គេបង្អាប់រឿងញ៉ាំគីមឈី ខ្លាំងពេក គុយលី និពន្ធបទឡើង មិនទាន់ចេញ MV ផង មានអ្នកគាំទ្របាត់ទៅហើយ

2018-10-03 03:36:24
ចម្រៀង

2018-10-03 03:36:24
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងពលករខ្មែរដែលមានប្រវត្តិជាកម្មករចិញ្ចឹមបង្គានៅប្រទេសថៃ លោក គុយលី ថ្មីៗនេះបាននិពន្ធបទចម្រៀងថ្មី១បទទៀតហើយ មានចំណងជើងថា "គីមឈី"។ មុនឈានដល់ការនិពន្ធបទចម្រៀងនេះឡើង ម្ចាស់បទចម្រៀងរូបនេះប្រាប់ថា ក៏ព្រោះតែខ្លួនត្រូវបានតារាចម្រៀងផ្សេងទៀតបង្អាប់រឿង ញ៉ាំគីមឈី កាលទៅច្រៀងនៅប្រទេសកូរ៉េលើកទី១ រាកញឹកញាប់ ហើយគិតថា ខ្លួនអាចនឹងមានឱកាសមកច្រៀងនៅទីនោះម្ដងទៀត ក៏និពន្ធបទចម្រៀងនិយាយពីម្ហូបអាហារប្រចាំប្រទេសកូរ៉េនេះឡើង ទុកជាអនុស្សាវរីយតែម្ដង។ បទចម្រៀងមួយបទនេះ គ្រោងនឹងផលិតជា MV ក្នុងពេលឆាប់ៗនេះ ប៉ុន្តែអ្វីដែលជាការកត់សម្គាល់ មិនទាន់ទាំងចេញផ្លូវការផង ឃើញថាមានអ្នកគាំទ្រជាច្រើនទៅហើយ។

គុយលី សម្តែងនៅប្រទេសកូរ៉េ

តារាចម្រៀងវ័យ២៨ឆ្នាំរូបនេះបានបញ្ជាក់បន្ថែមថា កាលលោកទៅច្រៀងនៅប្រទេសកូរ៉េ១ឆ្នាំមុនជាមួយតារាចម្រៀង ខេមរៈ សិរីមន្ត ខេម មាស សុខសោភា យូរី លោក ប៉ែន ចំរ៉ុង ជាដើម តារាចម្រៀងទាំងអស់នោះ បានបង្អាប់លោកខ្លាំងណាស់នៅលើឆាកតែម្ដង រឿងពិសាគីមឺឈីទៅ ឧស្សាហ៍រាក ក៏ព្រោះតែក្រពះលោកមិនធ្លាប់សាកអាហារទាំងនោះ។ ការបង្អាប់នេះក៏ធ្វើឲ្យគិតក្នុងចិត្តថា បទចម្រៀងរបស់ខ្មែរនិយាយពីប្រទេសកូរ៉េ ជាពិសេសទាក់ទងនឹងហូបអាហារប្រចាំប្រទេសកូរ៉េនេះ មិនសូវជាមានច្រើន ក៏សរសេរបទចម្រៀងឡើងតែម្ដង ក្រែងលោមានអ្នកគាំទ្រ។

គុយលី និងលោក ប៉ែន ចំរ៉ុង

ទាំងទំនុកច្រៀង និងមេឡូឌី ត្រូវបាន លោក គុយលី ជាអ្នកសរសេរឡើងទាំងអស់។ ថ្មីៗនេះ តារាចម្រៀងរូបនេះមានឱកាសបានទៅច្រៀងនៅប្រទេសកូរ៉េជាលើកទី២ម្ដងទៀតជាមួយតារាចម្រៀងល្បីៗជាច្រើនទៀត ហើយក៏យកបទចម្រៀង១បទនោះទៅច្រៀងចែកបងប្អូនខ្មែរនៅទីនោះរាំលេងនិងស្ដាប់កម្សាន្ត។ តាមការវាយតម្លៃពីសាមីខ្លួនបទ "គីមឈី " លោកថា មានការគាំទ្រច្រើន ដូចនេះគុយលី ថា ត្រូវតែផលិតជា MV ក្នុងពេលឆាប់ៗនេះ ដែលអាចធ្វើរួចមុនភ្ជុំ ឬក្រោយភ្ជុំបិណ្ឌនេះតែម្ដង។

តាមការលើកឡើងរបស់បុរសសម្បុរស្រអែម មានកំណើតមកពីស្រុកបាកាន ខេត្តពោធិ៍សាត់ រូបនេះលោក មានបទចម្រៀងផ្ទាល់ខ្លួនចំនួន៥បទមកហើយ ក្នុងនោះមាន ទី១"ខ្លាចមិនច្បាស់" ទី២"នឹកមនុស្សម្នាក់មិនអាចស្រលាញ់" ទី៣"ស្រីប្ដីឯងសោះ" ទី៤"គេមានសំណាង" និងទី៥"គីមឈី"។ បទ"ខ្លាចមិនច្បាស់"និងបទ"ស្រីប្ដីឯងសោះ" មានអ្នកគាំទ្រខ្លាំងជាងគេ។

ជុំវិញលើការចំណាយផលិតបទចម្រៀង១បទនេះឡើង គុយលី ថា ស្ថិតក្រោយការឧបត្ថម្ភពីមេ របស់ខ្លួនគឺ ឧកញ៉ាវ័យក្មេង ឡេង ណាវ៉ាត្រា ត្បិតអីដូចបានដឹងស្រាប់បច្ចុប្បន្នលោកត្រូវបានឧកញ៉ាកំពុងតែមានប្រជាប្រិយរូបនេះយកមកធ្វើជាបងប្អូនធម៌ ហើយធ្វើការស្នាក់នៅជាមួយគ្នារាល់ថ្ងៃ៕

ទស្សនាវីដេអូ គុយលី ច្រៀងបទ "គីមឈី" នៅប្រទេសកូរ៉េ