យឹង យន រំភើបឃើញបរទេសចូលចិត្តសិល្បៈខ្មែរ ក្នុងមហោស្រពសិល្បៈពិភពលោកនៅមីនីសូតា

2019-05-08 02:15:19
ព័ត៌មាន

2019-05-08 02:15:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងបេសកកម្មសិល្បៈរយៈពេលជាង២ខែទៅសហរដ្ឋអាមេរិកលោក យឹង យន បានឲ្យដឹងថា លោកមានចិត្តរំភើបក្រោយពីបានចូលរួមក្នុងមហោស្រពសិល្បៈដ៏ធំនៅរដ្ឋមីនីសូតាសហរដ្ឋអាមេរិក ពិសេសបានឃើញជនជាតិបរទេសចាប់អារម្មណ៍នឹងទម្រង់សិល្បៈរបស់ខ្មែរ។

ក្រោមការសម្របសម្រួលរបស់អង្គការ IKARE លោក យឹង យន និងកញ្ញា ស៊ូ ស៊ីរីកា បានទៅដល់មហោស្រពសិល្បៈពិភពលោកលើកដំបូងនៅក្នុងរដ្ឋមីនីសូតាសហរដ្ឋអាមេរិក ហៅថា "Festival of Nations" ។ កម្មវិធីនេះ គឺធ្វើ១ឆ្នាំម្ដង ដោយប្រមូលបានការចូលរួមបង្ហាញសិល្បៈពីស្ទើរគ្រប់ជាតិសាសន៍។

នៅទីនោះ តារាចម្រៀងមកពីខេត្តកំពង់ធំ ប្រាប់ថា លោកបានឃើញសិល្បៈចម្រុះរបស់ខ្មែរមានដូចជា សិល្បៈចម្រៀង គំនូរ របាំ និងក្បាច់គុនល្បុក្កតោខ្មែរជាដើម បានដាក់បង្ហាញជូនភ្ញៀវបរទេស ដែលលោកយល់ថា គឺជាកន្លែងផ្សព្វផ្សាយពីសិល្បៈវប្បធម៌ខ្មែរទៅកាន់ពិភពលោកយ៉ាងល្អ។

"សម្រាប់កម្មវិធីនេះ គឺពិសេសណាស់ អីចឹងខ្ញុំយល់ថា ល្អមែនទែន ដែលខ្មែរបានចូលរួម ព្រោះនេះជាឱកាសឲ្យគេស្គាល់សិល្បៈវប្បធម៌របស់យើងផង ដោយសារតែខ្ញុំបានសួរគេទៅ អ្នកខ្លះ គេអត់ស្គាល់ខ្មែរយើងផងទេ ដល់ពួកគេបានមកឃើញសិល្បៈរបស់យើងអីចឹង ពួកគេរីករាយជាមួយសិល្បៈរបស់យើងណាស់ អីចឹងហើយនេះ គឺជាឱកាសដ៏ល្អផ្សព្វផ្សាយពីសិល្បៈវប្បធម៌របស់យើងទៅកាន់ពិភពលោក"។ យឹង យន ថ្លែង។

ចំពោះសិល្បករខ្មែរដែលចូលរួម លោកថា មានទាំងអ្នកកំពុងរស់នៅសហរដ្ឋអាមេរិក ទាំងអ្នកទៅពីកម្ពុជា ក្នុងនោះ សិល្បករទៅពីកម្ពុជាមានលោកខ្លួនឯងផ្ទាល់ និងកញ្ញា ស៊ូ ស៊ីរីកា ក្រៅពីនេះ សុទ្ធជាសិល្បករនៅសហរដ្ឋអាមេរិកស្រាប់ បានរួមគ្នាផ្សព្វផ្សាយសិល្បៈវប្បធម៌ទៅពិភពលោក តាមការសម្របសម្រួលរៀបចំដោយ IKARE។ ចំណុចកត់សម្គាល់មួយលោកថា ប្រទេសជិតខាងយើង មានដូចជាថៃ វៀតណាម ជាដើម ក៏បានចូលរួមដូចគ្នាដែរ។

ម្ចាស់ជយលាភីលេខ២ កម្មវិធី "ស្ដាប់ចម្រៀងរបស់ខ្ញុំ" ប្រាប់បន្តថា មើលទៅភាពជាក់ស្ដែង សកម្មភាពសិល្បៈរបស់ប្រទេសជិតខាងយើង ហាក់មានសភាពផុលផុសជាង ដោយសារថា ពួកគេមានធនជាង ខណៈការចំណាយលើការរៀបចំ និងហៅសិល្បករទៅពីកម្ពុជា ត្រូវចំណាយខ្ពស់ ដែលលោកថា គឺជាឧបសគ្គក្នុងការនាំយកការបង្ហាញទម្រង់សិល្បៈធំជាងនេះ។

យ៉ាងនេះក្ដី ក្រោយពីអង្គការ IKARE បានចូលមករៀបចំសម្របសម្រួល លោក យន បានអះអាងថា ឆ្នាំនេះ គឺមានខ្មែរយើងចូលរួមច្រើនជាងបណ្ដាឆ្នាំមុនៗ ហើយលោកសង្ឃឹមថា ឆ្នាំក្រោយៗទៀត សកម្មភាពការបង្ហាញសិល្បៈ ខ្មែរយើងនៅទីនោះ នឹងកាន់តែផុលផុសច្រើនជាងនេះ៕