ឆុំ វត្តី ប្រកាសចង់សម្ដែងតួមួយ ដែលខ្លួនមិនធ្លាប់ហ៊ានសម្ដែងសោះ

2017-08-31 04:15:07
ជីវិតតារា

2017-08-31 04:15:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រលូកក្នុងវិស័យសិល្បៈអស់រយៈពេលជាច្រើនឆ្នាំមកនេះ តារាសម្ដែង និងម៉ូដែល ឆុំ វត្តី ប្រាប់ Sabay ថា នាងសម្ដែងស្ទើរគ្រប់រសជាតិហើយ នៅតែប្រភេទរឿងមួយទេដែលនាងមិនទាន់បានសម្ដែង និងកំពុងពិចារណាថាសាកសម្ដែងម្ដងក្នុងថ្ងៃណាមួយ។

នាងនិយាយថា៖ "រឿងប្រភេទអី តួបែបណាក៏ខ្ញុំធ្លាប់សម្ដែងរួចហើយ មិនថាតួស្លូត កាច ស្រគត់ស្រគំ ក្រមិចក្រមើម ឡប់ៗ ឬតួវ៉ៃនោះទេ ខ្ញុំថែមទាំងបានសម្ដែងក្នុងរឿងបុរាណទៀត តែរឿងដែលខ្ញុំមិនធ្លាប់សម្ដែងសោះគឺរឿងខ្មោច"។

វត្តី លើកឡើងពីមូលហេតុថា បានជានាងមិនធ្លាប់បង្ហាញវត្តមានក្នុងរឿងខ្មោច ព្រោះនាងជាមនុស្សម្នាក់ដែលខ្លាចខ្មោចខ្លាំង ដូច្នេះតាំងពីមុនមកនាងមិនហ៊ានសម្ដែងឡើយ។ ទោះជាមានភាពភ័យខ្លាចបែបនេះក្ដី ស្រីស្អាតដែលទើបតែភ្លក់រសជាតិជាតួវាយតប់បែបកងទ័ពសម័យបុរាណ និងកងអាវុធហត្ថដែលស្ពាយកាំភ្លើងធំៗរូបនេះបន្ថែមថា៖ "ចាំមើល៍ បើមានអ្នកទាក់ទងឲ្យទៅថតលើកក្រោយទៀត ខ្ញុំនឹងសាកល្បង តែត្រឹមតែថតក្នុងរឿងខ្មោចទេ បើសម្ដែងជាតួខ្មោចតែម្ដង គឺមិនទាន់ហ៊ានឡើយ"។

ឆុំ វត្តី គឺអតីតបេក្ខនារីក្នុងកម្មវិធី "ស្រីឆ្លាត ប្រុសឆ្លាត" ឆ្នាំ ២០០៨ ដែលរៀបចំដោយទូរទស្សន៍ CTN។ កាលណោះ នាងមិនបានជាប់ជយលាភីទេ គ្រាន់តែបានចូលរួមប្រកួតដល់វគ្គ ១០នាក់ចុងក្រោយ។ បែបនេះក្ដី នាងក៏ចាប់ផ្ដើមមានការងារសិល្បៈជាបន្តបន្ទាប់ ដូចជាការងារសម្ដែង និងដើរម៉ូដ។

នៅអំឡុងឆ្នាំ ២០០៩ នាងបានផ្អាកសិល្បៈរយៈពេលប្រមាណ៥ឆ្នាំ ទម្រាំវិលចូលមកវិញនៅឆ្នាំ២០១៥ និងបានសម្ដែងរឿងជាច្រើនដូចជា "សាកលវិទ្យាល័យកំណើតស្នេហ៍" “វិកលចរិត" “ខ្សែកពេជ្រ" “ឈាមស្នេហ៍ក្បត់បេះដូង" “វរសេនីយ៍កំពូលស្នេហ៍" "អាគមស្បែកដាច" និងរឿងដែលគួរចាប់អារម្មណ៍ គឺរឿង "ហ្លួងព្រះស្ដេចកន"៕

អត្ថបទ៖ សុខណា