- 2018-12-13 03:33:56
- ព័ត៌មាន
ធ្វើថៅកែគ្រឿងសង្ហារិមមិនអស់ចិត្ត ដួង ម៉ាណា ងាកទៅធ្វើជាថៅកែស្រីមុខជំនួញថ្មីមួយទៀត
- 2018-12-13 03:33:56
- ចំនួនមតិ 0 | ចំនួនចែករំលែក 0
ធ្វើថៅកែគ្រឿងសង្ហារិមមិនអស់ចិត្ត ដួង ម៉ាណា ងាកទៅធ្វើជាថៅកែស្រីមុខជំនួញថ្មីមួយទៀត
ចន្លោះមិនឃើញ
ពិធីការិនីទូរទស្សន៍ ដួង ម៉ាណា ដែលប្រិយមិត្តមិនសូវឃើញមានសកម្មភាពក្នុងការងារសិល្បៈនោះ ប៉ុន្តែបាន និងកំពុងមមាញឹកក្នុងការងារជំនួញទៅវិញ ដែលថ្មីៗ ទើបនឹងបើកជំនួញថ្មីមួយទៀត បន្ថែមពីអាជីវកម្មលក់គ្រឿងសង្ហារិមធ្វើពីផ្ដៅ។
អាជីវកម្មថ្មី ដែលគេប្រទះឃើញរបស់ពិធីការិនីនោះ គឺជាអាជីវកម្មផលិតទឹកសុទ្ធ ដោយយកឈ្មោះនាងប្រើធ្វើជាពាណិជ្ជនាមតែម្ដង គឺ "ដួង ម៉ាណា" ដែលបាន និងកំពុងចរាចរណ៍ចូលទីផ្សារក្នុងទីក្រុងភ្នំពេញ។ ម៉ាណា បញ្ជាក់ថា នោះជាអាជីវកម្មថ្មីជារបស់ផ្ទាល់ខ្លួននាងមែន។ តារាស្រីដែលទើបនឹងសម្រាលបុត្រប្រមាណជិត១ឆ្នាំ ឲ្យដឹងថា នាងបានដំណើរការអាជីវកម្មថ្មីនេះ ប្រមាណជាង ១ឆ្នាំមកហើយ គឺតាំងពីមុននាងសម្រាលបុត្រទៅទៀត។
“ខ្ញុំមានបងប្អូនម្នាក់ គាត់រកស៊ីខាងហ្នឹងយូរដែរហើយ ឃើញថាល្អ អីចឹងក៏សាកល្បងធ្វើតែម្ដងទៅ!”។ ចំពោះដើមទុនសម្រាប់បង្កើតអាជីវកម្មផលិតទឹកបរិសុទ្ធនេះ ដួង ម៉ាណា ឲ្យដឹងថា នាងបានចំណាយខ្ទង់ម៉ឺនដុល្លារដែរ គឺប្រមាណជា ៣ម៉ឺនដុល្លារអាមេរិក។
បន្ទាប់ពីដំណើរការជាង១ឆ្នាំ ទឹកសុទ្ធ "ដួង ម៉ាណា" មិនទាន់វាយលុកខ្លាំងក្នុងទីផ្សារនៅឡើយ។ យ៉ាងនេះក្ដី ម្ចាស់អាជីវកម្មវ័យជិត៣០ឆ្នាំរូបនេះ បញ្ជាក់ថា អាជីវកម្មរបស់នាងក៏មិនខាតដែរ ដោយអាចទប់ទល់ការចំណាយផ្សេងៗ ក៏ដូចជាថ្លៃឈ្នួលពលកម្មរបស់បុគ្គលិកជាដើមបាន។ ស្ថានភាពនេះ ម៉ាណា លើកឡើងថា ជាសញ្ញាណល្អ បើទោះជាទើបបើកបានរយៈពេលខ្លីក៏ដោយ។ ដូច្នេះហើយ នាងរំពឹង អាចនឹងផ្ដល់ផលកាន់តែល្អថែមទៀត នៅពេលខាងមុខ។
បច្ចុប្បន្ន ដួង ម៉ាណា គឺជាពិធីការិនីប្រចាំទូរទស្សន៍អប្សរាក្នុងកម្មវិធីមួយចំនួនដូចជា កម្មវិធីប្រដាល់ កម្មវិធីកម្សាន្តមួយចំនួនជាដើម។ យ៉ាងណា ក្នុងនាមជាបុគ្គលិក Freeland ម៉ាណា បានដកឃ្លាមួយរយៈ លំហែមាតុភាព និងមិនទាន់មានគម្រោងច្បាស់លាស់ថា នឹងវិលត្រឡប់មកវិញនៅពេលនានៅឡើយ ស្របពេលបច្ចុប្បន្ននាង កំពុងមមាញឹកក្នុងការមើលថែកូនដំបូង និងអាជីវកម្មផង។
ក្រៅពីអាជីពសិល្បៈ បច្ចុប្បន្នពិធីការិនីទូរទស្សន៍ពូកែវោហាររូបនេះ ត្រូវបានគេដឹងថា កំពុងគ្រប់គ្រងអាជីវកម្មចំនួន២ ទី១ គឺ អាជីវកម្មលក់គ្រឿងសង្ហារិមធ្វើពីផ្ដៅ ដែលនាងមានសិប្បកម្មផ្ទាល់ខ្លួននៅខេត្តព្រះសីហនុ។ អាជីវកម្មនេះ ដំណើរការអស់ជាច្រើនឆ្នាំមកហើយ ហើយមកទល់បច្ចុប្បន្ន ក៏បានឈរជើងរឹងមាំនៅក្នុងទីផ្សារហើយដែរ។ ដូច្នេះហើយ ទើបនាងអាចដកឃ្លាទៅធ្វើអាជីវកម្មថ្មី។
ដោយឡែកអាជីវកម្មទី២ នាងកំពុងគ្រប់គ្រង គឺអាជីវកម្មផលិតទឹកសុទ្ធខាងលើ ដែលនាងទើបដកឃ្លាពីការគ្រប់គ្រងហាងលក់គ្រឿងសង្ហារិមធ្វើពីផ្ដៅយីហោ "ម៉ាណា ហ្វ័រនីឈ័រ" មកបើកដំណើរការ។ យ៉ាងនេះក្ដី មកទល់បច្ចុប្បន្នដោយសារជាប់កូនតូច ម៉ាណា ប្រាប់ថា នាងមិនបានគ្រប់គ្រងអាជីវកម្មទាំងពីរដោយផ្ទាល់នោះទេ ប៉ុន្តែមួយភាគធំ គឺស្វាមីរបស់នាង រួមនឹងសាច់ញាតិមួយចំនួនទៀត ជាអ្នកជួយមើលការខុសត្រូវជំនួស៕
