នាយ ឆើត ជាប់ចង្កេះកម្រើកលែងបានពេលថតរឿង
លោកពៅ គីសាន់ ហៅនាយ ឆើត ត្រូវជាប់ចង្កេះមិនអាចកម្រើកបាន ពេលថតរឿង"សង្គ្រាមបេះដូង" របស់ផលិតកម្ម ខ្មែរមេគង្គ កាលពីពេលថ្មីនេះ។
នាយ ឆើត ពេលនៅមន្ទីរពេទ្យរុស្ស៊ី
តារាកំប្លែងខាងលើប្រាប់ Sabay មុននេះបន្តិចថា នាយសម្ដែងជាតួអ្នកលេងក្នុងឈុតចាប់ជំរិតតួស្រី ពេលនោះហើយ ដែលត្រូវជាប់ចង្កេះរឹងជើងមិនអាចកម្រើកបានតែម្ដង។ នាយនិយាយថា៖ " ពេលថតលើកទី១មិនអីទេ តែដល់ពេលថតលើកទី២ប្លង់ដដែលហ្នឹង ក៏ស្រាប់តែជាប់គាំង ដើរលែងកើតតែម្ដង ទើបចេញពីពេទ្យតើ"។
នាយ ឆើត បន្តថា នាយទើបចេញពីមន្ទីរពេទ្យរុស្ស៊ីមុននេះ ក្រោយទទួលការព្យាបាលពីគ្រូពេទ្យកាលពីព្រឹកមិញ។ "មិនដឹងយ៉ាងម៉េចទៀតទេក្មួយ ព្រោះជិះកង់បីមកដល់ផ្ទះមិញ ឥឡូវដូចឈឺប្រហែលដើមហើយហ្នឹង"។ លោកបញ្ជាក់យ៉ាងដូច្នេះ។
នាយ ឆើត មិនទាន់ដឹងថា ពេលណាទើបអាចជាសះស្បើយ ហើយត្រឡប់ទៅសម្ដែងវិញនោះទេ ដោយនាយអះអាងថា ពេទ្យត្រូវការពេលវេលាតាមដានបន្តទៀតសិន។ ហើយការព្យាបាលលើកដំបូងនេះត្រឹមតែចាប់ទាញសរសៃ និងប្រើប្រាស់ថ្នាំគ្រាប់ប៉ុណ្ណោះ។
អត្ថបទ៖ សំ ជំនាញ
រូបថត ផ្ដល់ឱ្យ
