- 2019-01-31 08:10:00
- ព័ត៌មាន
ត្រឹម១៧ឆ្នាំសោះ ប៉ុន្តែវិចិត្រករគំនូរម្នាក់នេះមានថ្វីដៃល្អមិនសរសើរមិនបាន
- 2019-01-31 08:10:00
- ចំនួនមតិ 0 | ចំនួនចែករំលែក 0
ត្រឹម១៧ឆ្នាំសោះ ប៉ុន្តែវិចិត្រករគំនូរម្នាក់នេះមានថ្វីដៃល្អមិនសរសើរមិនបាន
ចន្លោះមិនឃើញ
ចាប់ផ្ដើមគូរគំនូរតាំងពីអាយុ ៧ ៨ឆ្នាំ ពេលនេះ យាន សុខហេង បានក្លាយខ្លួនជាវិចិត្រករម្នាក់នៅក្នុងស្រុក ដែលមានទឹកដៃល្អនិងមានទម្រង់គំនូរប្លែកគួរឲ្យចាប់អារម្មណ៍មិនសរសើរមិនបាន។
សព្វថ្ងៃនេះនៅព្រះរាជាណាចក្រកម្ពុជាទម្រង់សិល្បៈគំនូរគឺមិនសូវជាទទួលបានការគាំទ្រ និងយកចិត្តទុកដាក់ក្នុងលក្ខណៈទ្រង់ទ្រាយធំនៅឡើយទេ ប៉ុន្តែទោះជាយ៉ាងណាក៏ដោយក៏អ្នកស្រលាញ់វិស័យនេះនៅតែតស៊ូនិងបង្កើតនូវអ្វីថ្មីៗជានិច្ច។ ជាក់ស្ដែង សុខហេង វិចិត្រករគំនូរត្រឹមវ័យ១៧ឆ្នាំ បានឆ្លងកាត់ការខិតខំប្រឹងប្រែងជាច្រើន ដើម្បីសម្រេចគោលបំណងតាំងពីក្មេងដោយចង់ក្លាយជាសិល្បករគំនូរមួយរូប។
៉ខ្ញុំចាប់ផ្ដើមគូរគំនូរផ្លូវការថ្មីៗនេះទេ គឺពេលខ្ញុំរៀនថ្នាក់ទី៩ រហូតដល់ពេលខ្ញុំរៀនថ្នាក់ទី១០ ក៏ចាប់ផ្ដើមអាជីពនេះជាផ្លូវការតែម្ដង ហើយៗជំនាញបច្ចេកទេសអ្វីៗគឺរៀនដោយខ្លួនឯងទាំងអស់។" សុខហេង បានបង្ហើបពីប្រភេទគំនូរដែលជាស្ទីល/រចនាបទរបស់ខ្លួនថា ជាមនុស្សប៉ុន្តែក្បាលជាសត្វ គឺដោយចង់បង្ហាញថាជីវិតសត្វនិងមនុស្សគឺមានតម្លៃស្មើគ្នា។ មនុស្សមិនរអានឹងសម្លាប់សត្វ ដើម្បីចិញ្ចឹមជីវិតខ្លួនឯង ប្រៀបដូចជាសត្វសម្លាប់សត្វគ្នាឯងដើម្បីចិញ្ចឹមជីវិតដូចគ្នា។ ទោះជាយ៉ាងណាក៏ដោយ នៅក្នុងរូបគំនូរនីមួយៗរបស់ សុខហេង សុទ្ធតែមានអត្ថន័យដាច់ដោយឡែកពីគ្នា។ អ្វីដែលពិសេសបំផុតនោះគឺ វិចិត្ររូបនេះក៏ធ្លាប់មានពិពរណ៍ផ្ទាល់ខ្លួនម្ដងរួចមកហើយនៅ Bong Gallery សម្រាប់បណ្ដារូបគំនូរ «The Guardians» ដោយមានបណ្ដាអ្នកចូលរួមទស្សនាច្រើន គួរឲ្យកត់សម្គាល់។
ទោះបីជាខ្លួនមានភាពក្មេងខ្ចីក្នុងវិស័យនេះក៏ពិតមែន ប៉ុន្តែវិចិត្រករវ័យក្មេងរូបនេះ បញ្ជាក់ប្រាប់ Sabay ថាខ្លួនពេញចិត្តនឹងការងារក្នុងវិស័យនេះ នឹងបន្តធ្វើវាទៅថ្ងៃខាងមុខទៀតនៅអនាគត។ "ហ្នឹងហើយបង ខ្ញុំនឹងនៅតែបន្តគួរគំនូរបែបនេះ ហើយក៏នៅតែបន្តស្វែងរកតិចនិកថ្មីៗ ព្រមទាំងប្រឡូកក្នុងវិស័យរចនាក្រាហ្វិក ព្រមទាំងហ្វេសិនសម្លៀកបំពាក់ផងដែរ។"
ដោយសារតែខ្លួនជាអ្នកសិល្បៈវ័យក្មេងរូបនេះ ប្ដេជ្ញាថានឹងខិតខំប្រឹងប្រែងអភិវឌ្ឍន៍ខ្លួនឯងជានិច្ច ដើម្បីបង្កើតនូវអ្វីថ្មីៗ ប្រទេសកម្ពុជាមិនដែលឃើញពីមុនមកក៏ដូចជាផ្ដល់កម្លាំងចិត្តនិងជាឧទាហរណ៍ល្អ ទៅដល់អ្នកស្រលាញ់វិស័យនេះជំនាន់ក្រោយ៕
