កម្រិតជោគជ័យរបស់ ឡាយ លក្ខិណា ជាមួយតារារ៉េបអន្តរជាតិ បង្ហាញឲ្យឃើញច្បាស់ក្រឡែត

2019-01-08 08:41:46
ព័ត៌មាន

2019-01-08 08:41:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមអ្នករៀបចំការប្រគំតន្ត្រីដំបូងសម្រាប់ ឡាយ លក្ខិណា និងតារាចម្រៀងរ៉េបជនជាតិកាណាដា បានឲ្យដឹងថា ពួកគេទទួលបានផ្លែផ្កាខ្លាំង ហួសពីការរំពឹងទុក ក្នុងកម្មវិធីប្រព្រឹត្តទៅកាលពីចុងឆ្នាំ ២០១៨ របស់តារាចម្រៀងទាំងពីរ។

"ខ្ញុំអាចនិយាយបានថា ការប្រគំតន្ត្រីរបស់ លក្ខិណា និង Clarence កាលពីយប់ថ្ងៃទី ២៩ គឺជោគជ័យខ្លាំងមែនទែន អ្នកទស្សនាបានមកពេញណែនតែម្ដង"។ អ្នកស្រី ចៅ សណ្ដាប់ ដែលជាអ្នកធានា ឡាយ លក្ខិណា ថ្លែងប្រាប់ Sabay។ ម្ចាស់ឧបត្ថម្ភដដែលអះអាងថា កៅអីសម្រាប់អ្នកទស្សនាទាំងអស់ គឺពេញអស់គ្មានសល់ ក្នុងនោះ ការចាប់ដៃគ្នាជាលើកដំបូងរវាង លក្ខិណា និង Clarence មានការចាប់អារម្មណ៍មែនទែន។

បញ្ហានេះ អ្នកស្រីថា គឺជាសញ្ញាណល្អ សម្រាប់ផែនការបន្ទាប់ទៀតរបស់អ្នកស្រី។ សណ្ដាប់ បានមានគម្រោងរយៈពេលយូរជាមួយតារាខ្មែរ ពោលគឺបើកឱកាសឲ្យសិល្បករខ្មែរក្នុងស្រុក បានចាប់ដៃគូជាមួយតារាអន្តរជាតិឡើងលើវេទិកានៅបរទេស ដោយក្នុងនោះ អ្នកស្រីបានចាប់ផ្ដើមជាមួយ ឡាយ លក្ខិណា។ ក្នុងការចាប់ផ្ដើមនេះ លក្ខិណា ទើបបានច្រៀងរួមគ្នានូវបទជាភាសាបារាំងមួយបទ ប៉ុន្តែថា តារាស្រីរូបនេះ នៅមានការងារសិល្បៈច្រើនទៀតជាមួយតារាចម្រៀងរ៉េបប្រុសច្រមុះស្រួច ក្នុងនោះហោចណាស់ ពួកគេត្រូវចាប់ដៃគ្នា២-៣ដងក្នុង១ឆ្នាំ។

ទិដ្ឋភាពភ្ញៀវកកកុញទស្សនាការប្រគំតន្ត្រីរបស់ ឡាយ លក្ខិណា និងតារារ៉េបកាណាដា(រូបភាព៖ ផ្ដល់អោយ)

ជាមួយគ្នា សិល្បករផ្សេងទៀត ក្រៅពី ឡាយ លក្ខិណា ម្ចាស់ឧបត្ថម្ភរូបនេះ ក៏បានអះអាងថា បានមើលឃើញរួចហើយក្នុងផែនការលើកស្ទួយតារាខ្មែរ ដោយគ្រោងនឹងនាំមកកាណាដា នៅដើមឆ្នាំនេះដែរ។ យ៉ាងនេះក្ដី អ្នកស្រីសុំមិនទាន់បញ្ចេញពីអត្តសញ្ញាណរបស់សិល្បករក្នុងស្រុក ដែលស្ថិតក្នុងផែនការបន្ទាប់របស់ខ្លួនឡើយ ប្រការក្រែងមានអ្វីផ្លាស់ប្ដូរ។

រូបភាព៖ ផ្ដល់ដោយ ចៅ សណ្ដាប់

ឡាយ លក្ខិណា បានទៅដល់ប្រទេសកាណាដាកាលពីចុងខែតុលា ឆ្នាំមុនដើម្បីបេសកកម្មសិល្បៈរបស់នាង។ តាមការផ្ចុងផ្ដើមរបស់ ចៅ សណ្ដាប់ លក្ខិណា បានស្គាល់ និងចាប់ដៃគូជាមួយ Clarence ផ្លូវការ ជាលើកដំបូងកាលចុងឆ្នាំនោះ។ លក្ខិណា បានប្រាប់ Sabay មុនឡើងយន្តហោះទៅកាណាដា ថា នាងសប្បាយរីករាយមែនទែន ចំពោះឱកាសពិសេសនេះ ត្បិតថា នាងមិនរំពឹងឡើយ ថាទទួលបានបែបនេះ ក្រោយចាកចេញពីសិល្បៈជិត ២០ឆ្នាំ។

ក្រៅពីបទចម្រៀងជាភាសាបារាំងជាមួយតារារ៉េបកាណាដា អ្នកស្រី សណ្ដាប់ អះអាងថា លក្ខិណា ក៏មានបទផ្ទាល់ខ្លួនឯងច្រៀងជាភាសាខ្មែរ និពន្ធ និងថតនៅលើទឹកដីអឺរ៉ុបថែមទៀតផង៕

អត្ថបទ៖ ទារិកា