- 2017-10-08 02:56:44
- ព័ត៌មាន
យុវតីវ័យ១៨ឆ្នាំ ត្រៀមយកពិណទៅសម្ដែងលើកឆាកអន្តរជាតិច្រើនប្រទេស
- 2017-10-08 02:56:44
- ចំនួនមតិ 0 | ចំនួនចែករំលែក 0
យុវតីវ័យ១៨ឆ្នាំ ត្រៀមយកពិណទៅសម្ដែងលើកឆាកអន្តរជាតិច្រើនប្រទេស
ចន្លោះមិនឃើញ
ក្រោយពីពិណបានបាត់រូបរាងជិត១ពាន់ឆ្នាំមក យុវតីវ័យក្មេង ស្ងួនកវី សេរីរ័ត្ន ជាមនុស្សដំបូងគេបង្អស់ដែលរៀនឧបករណ៍ពិណ និងត្រៀមទៅសម្ដែងឧបករណ៍មួយនេះឱ្យអន្តរជាតិបានស្គាល់កាន់តែច្បាស់។
កញ្ញា ស្ងួនកវី សេរីរ័ត្ន ធ្លាប់បានយកឧបករណ៍មួយនេះទៅសម្ដែងឱ្យពិភពលោកបានស្គាល់ច្រើនលើករួចមកហើយ តែនៅពេលខាងមុខក៏ខ្លីនេះ នាងនឹងយកឧបករណ៍មួយនេះ ទៅសម្ដែងខ្នាតអន្តរជាតិនៅប្រទេសជាច្រើនទាំងអឺរ៉ុប និងអាស៊ី។
សេរីរ័ត្ន នឹងត្រៀមចេញទៅប្រទេស អូស្ត្រាលី យកឧបករណ៍ពិណទៅសម្ដែងក្នុងកម្មវិធី "បង្សុកូល” បន្ទាប់ពីសម្ដែងនៅប្រទេសនេះចប់ សេរីរ័ត្ន ត្រៀមយកឧបករណ៍ដដែលនេះទៅសម្ដែងនៅ អាមេរិក បារាំង និងប្រទេសអាស៊ី និង អឺរ៉ុបជាច្រើនទៀតដែលកម្មវិធីនេះបានគ្រោងទុក។
យុវតីដែលកើតក្នុងត្រកូលអ្នកភ្លេង ៦ជំនាន់រូបនេះ បានប្រាប់ Sabay ថា ការរៀនឧបករណ៍ពិណមានការលំបាកច្រើនទម្រាំអាចលេងបានដូចសព្វថ្ងៃ នាងត្រូវយំស្ទើរគ្រប់ពេលដែលរៀន។ យុវតីរូបនេះ ទទួលបានការបណ្ដុះបណ្ដាលផ្នែកឧបករណ៍ពិណ ពីគ្រូជនជាតិបារាំងមួយរូប រយៈពេល២ទៅ៣ខែ។ បន្ទាប់មកនាងក៏ទទួលបានអាហារូបករណ៍ពីអង្គការសិល្បៈខ្មែរអមត រៀនរយៈពេល២ឆ្នាំ នៅសាលាដូរ្យតន្ត្រី ហ៊ឹម សុភី ផ្នែកឧបករណ៍ពិណ។
“ឧបករណ៍មួយនេះ ពិបាករៀន អ៊ីចឹងទៅថ្ងៃអនាគតខ្ញុំចង់បើកសាលាបង្រៀនតន្ត្រី ផ្នែកឧបករណ៍ពិណ ព្រោះខ្ញុំយល់ថាអ្នកចេះឧបករណ៍នេះអត់ច្រើនទេ ហើយនេះជាឧបករណ៍ភ្លេងបុរាណខ្មែរដែលមានតម្លៃ ខ្ញុំចង់ឱ្យមានអ្នកបន្តវេនឱ្យកាន់តែច្រើន”។
សេរីរ័ត្ន បានចូលរៀននៅសាលាមធ្យមវិចិត្រសិល្បៈផ្នែកដូរ្យតន្ត្រី លើឧបករណ៍ ប៉្យាណូ នៅអាយុ១២ឆ្នាំ។ បច្ចុប្បន្ននាងមានអាយុ១៨ឆ្នាំ ថ្វីត្បិតមានអាយុនៅក្មេង តែនាងមានបទពិសោធន៍ផ្នែកសម្ដែងសិល្បៈជាច្រើនឆ្នាំ។ សេរីរ័ត្ន បានចូលរៀនផ្នែកឧបករណ៍ពិណនៅឆ្នាំ២០១២ ពោលគឺតាំងពីពិណបានបង្កើតឡើងសាជាថ្មីមកម្ល៉េះ នៅពេលនោះហើយ ដែលនាងចាប់ផ្ដើមប្រលូកច្រើនក្នុងវិស័យសិល្បៈ។
ការសម្ដែងក្នុងប្រទេសនាងសម្ដែងក្នុងកម្មវិធីទាំងតូចទាំងធំជាច្រើន ចំណែកក្រៅប្រទេសវិញមានប្រទេស ថៃ ចិន សិង្ហបុរី តៃវ៉ាន់ ហើយនាពេលក៏ខ្លីខាងមុខនេះ នាងត្រូវទៅសម្ដែងនៅអូស្ត្រាលី ក្នុងកម្មវិធីតន្ត្រី "បង្សុកូល” ខ្នាតអន្តរជាតិ៕
ចុចអាន៖
