- 2018-12-03 07:04:02
- ព័ត៌មាន
យាយកន្តែរ៉ែ ថ្ងូររឿងសិស្សចូលរៀនជំនាញល្ខោនខោលឆ្នាំនេះ មានប្រុសតិចបំផុត
- 2018-12-03 07:04:02
- ចំនួនមតិ 0 | ចំនួនចែករំលែក 0
យាយកន្តែរ៉ែ ថ្ងូររឿងសិស្សចូលរៀនជំនាញល្ខោនខោលឆ្នាំនេះ មានប្រុសតិចបំផុត
ចន្លោះមិនឃើញ
ទោះបីជាការចូលរៀនជំនាញមួយនេះមិនគិតប្រាក់ក្ដី ហើយល្ខោនខោលត្រូវបានចុះបញ្ជីជាសម្បត្តិបេតិកភណ្ឌពិភពក្ដីហើយក្ដី ចំនួនសិស្សដែលបានចូលរៀនជំនាញនេះ ហាក់មិនមានការកើនឡើងឡើយពីមួយជំនាន់ទៅ១ជំនាន់។ ជាងនេះទៅទៀត សិស្សប្រុស កាន់តែមានការធ្លាក់ចុះ មិនដឹងមូលហេតុ គួរឲ្យព្រួយបារម្ភ។ នេះបើតាមការឲ្យដឹងពី លោក ហង់ ភូមិរ៉ា ហៅយាយកន្តែរ៉ែ ដែលជាប្រធានក្រុមសិល្បៈយុវជនល្ខោនខោល ជំនាន់ថ្មី។
លោក ហង់ ភូមិរ៉ា បានបន្តឲ្យដឹងថា នៅរយៈពេល២ជំនាន់ចុងក្រោយនេះ ចំនួនសិស្សប្រុសដែលចូលរៀនមានការធ្លាក់ចុះជាខ្លាំង ដោយក្នុង១វគ្គមានសិស្សប្រុសចូលរៀនត្រឹមជាង១០នាក់ប៉ុណ្ណោះ ខណៈសិស្សស្រីមានអ្នកចូលរៀនរាប់រយនាក់។ "៤ជំនាន់មុនចំនួនសិស្សប្រុស សមាមាត្រនឹងសិស្សស្រី ប៉ុន្តែ២វគ្គចុងក្រោយនេះសិស្សប្រុសមានជាង១០នាក់ប៉ុណ្ណោះ ក្នុង១វគ្គ មិនទាន់បើកវគ្គថ្មីទេ បើវគ្គហ្នឹងចូលរៀនតិចចឹង"លោក ហង់ ភូមិរ៉ា ហៅយាយកន្តែរ៉ែ ថ្លែង។
ប្រធានក្រុមសិល្បៈរូបនេះលើកឡើងឲ្យដឹងទៀតថា តាំងពី ក្រុមសិល្បៈយុវជនល្ខោនខោល ជំនាន់ថ្មី បានបង្កើតក្នុងឆ្នាំ២០១៦ ក្រុមមួយនេះបានបង្រៀនជំនាញល្ខោនខោល ដោយមិនគិតថ្លៃ៦ជំនាន់មកហើយ ក្នុងមួយជំនាន់ៗមានសិស្សប្រុសស្រីចន្លោះ២០០ទៅ៣០០នាក់។ ជាទូទៅពី១វគ្គទៅ១វគ្គ ការរៀនធ្វើឡើងមានចំនួន៣ទៅ៤ខែ ការបង្រៀនមិនត្រូវបានគិតប្រាក់ឡើយ ហើយសិស្សច្បងដែលចេះអាចជួយបង្រៀនសិស្សប្អូនជំនាន់ក្រោយបានជាបន្តបន្ទាប់បាន។
យាយកន្តែរ៉ែ ថា សិស្សដែលមកចូលរៀនកន្លែងរបស់លោកភាគច្រើនជាមនុស្សពេញវ័យ ដោយការរៀនរបស់ពួកគេ ក្នុងគោលដៅចង់ស្វែងយល់ពីសិល្បៈវប្បធម៌ និងសូវជាចង់ក្លាយជាអ្នកសិល្បៈអាជីពឡើយ។ ចំពោះសមត្ថភាពរបស់ពួកគេអាចសស្ដែងបានពី៥០%ទៅ៦០% បើធៀបទៅនឹងសមត្ថភាពក្រុមអាជីព។
ក្រុមសិល្បៈយុវជនល្ខោនខោលជំនាន់ថ្មី គឺជាក្រុមដែលបង្កើតឡើងក្នុងគោលបំណងបង្ហាត់បង្រៀនយុវជនឲ្យមានចំណេះដឹងផ្នែកសិល្បៈបុរាណ និងចូលរួមចំណែកក្នុងការថែរក្សានូវទម្រង់សិល្បៈបុរាណមួយទុកឲ្យខ្មែរជំនាន់ក្រោយ។ ការហាត់ល្ខោន និងរបាំបុរាណ ជាចំណែកមួយក្នុងការចូលរួមអភិរក្សនិងថែរក្សានូវសម្បត្តិវប្បធម៌បន្សល់ពីដូនតាយើង ដូចនេះសម្រាប់អ្នកដែលចង់រៀនទម្រង់ល្ខោនខោលនិងរបាំក្បាច់បុរាណផ្សេងទៀតអាចទាក់ទងមកក្រុមលោកបានគ្រប់ពេល៕
