ជ័យ សុវ៉ាត ត្រៀមចេញ Original Song រៀបរាប់ពីជីវិតនិស្សិតពេទ្យ
អតីតជយលាភីលេខ២ "ផ្កាយរះក្នុងសួន" លោក ជ័យ សុវ៉ាត បានប្រកាសថា ខ្លួននឹងចេញ Original Song មួយបទដើម្បីវាយលុកទីផ្សារ ក្នុងពេលឆាប់ៗនេះ ដោយខ្លឹមសារនៃបទចម្រៀង រៀបរាប់ពីស្ថានភាពជីវិតនិស្សិតពេទ្យមកពីជនបទ និងសិស្សនៅទីក្រុង។
បទមួយនោះ មានចំណងជើងថា "ជីវិតនិស្សិតពេទ្យ" ជាស្នាដៃតែងនិពន្ធទាំងទំនុកច្រៀង ទំនុកភ្លេង ដោយខ្លួនលោកផ្ទាល់តែម្ដង ។ លោក ជ័យ សុវ៉ាត និយាយថា លោកចាបផ្ដើមតែងនិពន្ធបទនេះឡើង គ្រាដែលខ្លួនប្រលង ហើយត្រូវរៀនច្រើនមុខវិជ្ជា មានភាពលំបាក គួបផ្សំបានពីដឹងជីវិតមិត្តភ័ក្ដិមកខ្លះផងនោះ ក៏និពន្ធជាបទចម្រៀងឡើង។
ជយលាភីលេខ២ "ផ្កាយរះក្នុងសួន" រូបនេះបានឲ្យដឹងថា លោកបានថតជាសំឡេងរួចហើយ ប៉ុន្តែមិនទាន់បានចេញលើបណ្ដាញសង្គមទេ ហើយបច្ចុប្បន្ននេះកំពុងតែថត Trailer ដើម្បី Promote ។
ផ្អែកតាមការលើកឡើង លោក ជ័យ សុវ៉ាត អាចត្រូវចំណាយខ្ពស់ក្នុងការ Promote បទដំបូងរបស់ខ្លួន ឲ្យមហាជនបានស្គាល់ ក្នុងនោះដោយគ្រាន់តែ Trailer តារាចម្រៀងរូបនេះ ប្រើតួសម្ដែងដែលភាគច្រើននិស្សិតពេទ្យរៀនជាមួយគ្នារហូតដល់ទៅ១០០នាក់ឯណោះ។
"លូវហ្នឹងខ្ញុំធ្វើ Trailer សិនបើមានអ្នក View ច្រើន ខ្ញុំនឹងថត Full MV តែម្ដង ប្រហែលត្រូវចំណាយច្រើន" តារាចម្រៀងកូនកំព្រាត្រូវបានអ្នកមានទ្រព្យច្រើនម្នាក់យកមកធ្វើជាកូនចិញ្ចឹម ថ្លែងកាលពីចុងសប្ដាហ៍កន្លងទៅ។
ចាប់តាំងពី លោក ជ័យ សុវ៉ាត ជាប់ជយលាភីលេខ២ "ផ្កាយរះក្នុងសួន" មក លោកមិនទាន់ចូលច្រៀងឲ្យផលិតកម្មណាមួយឡើយ។ តារាចម្រៀង និងជានិស្សិតពេទ្យរូបនេះ បានត្រឹមតែច្រៀងនៅតាមស្ថានីយទូរទស្សន៍នានា ក៏ដូចជាការច្រៀងតាមការប្រគំតន្ត្រីតាមបណ្ដាខេត្ត ប៉ុណ្ណោះ។
បទ "ជីវិតនិស្សិតពេទ្យ" ដែលលោកអះអាងថាជា Original Song នេះ មិនមានគោលដៅលក់ ឬជ្រកក្រោមផលិតកម្មមួយណាឡើយ ពោលគឺលោក ធ្វើឡើង ដើម្បីបង្ហោះលើបណ្ដាញសង្គមតែប៉ុណ្ណោះ មុនពេលឈានទោផលិតបទថ្មីជាបន្តបន្ទាប់ទៀត៕
អត្ថបទ៖ ខុត សីហា
