពីការរំពឹងទុក ក្នុងពេលខ្លីតែមួយ ពីសំណាក់អ្នកគាំទ្រ បានបណ្តាលឱ្យមានបញ្ហាបច្ចេកទេសមួយចំនួនបានកើតឡើងរួមមាន៖ “ភាពរអាក់រអួលនៃការភ្ជាប់ទំនាក់ទំនងពីកម្មវិធីទូរស័ព្ទដៃរបស់យើង ទៅកាន់ប្រព័ន្ធបង់ប្រាក់ និង ដៃគូពាក់ព័ន្ធនានា ដែលបង្កឱ្យជាហេតុបណ្តាលឱ្យអតិថិជនមួយចំនួនបានជួបនឹងបញ្ហាការបង់ប្រាក់បានជោគជ័យ ប៉ុន្តែពុំទទួលបាននូវ QR ត្រឡប់ទៅវិញ”។ ក្រុមការងារ BookMe+ សូមអភ័យទោស និងពិតជាមានការសោកស្តាយ ចំពោះកំហុសបច្ចេកទេសទាំង អស់ ដែលបានកើតមានឡើងក្នុងប្រតិបត្តិការបញ្ជាទិញសំបុត្រមួយនេះ។ ទោះជាយ៉ាងណា ក្រុមការងារបានព្យាយាមអស់ពីកម្លាំងកាយចិត្តក្នុងការដោះស្រាយ និងសម្របសម្រួលបញ្ហានានាដែលបានកើតឡើងទាំងអស់។

ក្រុមការងារសង្ឃឹមថា បណ្តាសាធារណជន ជាពិសេសអ្នកគាំទ្រទាំងអស់ នឹងផ្តល់ក្តីអនុគ្រោះដល់ក្រុម ការងាររបស់APP នឹងផ្តល់ឱកាសដល់ App បង្កើតក្នុងស្រុកមួយនេះ ក្នុងការបន្តអភិវឌ្ឍខ្លួនទៅរកភាពល្អប្រសើរជាងមុន។

ទន្ទឹមគ្នានឹងការចេញមុខទទួលកំហុស និងសូមទោសចំពោះអតិថិជន BookMe+ ក៏សូមថ្លែងអំណរគុណដល់ក្រុមហ៊ុន រស្មីហង្សមាស ដែលបានផ្តល់ឱកាសមួយនេះមកក្រុមការងារ BookMe+ ដែលស្តែងចេញពីទឹកចិត្តគាំទ្រអាជីវកម្មជំនាន់ក្រោយ និងលើកស្ទួយវិស័យឌីជីថលឱ្យឈានដល់ទីផ្សារ អន្តរជាតិនាពេលអនាគត។ ក្រុមការងារសង្ឃឹមយ៉ាងមុតមាំថា សាធារណជននឹងបន្តគាំទ្រការប្រគំតន្ត្រីដ៏ធំមួយនេះ ដើម្បីទទួលបាននូវភាពសប្បាយរីករាយជាមួយទស្សនីយភាពដ៏អស្ចារ្យ។

ទាក់ទងបញ្ហានេះ ក្រុមហ៊ុន រស្មីហង្សមាស ក៏មានការភ្ញាក់ផ្អើល ហើយថាវាជាលើកទី១ក្នុងប្រទេសកម្ពុជាដែលមនុស្សរាប់ម៉ឺននាក់សម្រុកចូលវ៉ិបសាយ ដើម្បីទិញសំបុត្រក្នុងពេលតែមួយលើសពីការរំពឹងទុករបស់ខ្លួន។ ការនេះ បានបង្ហាញកាន់តែច្បាស់ថា ការគាំទ្រវិស័យសិល្បៈ តាមរយៈព្រឹត្ដិការណ៍ដែលនឹងធ្វើនៅពាក់កណ្ដាលខែកញ្ញាខាងមុខនេះ នឹងមានការគាំទ្រយ៉ាងផុលផុសពុំធ្លាប់មានពីមុនមក៕