- 2018-07-14 07:11:43
- ព័ត៌មាន
កូនស្រីភ្លោះរបស់ចាន់សម័យ មានដុងសិល្បៈ តែម្ដាយឪពុកមិនហ៊ានជំរុញ
- 2018-07-14 07:11:43
- ចំនួនមតិ 0 | ចំនួនចែករំលែក 0
កូនស្រីភ្លោះរបស់ចាន់សម័យ មានដុងសិល្បៈ តែម្ដាយឪពុកមិនហ៊ានជំរុញ
ចន្លោះមិនឃើញ
ក្នុងចំណោមកូនប្រុសស្រីទាំង៥របស់តារាចម្រៀង ចាន់ សម័យ មានតែកូនស្រីភ្លោះពៅទាំងពីរប៉ុណ្ណោះ ដែលមានទេពកោសល្យផ្នែកច្រៀង ដូចឪពុករបស់ខ្លួន ។ ប៉ុន្តែ លោកចាន់ សម័យ និងភរិយា មិនហ៊ានជំរុញកូនស្រីទាំងពីរ ឲ្យចូលសិល្បៈនោះទេ។
ភរិយាលោក ចាន់ សម័យ ប្រាប់ថា កូនស្រីពៅភ្លោះទាំងពីរ មានឈ្មោះ ចាន់ អេលីណា និងម្នាក់ទៀត ចាន់ អេលីណៃ អាយុ ៩ឆ្នាំ ចូលចិត្តច្រៀងខ្លាំងណាស់ពេលណាទំនេរ ខុសពីបងៗរបស់ពួកគេ មិនសូវចូលចិត្តច្រៀងឡើយ ។ ថ្វីត្បិតមើលឃើញទេពកោសល្យកូនស្រីពៅ ដូចឪពុកក៏ពិតមែន ប៉ុន្តែទាំងលោក ចាន់ សម័យនិង ភរិយា មិនហ៊ានជំរុញកូនចូលសិល្បៈឡើយ។
ហេតុផលនេះ ត្រូវបាន ម្ចាស់បទ "ពាក់អាវមិនដែលឃើញដោះ "និយាយថា បើកូនស្រីទាំងពីររបស់លោក ស្រលាញ់ពេញចិត្តចម្រៀង លោកមិនហ៊ានប្រកែកទេ តែក៏មិនហ៊ានជំរុញដែរ។ លោកបញ្ជាក់ថា ៖ " បើកូនពេញចិត្តអ្វី ឲ្យគេធ្វើអ្វីតាមចំណង់ចំណូលចិត្ត ខ្ញុំមិនបង្ខំចិត្តឡើយ។ ប៉ុន្តែការសិក្សាវិញ ខ្ញុំចង់ឲ្យរៀនដល់ចប់ នេះទើបជាអ្វីដែលខ្ញុំចង់បានច្រើនជាង"។
ស្រដៀងគ្នានេះដែរ ភរិយាឈ្មោះ សែ សុខហ៊ាង ប្រាប់ថា អ្នកនាង ចិញ្ចឹមខ្លួនកូន តែមិនចិញ្ចឹមចិត្តនោះទេ។ ដូច្នេះមិនហ៊ានជំរុញកូន ដាច់ខាតត្រូវចូលសិល្បៈតាមឳពុកដែរ។ ជួនកាល កូននៅតូច ឃើញមានសមត្ថភាព ចូលចិត្តច្រៀង លុះធំឡើង កូនចង់ទៅប្រកបរបរអ្វីផ្សេង ក៏មិនអាចទាយទុកបានឡើយ។ ដូច្នេះហើយ អ្នកនាងមិនហាមឃាត់ដែរ គ្រាន់តែថា ពេលឃើញកូនមានសមត្ថភាព ចេះច្រៀង អ្នកនាងសប្បាយចិត្ត។
បើទោះម្ដាយឪពុកមិនបានជំរុញ ឬបង្រៀនផ្នែកសិល្បៈអ្វីដល់កូនស្រីភ្លោះទាំងពីរក៏ពិតមែន សម្រាប់អេលីណា និងអេលីណៃ និយាយថា អ្នកទាំងពីរចូលចិត្តច្រៀងខ្លាំងណាស់។ ពួកគេចេះច្រៀងច្រើនបទ តែបទខ្លះមិនស្គាល់ចំណងជើងទេ គ្រាន់តែឮគេច្រៀងពីរបីដង ខ្លួនក៏ស្រែកច្រៀងតាមបានផងដែរ។
ចំពោះកុមារីទាំងពីរឆ្លើយថា បើសិនឪពុកម្ដាយព្រមឲ្យចូលសិល្បៈ ពួកគេព្រមដោយមិនរួញរានោះទេ ព្រោះស្រលាញ់ផ្នែកនេះខ្លាំងណាស់៕
