ធ្លាយងារជំទាវភ្លាម អតីតតារាចម្រៀង សន សុម៉ាឡែន សម្រុកធ្វើទាន

2017-01-15 01:42:28
ជីវិតតារា

2017-01-15 01:42:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ទើបតែចែកទានដល់ពលរដ្ឋនៅកំពង់ស្ពឺ និង តាខ្មៅអស់ជាង៣ពាន់ដុល្លារកាលពីជាង១សប្ដាហ៍មុន អតីតតារាចម្រៀង សន សុម៉ាឡែន ដែលបច្ចុប្បន្នមានងារជាជំទាវ បាននាំអំណោយ ទៅចែកក្មេងសិស្សសាលា លោកគ្រូ អ្នកគ្រូ ចាស់ជរា នៅខេត្តកំពត អស់ជិត៣ពាន់ដុល្លារថែមទៀត កាលពីម្សិលមិញនេះ។

អំណោយទាំងអស់នោះ មិនខុសពីការចែកកន្លងមកទេ គឺមានប៊ិច សៀវភៅ ខ្មៅដៃ នំប៉័ង សារ៉ុង និងថវិកាជាដើម ដោយអតីតជយលាភីលេខ១កម្មវិធីប្រលងចម្រៀងរបស់ប៉ុស្ដិ៍លេខ៥ ក្នុងឆ្នាំ១៩៩៨ រូបនេះ បាននាំតារា១ក្រុមមានកញ្ញា លឹម មួយហ្គិច កញ្ញា ណា សាឌី កញ្ញា នាថ កញ្ញា អ៊ីឈាន និង កញ្ញា ស្រីពេជ្រ ទៅចែកជូនក្មេងសិស្សសាលា លោក គ្រូ អ្នកគ្រូ ចាស់ជរា ជាង៥០០នាក់ ដែលស្ថិតក្នុងភូមិ ត្រពាំងរាំង ឃុំអង្គរមាស ស្រុកដងទង់ ខេត្ត កំពត។

លោក ជំទាវ ថ្លែងថា មូលហេតុដែលនាំឲ្យលោកជំទាវ សម្រុកធ្វើទានញឹកញាប់បែបនេះ ក៏ព្រោះតែចង់ឲ្យរាសីឆ្នាំនេះគឺល្អ។ អ្វីដែលពិសេសនោះលោក ជំទាវ ចង់ធ្វើបុណ្យឧទ្ទិសកុសលដែលបានធ្វើទៅជូនកូនប្រុស ឈ្មោះ ឡយ យុទ្ធរ៉ា របស់លោកជំទាវដែលបានស្លាប់កាលអំឡុង៣ឆ្នាំមុខ។

អតីតតារាចម្រៀង សន សុម៉ាឡែន មានកូនតែម្នាក់គត់ បន្ទាប់ពីបោះបង់ចោលសិល្បៈមករៀបការជាឧកញ៉ាម្នាក់។ ទោះបីជាបច្ចុប្បន្នអតីតតារាចម្រៀងរូបនេះបានដកខ្លួនពីសិល្បៈក្ដី ប៉ុន្តែនៅតែជួយដល់សិល្បៈទីទ័លក្រ មានជំងឺ ជាបន្តបន្ទាប់ ដោយការជួយនោះភាគច្រើនតាមរយៈ សមាគមសិល្បៈ ដែលតែងតែប្រកាសឲ្យជួយអ្នកសិល្បៈដែលខ្វះខាត។

លោកជំទាវបានឲ្យដឹងថា ធ្លាប់ជួយអ្នកសិល្បៈច្រើននាក់មកហើយ ប៉ុន្តែលោកជំទាវមិនដែលចេញមុខឡើយ ហើយឆាប់ៗខាងមុខនេះ លោក ជំទាវគ្រោងដឹកនាំអ្នកសិល្បៈ យកនាំអំណោយមួយចំនួនទៀត ទៅជួយដល់សមាគមចលនាវប្បធម៌ជាតិដើម្បីកុមារកំព្រាក្រីក្រ ហៅកាត់ថា NACOPCA របស់លោកតា ហ៊្វុយសូ ថែមទៀត។

អតីតតារាចម្រៀង សន សុម៉ាឡែន បានចូលសិល្បៈកាលពី ១៩៩៨ បន្ទាប់ពីប្រលងជាប់លាភីលេខ១កម្មវិធីប្រលងចម្រៀងរបស់ប៉ុស្ដិ៍លេខ៥។ អតីតតារាចម្រៀងរូបនេះធ្លាប់មានឈ្មោះល្បី ជំនាន់ អ្នកនាង ពេជ្រ ច័ន្ទបូរមី អ្នកនាង ឳក បូរី ជំទាវ ស្រីតូច ចំណាន ជាដើម ដោយទីផ្សារចម្រៀងភាគច្រើនតែតាមកញ្ចក់ទូរទស្សន៍។

ជាមួយអាជីពតារាចម្រៀង សន សុម៉ាឡែន ធ្លាប់បានទៅច្រៀងនៅ ប្រទេស ញូវហ្សេលែន ម្ដងក្នុងអំឡុងឆ្នាំ២០១១ ហើយបន្ទាប់ពីត្រឡប់ពីការច្រៀងវិញ លោក ជំទាវ ក៏សម្រេចបោះបង់ចោលសិល្បៈតែម្ដង៕