- 2017-02-13 09:46:15
- ជីវិតតារា
ដឹងអ្វីខ្លះពីអ្នកស្រី Lin ភរិយា ឈិន ឡុង?
- 2017-02-13 09:46:15
- ចំនួនមតិ 0 | ចំនួនចែករំលែក 0
ដឹងអ្វីខ្លះពីអ្នកស្រី Lin ភរិយា ឈិន ឡុង?
ចន្លោះមិនឃើញ
ចំពោះរឿងរ៉ាវរបស់តារាសម្ដែងក្បាច់គុនហុងកុង Jackie Chan ជឿជាក់ថា មានប្រិយមិត្តដឹងច្រើន ព្រោះលោកជាបុគ្គលល្បីឧស្សាហ៍លេចមុខលើសារព័ត៌មាន ដោយសារតែស្នាដៃសម្ដែង។ ប៉ុន្តែចំពោះប្រវត្តិភរិយារបស់ Jackie វិញគឺពិតជាកម្រមានអ្នកដឹងណាស់ ថាអ្នកស្រីជួបរឿងសប្បាយ និងទុក្ខលំបាកបែបណាខ្លះ។
ប្រវត្តិផ្ទាល់ខ្លួននិងមង្គលការ
អ្នកស្រី Joan Lin កើតនៅថ្ងៃទី ៣០ ខែ មិថុនា ឆ្នាំ ១៩៥៣ បច្ចុប្បន្នមានអាយុ៦៣ឆ្នាំ។ អ្នកស្រី គឺជាអតីតតារាសម្ដែងជើងចាស់តៃវ៉ាន់។ Lin ជាកូនទី២ ក្នុងចំណោម៥នាក់ក្នុងគ្រួសារ ហើយនាងបានបោះបង់ការសិក្សាតាំងពីអាយុ១២ឆ្នាំ ដោយភាពក្រីក្ររបស់គ្រួសារ។ ក្នុងឆ្នាំ១៩៧២ ពេលអាយុ១៩ឆ្នាំ Lin ចាប់ផ្ដើមថតរឿងដំបូងមានចំណងជើងថា “The Hero of Chiu Chow” ជាប្រភេទរឿងកុងហ្វូ។
ឆ្នាំ១៩៧៩ អតីតតារាស្រីរូបនេះធ្លាប់ទទួលបានពាន "Best Leading Actress" ក្នុងកម្មវិធី Golden Horse Awards លើទី១៦ បន្ទាប់ពីសម្ដែងក្នុងរឿង “The Story of a Small Town” ។ ប្រឡូកក្នុងសិល្បៈ១០ឆ្នាំ តារាកើតចេញពីគ្រួសារក្រីក្ររូបនេះ សម្ដែងបានជាង៧០រឿង។
Joan Lin ជួប Jackie Chan នៅឆ្នាំ១៩៨១ នៅឆ្នាំបន្ទាប់ អ្នកទាំងពីរបានរៀបការជាមួយគ្នាក្នុងទីក្រុង Los Angeles ដោយបង្កើតបានកូនប្រុសម្នាក់ឈ្មោះ Jaycee Chan (បច្ចុប្បន្នជាតារាសម្ដែង និងចម្រៀង)។ បន្ទាប់ពីផ្ដល់កំណើត Lin បោះបង់អាជីពតារាសម្ដែងចោលតែម្ដង។
ជីវិតត្រូវប្ដីក្បត់
កន្លងទៅ ឈិន ឡុងធ្លាប់បាននិយាយថា លោកនិង Joan Lin វិះលែងលះគ្នាកាលពីឆ្នាំ១៩៩៩ ពេលដែលលោកធ្វើឲ្យមិត្តស្រី Elaine Ng មានផ្ទៃពោះ។ ដោយសាររវល់ការងារថត Jackie បានចេញថតនៅគ្រប់ទិសទី ឯភរិយានៅផ្ទះដើម្បីមើលថែកូន។
ប៉ុន្តែថ្ងៃមួយ ព័ត៌មាន Elaine Ng មានផ្ទៃពោះជាមួយ Jackie ក៏បានផ្ទុះឡើង។ តារាប្រុសជួរមុខហុងកុងនេះដឹងខ្លួនថា គេបានប្រព្រឹត្តិកំហុសដ៏ធំ ដែលភរិយាមិនអាចលើកលែងបានឡើយ។ Chan បានរាយរ៉ាប់ជាសំណេរថា៖ "ខ្ញុំចង់ទូរសព្ទទៅប្រពន្ធណាស់ ប៉ុន្តែមិនដឹងថាគួរនិយាយបែបម៉េច។ ខ្ញុំមិនអាចពន្យល់ពីកំហុសឆ្គងនេះបានទេ។ ការនិយាយពាក្យសុំទោស គឺមិនគ្រប់គ្រាន់ឡើយ"។
បន្ទាប់មកគេគិតថា មិនបាច់ពន្យល់អ្វីទេ មានតែលែងលះប៉ុណ្ណោះ។ ចុងក្រោយ Jackie Chan ចេញសុំទោសក្នុងសន្និសីទកាសែត ចំពោះកំហុសដ៏ធំនេះ។ ត្បិតតែមានមនុស្សជាច្រើនរិះគន់លោក ប៉ុន្តែអ្នកស្រី Lin សម្រេចចិត្តលើកលែងទោសឲ្យប្ដី។ ដូច្នេះបំណងលែងលះរបស់អ្នកទាំងពីរក៏បានរសាត់បាត់ទៅ៕
